Masariku Network, 24 Maret 2007
Anana ucing pung stell
Oleh: Siake Manue
"Lemong nipis taguling-guling, guling akang di lobang cacing. Saratus di
julung-julung, dua ratus dikawalinya,linya,linya,linya,linya"
"Film Mesum Sejoli Ambon Marak di Telepon Genggam". Bagitu judul kapala barita di
bagiang muka Harian Suara Maluku tanggal 28 Februari 2007. Barita itu biking beta
inga kajadiang dua minggu lalu, waktu beta dapa dengar kaponakan
kacupeng-kacupeng dudu istori tentang dong dua pung iskolah. Bukang soal nilai
ulangan mera ka biru, tapi soal felem-felem porno yang dikirim dari handphone ke
handphone di tamang-tamang iskolah. Su tantu karna felem-felem ini produksi Ambon
Straat Cellular Enterprise, maka yang bawa roll tantunya pornstars dari Ambon juga.
Cilaka duablas karna yang bawa roll itu mulai dari tua-tua garongkong sampe anana
skola ucing-ucing (beta su dapa 5 felem yang berbeda). 'Maar Tuangala jua, ini sapa
yang biking anana jadi bagini!' Beta memang pantas mamagigi, bukan saja karna
kasus pelecehan seksual dan perkosaan merupakan kasus kriminal terbanyak dalam
taong 2006 menurut data Polda Maluku. Lebe dar itu beta jadi panas dinging karna
banyak kasus felem porno sampe deng pelecehan seksual melibatkan anana
ucing-ucing. Anana ucing yang su pasti seng lahir di baner-baner kayu atau di
ujung-ujung meti, maar yang lahir deng garser di dalang setiap matarumah. Anana
ucing yang makang ajaran awal kahidopan dari tata deng mama atau wate deng ua
pung bawah katiak. Konci rekeng katong pung soal seng barubah dari dunya dolo
sampe oras tadi nih, yakni bagemana tiap matarumah manyimpang tampa par anana
pung garser sebage manusia?
Manyau soal di atas memang seng gampang par dunya oras skarang ini. Dunya pono
persaingan deng jam karja yang semakin panjang, tindis orang tatua par loleng abis
waktu di luar rumah. Dunya kabebasan baru (Neolib) yang ditandai deng percepatan
arus informasi dan transportasi, yang biking anana deng gampang dapa slak par isap
wer bae ataupun tarbae. Dunya yang diator deng kapala (rasionalitas) demi
produktifitas tinggi dan seng mister deng rasa dan tanggung jawab sosial. Dunya
yang tarkiranya hanya pasar dan pasar, dimana anana diarahkan untuk garser
sebagai jongos pasar (berdasarkan labour market and market value). Dunya dimana
persepakatan demi kesejahteraan sosial (social welfare) semakin tipis dari oras ke
oras. Dunya privatisasi kahidopan sosial, dimana inti mata rumah secara kwantitatif
semakin kacupeng dari waktu ke waktu (dalang masyarakat kota yang berkembang
pesat, inti keluarga cenderung mengecil sebatas tata, mama, deng anana satu dua
orang). Dunya pabrik-pabrik dimana anana ucing-ucing dari poka-poka su distell par
jadi skrup. Terasingkan (alienasi) dari cakadidi polos masa anana. Macang yang beta
rasa tempo dengar Yoan Tanamal dolo-dolo manyanyi donci kodok balumpa-lumpa,
deng rambut karibo diplateng-plateng.
Lalu apa hubungan dunya macang di atas deng anana pung katagorang?.
Pertama, dalang dunya macam bagitu, relasi sosial paling hakiki dalam kahidopan
masyarakat, yakni matarumah-matarumah su terancam dari waktu ke waktu. Cilaka
duablas karna hubungan basudara dalam inti matarumah bahkan cenderung berubah
menjadi hubungan ekonomi. Orang tatua deng anana berhubungan sebatas kepeng
snup hari-hari. Meme deng pai berhubungan sebatas kepeng blanja hari-hari. Samua
hubungan cenderung direken deng kepeng. Parsis macang Ence Kauw rekeng harga
cengke deng biji cimpoa, di muka istamplas pasar Saparua. Dalang wer macang
bagitu anana ucing-ucing garser deng orientasi kepeng sasaja. Slak-slak
kepeng....slak-slak kepeng. Coba tarkira di iskola-iskola, anana ucing-ucing bajalang
basena rembeng handphone yang harga tiga sampe lima juta. Kepeng snup
puluh-puluh ribu par anana iskola dasar. Kondisi ini biking puar kesenjangan sosial,
diantara anana yang bisa tingkai blagu tagal rembeng kepeng banyak ke iskola, deng
anana yang piara bibit hati saki tagal panta sak palit tarus.
Orang tatua yang meneer su tantu seng mister. Dong pikir su prop anana deng
kepeng snup satambong maka dong pung hahalang par anana pung garser su tamba
haringan. Sondor tau kalau anana deng kepeng snup satambong ada jadi incaran
botol manci, yang bajalang papalele narkoba deng felem-felem X1 sampe X10 di
iskola-iskola. Sasaran botol manci su tantu anana meneer yang seng manir par
tahang kepeng. Sementara botol manci pung tamang buntiana, tinggal kong bacico
kasi bunting bibit hati saki di anana kasiang-kasiang pung jantong hati. Solidaritas
sosial semakin rapuh oras anana mulai tacigi nai-nai badang.
