Masariku Network, 24 Maret 2007
Ale Istori Dapa Skrek (AIDS)
Tanggapan terhadap jurus banting lidah KADINSOS
Oleh: Siake Manue
"Saya mau tegaskan bahwa HIV AIDS adalah penyakit sosial moral. Karena itu
hindari seks bebas. Hindari gonta ganti pasangan. Hindari penggunaan narkoba"
Kalimat di atas bukanlah kata-kata bijak, yang biasanya beta pasang par antar
masuk beta pung tulisan. Rangkaian 22 kata itu membentuk kalimat laipose karing
dari saorang Kapala Dinas Sosial Negri Malubeta, yang katanggisang angka diri par
jadi guru moral, dalang dialog TVRI station Amaboana, malam 28 Februari 2007. Deng
slak hela badang dar kadera, lidah ibu kadinsos mulai banting kata-kata di atas.
Parsis nene Pauw babanting tarigu sabantal, par ontal ampas tarigu di Wayame.
Kata-kata yang tampias deng ritme terjaga itu, merupakan penegasan laste par tutup
rangkaian dialog tentang HIV-AIDS, yang dipandu kaka Uka. Sunggu mati beta skrek,
sampe teh panas batenga beker kompani yang baru beta palei, tumpa tasirang mata
kaki. Beta jadi seng abis fikir, saorang kadinsos yang nota bene juga saorang dokter
deng titel M,Ph, bisa talamburang kata macang bagitu. Satu saja kasimpulan beta,
maitua bahastek di orang pung kintal, padahal jingkal cuma satetok.
Beda-beda tipis deng kadinsos, Upulatu Negri Malubeta dalam publikasi di berita RRI
Station Amaboana 01 Maret 07 (yang juga dikutip harian Amaboana Express 01
Maret 07), kasi penekanan serupa. Melaluinya orang dikondisikan par mangarti, kalo
tajangke HIV-AIDS karna kalakuang moral yang seng mustahak. Beta jadi tamba
reu-reu, ini dadu iko bandar ka sebaliknya bandar iko dadu. Upu'ee, su tantu
fenomena HIV-AIDS tagae lai deng aspek moral. Meski bagitu sebagemana yang beta
tulis di media ini beberapa usbu lalu, HIV-AIDS seng bisa dikeker dari perspektif
moral sasaja (baca tulisan beta di Suara Maluku & Siwalima dengan judul Ale Infeksi
Dapa Skot). Bahogor HIV-AIDS malulu dari aspek moral, sesungguhnya kas'tunju
kalo handeke si tukang hogor didominasi oleh stigma deng diskriminasi. Orang-orang
macang bagini cuma par biking mandidih ketidak-setaraan sosial, yang abis itu
kas'batumbuh dominasi kuasa dari satu kumpulan masyarakat terhadap kumpulan
yang laeng. Terkait deng Odha (orang dengan HIV-AIDS), maka stigmatisasi akan
piara hadrat mou-mou deng penyangkalan terhadap HIV-AIDS. Hadrat ini kemudian
akan tola Odha atau dong yang orang rai-rai sebagai Odha, par badiri strap angka
kaki sablah di jiku negri. Tantunya stigmtisasi yang su bunting tua akan barana
diskriminasi, dan kemudian menghamilkan efek psikologis tentang bagemana Odha
deng dong pung basudara taru nilai par dong pung diri. Bole jadi dong rasa su takanal
kutukan. Atau juga dong tidor sondor sono, kong tinggal dudu matawana macang
orang jaga doriang. Bisa lai dong dudu makang hati sampe badang malele la putus
asa. Lebe cilaka kalo dong seng ambe bae karna rasa tarada keadilan, lalu gagartang
par kas'bajangke virus par anana negri deng orang sakampong. Tagal itu deng
maksud par teheng stigmatisasi deng diskriminasi, maka par taong 2002-2003
kampanye AIDS dunia pikol tema "live and let live" (hidup dan tetap tegar). Kampanye
ini menegaskan satu perkara, bahwa hanya deng melawan stigma dan diskriminasi
maka perjuangan melawan HIV-AIDS dapat dimenangkan.
Skarang beta mau bale ka katong pung bendar. Di negri ini spook HIV-AIDS ada
bajalang pardidu bacubi orang sakampong pung sono siang malang. Samua orang
tahang mata par bajaga kintal, jang akang spook badepa nai pagar rumah. Apalai
kabar su pica kalo spook HIV-AIDS bajalang injeksi anana negri par kas'tajangke
virus. Orang mulai laeng tarkira laeng...laeng basindir laeng. Laste-laste ana saorang
di Kudamati pilang bardong dia pung tamang yang tukang ojek, cuma tagal basangaja
bilang dia pung dalang muka su pucat, macang orang takanal AIDS. Mangapa dia
musti bardong?, karna su tantu dia tar mau dikelompokan pada orang-orang yang
musti pikol stigma deng diskriminasi sosial, karna dianggap melangkahi atoran moral.
