Masariku Network, 24 Maret 2007
Popmal & ikon kusu
Tanggapan terhadap Victor Manuhutu
Oleh: Siake Manue
Kalo beta pung tamang Nyong Veky/Victor Manuhuttu "terpaksa" bergembira tagal
Maluku su pung ikon olahraga par Kusu (baca komentar Victor Manuhutu di Harian
Siwalima seminggu yang lalu), maka beta podo wae iko bergembira tapi zonder
"terpaksa". Beta pung hati snang skali tagal lia kapala Kusu jadi ikon Popmal (Pekan
Olahraga Provinsi Maluku). Hahahaee huraaa.
Ada dua hal yang biking beta dapa snang zonder 'terpaksa'.
Pertama, slak lia ikon Kusu, beta yakin oras pertandingan skang diator par malam
hari. Tagal itu beta bisa dapa waktu sagala hari par pi nonton abis lapas karja. Sapa
mau baku taru apalai, tapi tar mungkin pertandingan dibiking siang hari, sebab kalo
biking siang hari konci rekeng samua atlit deng official pasti ada dapa sono, macang
Kusu Potar sono siang-siang.
Kadua, deng biking pertandingan di malam hari iko Kusu pung tabiat, maka
perekonomian segmen papalele akan hotu nai, macang Kusu maraya nai batang
gondal. Beta akan bilang panitia pung jantong hati paling kukis pisang, kalo jadi
biking event Popmal par tenga malam iko Kusu pung oras basena. Betapa tidak, di
tenga malam akan perpanjang waktu papalele par garobak-garobak makanang dapa
kepeng ekstra. Dong akan datang deng palita-palita kanjoli sampe lampu storongkeng
par dudu basalep, bajualang makanang tenga malam. Suasana malam akan jadi
parsis kunang-kunang fronk utang di pulau Molana. Sopir-sopir oto mancari akang
dapa tamba kepeng par stor di juragang. Kalo ada yang sadiki arika, maka ikon
kapala Kusu akan dibiking jadi anapop-anapop kacil, dari bahan kaos kaki bakas
yang murah meriah. Balong lai kalo ada yang mau biking entertainment lomba
tembak Kusu deng sanapang angin. Bagitu jua oto-oto aer akan laku kras, karna bola
bale keku aer par sirang kincing Kusu, tagal kusu katong kanal sebage binatang yang
biasa kincing diri sandiri. Apalai kalo itu jenis kusu potar, yang bobou macang ampas
ela tada ujang panas. Memang panitia pung panta sak akan tarobe banya par bayar
listrik di seantero site event, tapi apa artinya itu kalo rakyat kacupeng bisa dapa
untung sadiki. Lagipula deng biking event tenga malang, rakyat batambong bisa pi
nonton. Pokoknya Nyong Veky'ee jang ale fikir Kusu jadi endorser par negri Malubeta
dolo. Lebe bae katong dua putar otak mau bajualang apa di tenga malam.
Soal cara bapili ikon Kusu, memang panitia Popmal su lebe maju par pake
tekhnologi. Tinggal klik program instant artist di computer, maka kapala Kusu su bisa
timbul gepe-gepe mata. Ini beda langit deng bumi waktu Maluku mau kirim kontingen
pertama kali iko Pekan Olahraga Nasional/PON II di Jakarta 1952. Waktu itu balong
ada KONI atau satupun induk organisasi olahraga. Kegiatan olahraga oras itu diatur
oleh Kantor P & K melalui Inspeksi Pendidikan Jasmani Wilayah IX, yang dipimpin
oleh paitua H.J. Kainama menggantikan opung Rajaguguk. Oom Henk Kainama deng
tamang-tamang pica otak mau care lambang par bandera kontingan. Tukang-tukang
gambar di bendar Ambon dikumpulkan par badati fikiran. Akhirnya ditetapkan gambar
cengke-pala diatas kaeng dasar biru sebagai bandera yang musti dipikol masu
Stadion Ikada di Gambir-Batavia.