Kadua, su tantu hubungan sosial musti pung dimensi spiritual, dan bukang dimensi
ekonomi sasaja. Artinya hubungan kepeng snup seng bisa seng musti dipoles makna
spiritual yang kantal selalu. Di oras beta pung masa anana, kalau dapa kepeng snup
satu dua kwart saja, beta pung meme kasih akang deng sumbayang. Ade kaka mau
dudu makang sama-sama di lesa, tata dudu di kapala meja par kasi stori sadiki
sebelum mulai cikar makanang. "Jang lupa biar talang makanang kasiang-kasiang,
tapi ini Tuangala pung berkat. Kalo dong garser jadi manusia, jang manyangkal
persaudaraan di meja makang kasiang ini". Bagitu kurang lebe tata bilang, yang
biking katong makang deng aer mata tumpa. Tempo skarang ini amper su seng
pernah lia lai orang tatua dudu makang sama-sama deng anana di rumah, kong kasi
bicara par satu deng laeng. Apalai mau dapa orang tatua yang ator waktu par
sumbayang deng anana di rumah. Laste-laste anana garser sondor fondasi spiritual
yang kuat, yang seharusnya didapat sejak dong mulai maraya di dalang setiap
mataruma. Kong bagemana anana bisa teheng galombang modernitas di kota-kota,
yang tagulung-gulung deng dinamika dan percepatan yang sangat tinggi.
Katiga, pergerakan transformasi informasi su seng bisa dipele lai. Anana di bendar
Ambon bisa deng segra tahu apa yang terjadi di Nevada-Amerika, ketimbang di
Ambalau deng Nasalaut. Anana tajangke wer global yg balumpa hip-hop ketimbang
alunan ukulele pante Maluku. Anana berkiblat ke Paris Hilton yang suka buka kutang
deng karsang dalang, ketimbang Christina Martha Tiahahu yang kancing muka
kabaya deng paneti. Anana deng bebas bisa taroso masu kaluar browsing internet
dalang dunya e-book, e-learning, e-commerce, e-office, e-sex, dan laste-laste tanta
Dana yang papalele kuini di pasar skrek Batumeja bataria 'eeeee-cilaka'. Cilaka karna
anana su iko trend lapas kutang dimuka camera handphone. Abang Acing di
Waihaong basahua "Hooee tar bisa block akang dunya pung kamajuang lai
tamang'ee" Tantu Abang Acing tar sala. Akang jadi salah kalo katong seng bisa
kasiap anana par hadapi kamajuan deng mental yang baik.
Kaampat, satu hal yang biking anana nai-nai badang ilang haluang, karna banya
orang tatua oras skarang nih, seng bisa jadi tamang par anana. Padahal dalang
dunya kahidupang kota yang bagitu sibuk, anana memerlukan aspek batamang yang
hangat dalang kahidopan rumah tangga. Deng bagitu dong bisa tumpa isi hati, deng
seng ada jarak par sambunyi apapa dari tata deng mama. Ada dua kalakuang yang
musti ditinggalkan para orang tua kalau mau membangun pertemanan deng anana di
rumah. Pertama, kalakuang kompeni, yakni kalakuang badiri tongka pinggang deng
cawaning di tangang yang saban kali biking anana gometar sampe bera karsang.
Kedua, kalakuang juru bayar, dimana asal anana datang tada tangang par kepeng
saja, lalu kasi kepeng seakan kewajiban sudah lunas. Untuk jadi tamang maka sala
satu syaratnya adalah memaksimalkan kualitas perjumpaan deng anana, dalang
waktu yang terbatas karna kasibukan. Prinsip dasar batamang adalah ator deng
accord sama-sama, dimana anana dapa hak par iko taru haluang yang baik par dong,
dalam suatu relasi partisipatif dan dialogis deng orang tatua. Salah satu tujuan dari
batamang adalah terbangunnya kepercayaan, yang dengannya orang tatua bisa dapa
slak par sama-sama tapis informasi yang bagara liar sondor nilai di dalang kota ini.
Deng cara batamang maka anana seng akan toro ka putar balakang par barbage
samua informasi yang dong dapa, termasuk bagemana mengelola satiap panggal
informasi itu. Entah itu informasi dari handphone, surat kabar, televisi, radio, internet,
sampe deng informasi tali hulaleng jurus bisi-bisi.
Laste, kalimat di atas paskali adalah sapanggal donci di oras beta pung masa anana.
Donci yang katong manyanyi deng gember malele sambil baku krep tangan di
kintal-kintal rumah, di straat negri, atau di tanusang ombak pukul-pukul. Donci
barmaeng dimana atoran-atoran permainan katong accord akang sama-sama, jadi
sapa biking salah musti tada hukuman sebagai sangsi sosial yang su accord. Donci
barmaeng yang memiliki nilai-nilai mister yang kantal, dan olehnya katong bisa laeng
inga-inga laeng, meski samua su talamburang di orang pung bendar deng gunung
tanah. Oras skarang ini beta taku jang donci itu diplesetkan jadi "Anana ucing
taguling-guling. Guling dorang deng felem porno. Saratus tagae narkoba...dua ratus
su tanang gaco, gaco, gaco, gaco". Konci rekeng beta mau tarewas par samua orang
tatua deng guru-guru, mari katong angka hati par Tuangala Seru Sekalian Alam, lalu
basahua "Sioh Tuangala'ee kas'jau akang dar katong pung anana ucing-ucing nih jua".
MASARIKU NETWORK
|