Jang pastiu kio kalo beta musti ulang paleu par kas'inga, bahwa tugas Upulatu,
kadinsos, deng saniri laeng di negri Malubeta ini adalah biking trang mata deng fikiran
masyarakat, untuk barenti deng stigma dan diskriminasi terhadap Odha. Itu bisa
dimulai kalo lebe dolo Upu deng saniri negri pung mata deng fikiran trang tentang
perkara yang satu ini. Dalam laporan dari Secretary General Komisi Hak-Hak Asasi
Manusia pada sidang di Geneva taong 2001, deng sangat tegas dibilang bahwa "the
lack of understanding contributes to discriminatory treatment of those with HIV/AIDS".
Artinya, handeke pende-pende akan peranakan hadrat diskriminasi terhadap
orang-orang deng HIV-AIDS.
Dalam dialog tanggal 28 malam itu, nona Barend dari LPPM dudu di sabla ibu
kadinsos. Deng simpatik dia bilang sampe dua kali "Odha bukang monster". Deng
kata laeng dalam bahasa reklame akang babunyi "Odha, siapa takut?". Bagitu lai
deng bapa Uskup Mandagi, di harian Suara Maluku tanggal 2 Maret, menegaskan
bahwa "Odha bukang orang-orang yang harus dibuang, dihindari, atau dijauhkan. Kita
harus mendukung dan menguatkan mereka dalam penderitaan". Ini yang katong
bilang advokasi berbasis korban, yang bisa dibiking hanya kalo seseorang pung
handeke seng satetok par mangarti, deng papang dada tabal pono empati. Advokasi
berbasis korban beda langit deng bumi dari advokasi berbasis takajo dan kepanikan,
sebagemana yang ditunjukan maitua kadinsos deng paitua Upulatu Malubeta. Pada
advokasi berbasis korban, Odha dikeker sebagai solusi par perkara. Sebaliknya
dalam advokasi berbasis skrek dan kepanikan Odha dianggap sumber perkara.
Melalui advokasi berbasis korban maka Odha pung peluang par tunju muka iko
kampanye. Sebaliknya advokasi berbasis takajo deng kepanikan, biking Odha tinggal
gulung badang basalimong kecemasan, deng basambunyi di walang ketakutan.
Advokasi berbasis korban akan tolong masyarakat par dapa slak hidop deng Odha.
Sebaliknya advokasi berbasis takajo deng kepanikan, akan cikar masyarakat par
kas'strap Odha di jiku negri. Advokasi berbasis korban akan bantu karja bapele
garsernya HIV-AIDS menjadi epidemic/wabah. Sebaliknya advokasi berbasis skrek
deng kepanikan akan kas'garser stigmatisasi deng diskriminasi menjadi epidemic.
Kong apa yang ada jadi skarang dalang bendar kacupeng ini, adalah garsernya
stigmatisasi sebagai epidemic.
Skali lai beta mau bilang, bahwa bukang maksud beta par kas'geser aspek moral dari
fenomena HIV-AIDS. Bagi beta perkara moral adalah soal bae ka tarbae, dan bukang
soal batul ka salah. Banyak Odha terinfeksi virus karna hadrat moral yang tarbae.
Maski bagitu banyak lai yang tajangke karna ambel tindakan yang salah, tapi seng
bisa digolongkan sebagai pelanggaran moral. Konci rekeng beta pung maksud kalo
istori tuh timbang bae-bae dolo kio, jang sampe maknanya batimbang sabala. Parsis
kukis bruder manta di tengah, karna dibakar deng api satambong. Supaya seng
batimbang sabla, maka pertama-tama yang musti dibiking adalah segra kas'dudu
fikiran yang sama par samua pemangku kebijakan di negri ini, terkait deng
penanggulangan HIV-AIDS. Akang bisa dibiking melalui semiloka, workshop, seminar,
maupun berbagai bentuk bacarita laengnya (jang lupa kalo salah satu nara sumber
dalam acara-acara musti libatkan Odha atau keluarganya). Salah satu output dari
kegiatan ini adalah keluarnya guidance ataupun handout sosialisasi penanggulangan
HIV-AIDS dari samua perspektif. Slak su dapa pedoman, maka segra dilakukan tryout
sosialisasi dengan menekankan peningkatan kapasitas komunikasi sosial. Peserta
yang iko bukang karoco-karoco saja, tapi diutamakan Upulatu deng Badang Saniri
Negri, yang sabangkali jadi target tukang keker par diwawancarai. Deng jalan bagitu
seng akang terjadi satu bicara di timur, laeng bicara di barat, yang laste-laste biking
anana negri jadi skrek. Kalo su bisa sama fikiran baru lebe lanjut katong bisa bicara
par angka karja deng pilihan perkakas yang efektif, seperti yang beta su singgung
dalam tulisan lebe kamuka di media ini. Laste-laste beta mau minta maaf dar ujung
rambu sampe ujung kaki, kalo beta pung istori su biking skrek. Mari ale, beta patai
dolo jua...
MASARIKU NETWORK
|