Bandera yang melambangkan kekayaan Maluku di darat deng laut itu dipake lai par
PON III di Medan taong 1953 deng Pon IV di Makasar taong 1957. Menjelang Pon V
di Bandung taong 1962 tukang-tukang gambar di bendar Ambon kombali dapa
panggel bakumpul par biking bandera baru. Konci rekeng dong ambel kaputusang,
bahwa bandera dasar kaeng mera-itam deng logo Siwalima menjadi bandera baru
kontingen Maluku. Almarhum Yance Pattipawae, pemegang record cabang lempar
cakram di Indonesia (sampe oras tadi nih), dapa tunju par pasang dada tahang
bandera Maluku masu Stadiun Siliwangi-Bandung. Dasar kaeng mera-itam oras itu
dipilih tagal mau angka kler dominan pakiang kapitan, yang umumnya dipake di
Maluku. Kong itu par waktu yang panjang, mera deng itam slalu jadi kler favorit
pakaian dan asesoris anana kontingan Maluku, tagal dong rasa lebe kabaresi deng
jumawa par bertanding kalo pake kler itu.
Seng beda jau deng carita bandera kontingen Maluku, maka panitia Pekan Olahraga
Daerah/Porda I Maluku tentukan ikon pake jurus basahua toki gong. Tempo itu
komputer balong langgar di mimpi lai, jadi walikota Theo Manuputty selaku ketua
panitia penyelenggara di Kota Ambon coba biking sayembara. Konsep filosofis dan
nilai-nilai dasar Porda I ditetapkan panitia, lalu marinyo bajalang toki gong basahua
rakyat par iko sayembara biking ikon. Akang pung hasil, gambar Obor Pattimura
ditetapkan sebagai ikon Porda I taong 72.
Panitia Porda II di Ternate jua seng mau ilang muka. Taong 76 Bupati Mansyur selaku
ketua penyelenggara ambel jurus sayembara lai. Anana negri rame-rame bembeng
gamba par dinilai. Laste-laste gambar Kedaton Ternate deng tulisan Mari Moi di sabla
bawah, ditetapkan sebage ikon Porda II. Hal serupa jua dibiking pada event Porda III
taong 81 di Tual Maluku Tenggara. Cuma slak mau biking Porda IV di Masohi empat
taong kemudian, panitia takandas stadion balong siap, tagal kepeng talucu sadiki dari
gemeente di bendar Ambon.
Pembuatan setiap logo, maskot, ikon, slogan dan sejenisnya su tantu mencitrakan
sebuah pesan yang mau disampaikan, terkait dengan event olahraga dimaksud dan
locus tampa akang dibiking. Sebage bandingan, kalo manginte sadikit persiapan
olimpiade musim panas yang akan berlangsung di Beijing-Cina taong 2008, maka
dapa dipastikan bahwa pilihan logo, mascot, sampe deng slogan merupakan karja
karas putar otak par sampaikan berbagai pesan dari Cina. Logo olimpiade musim
panas Beijing berjudul 'Dancing Beijing'. Logo tersebut menggabungkan
elemen-elemen tradisional masyarakat Tiongkok pada sebuah stempel merah dengan
tulisan kaligrafi 'Jing' (ibukota nasional) dan fitur atletik. Presiden IOC Jacques Rogge
deng segra menangkap pesan yang mau disampaikan. Deng aer muka yang sangat
snang paitua bilang par ketua panitia, "Emblem Anda secara langsung membawa
keindahan yang mengagumkan dan kekuatan RRT yang diwujudkan melalui
kebudayaan dan warga Anda."
Selain logo maka dibuat juga 5 maskot olimpiade yang menggambarkan ikan, panda
raksasa, api, antelop Tibet dan burung layang-layang. Tiap-tiap maskot mewakili satu
dari lima cincin olimpiade. Nama kelima maskot tersebut jika digabungkan akan
membentuk kalimat yang berbunyi 'Beijing huanying ni" (Beijing menyambut anda).
Kalimat ini mengekspresikan kata 'fuwa/Pinyin' yang artinya ramah tamah.
Banding akang deng ikon Popmal maka beta bisa rai-rai kalo beberapa pesan mau
disampaikan panitia a/l: Musti jago matawana macang kusu, Musti jago balumpa
deng nai batang gondal macang Kusu, Seng bole bilang-bilang kata 'potar' kaseng jadi
Kusu, Batang idong musti jago baciong macang Kusu, Seng bole batembak Kusu
takaruang, dan laste seng bole kincing karsang macang Kusu kincing badang.
Kembali ke Kusu!, eh salah...mustinya kembali ke laptop menurut Tukul
Tagal lia ikon kusu maka beta tapancing par browsing endemic and native fauna of
Moluccas, dari berbagai site di dalang dunya maya. Par species jenis burung saja
beta bisa punggol samonti informasi tentang burung-burung yang amper cuma ada di
Maluku. Mulai dari Kakatua Jambul Orange (Moluccan Cockatoo/Cacatua
Moluccensis), Kakatua Tanimbar (Cacatua Goffiniana/Tanimbar Cockatoo), Tekukur
Buru (Buru Honeyeater), Beo Maluku (Moluccan Hanging Parrot), Beo Ambon (Ambon
King-Parrot/Alisterus Amboinensis), serta berbagai macang burung endemic yang
amper seng dapa akang di tampa laeng. Itu baru cuma burung. Balong lai deng
berbagai macang species endemic Maluku laengnya.
Cilakanya beta balong dapa species Kusu/Tarsius yang endemic Maluku. Species
Kusu endemic beta dapa lebe banya di Sumatera, Kalimantan, deng Sulawesi. Kong
itu beta harap panitia Popmal jua bisa tolong beta pung pencarian, par jelaskan
species Tarsius mana yang endemic dan native Maluku. Kalo seng maka beta jadi
curiga kalo panitia Popmal mau biking species baru dari genus Tarsius/Kusu deng
nama 'Tarsius Popmalensis'. Kalo sampe akang nama nih terdaftar di endemic fauna
encyclopedia, Encarta encyclopedia, atau Wikipedia encyclopedia, maka beta akan
balumpa dar pohon ka pohon di beta pung kintal, macang Kusu potar kasanangan
kupas kuli langsat di kabong tata Atju.
Perkembangan tekhnologi memang menawarkan ilmu harap gampang. Tagal itu beta
snang lia panitia Popmal bisa kembangkan ilmu itu, dalam proses pembuatan ikon
Kusu. Beta parcaya bahwa deng aplikasi ilmu harap gampang, maka par Popmal
berikut mangkali dong akang pake gambar Tusa, Tinggalong atau Kakarlak par jadi
ikon Popmal. Apalai kalo kakarlak su makang otak. Toh dalang dunya komputerisasi,
otak memang seng talalu parlu, tagal computer su ganti otak. Jadi kas'tinggal kong
computer fikir saja, sementara katong dudu kewel deng kopi sagalas di rumah kopi
Joas. Soal nyong Veky mau bilang ini jurus 'tiba saat tiba akal', dong seng dudu
pastiu. Apalai kalo Otohilo mau bilang 'ini slak biking dolo baru fikir', maka dong
akang manyau 'sapa mister deng koe!'. Kalopun nyong Veky mau malawang lebe jau,
paling-paling dong bilang 'os pi tanya computer jua, barang akang yang ator'.
Konci rekeng beta rai-rai saja kalo Kusu diambil par ikon Popmal, karna
memanfaatkan ilmu harap gampang. Termasuk satambong alasan di atas, yang beta
jua cuma rai-rai. Beta memang pung hak rai-rai, tagal penjelasan ikon Kusu seng
ditabaos par anana negri. Beda deng pilihan ikon yang dibiking dolo-dolo. Tempo itu
slak su tetapkan pilihan ikon, maka marinyo segra tabaos di seantero negri. Anana
negri bisa tau arti warna, gambar, tata letak, sampe deng biji banang yang dipakai par
sebuah pilihan ikon olahraga. Maski bagitu beta tetap snang zonder 'terpaksa', tagal
beta su tahu parsis mau bajualan apa di event Popmal. Topeng Kusu skang laku
kras, macang yang dipake pemeran Yoda di film Star Wars, yang di-released Century
Fox par taong 1977. Cuma saja beta musti kas'inga basudara di Karang Panjang.
Basudara yang pung pohong buah-buahan musti matawana par jaga akang, jang
sampe Kusus-Kusu Popmal bawarmus akang. Salamat berjuang para atlit Popmal.
Yang pasti ale dong bukang Kusu.
MASARIKU NETWORK
|
