Masariku Network, 24 Maret 2007
Spook
Oleh: Siake Manue
Par oras jam 14.00 tanggal 19 Januari 2007 beta coba hotu turun dari karang panjang
menuju ujung jambatang Batumerah. Bukan maksud beta mau beli kukis di
caca-caca Batu Merah, yg selalu ramai papalele berbagai jenis jajanan sore dalam
kas kaca. Beta kasitu iko hati pung balisah par liat spook 19 Januari 1999, yang
mangkali saja ada bajalang talamberang di jiku Mardika-Batumerah situ. Memang
dasar tanuar ada kasih bae, pas di muka bekas bioskop Victoria beta tacigi liat
saekor spook ada duduk lipat muka kasiang. Tanya punya tanya konci rekeng
memang dia ada gagartang, tagal jualan kalah laku deng tumpukan pisang epe dan
ampas tarigu made in Batumerah yang ada ramai dikerubutin pembeli. 'Beta memang
ada susah broer', spok berucap lirih. Beta pung jualan su tar laku, orang-orang seng
skeit deng akang lai. Bale muka jua sondor' lanjutnya terbata-bata. 'Ale memang
salah rekeng spook, kukis katagorang yang ale jual su jadi makanang pamali par
anana di bendar ini' beta coba menasehati. 'Anana su seng tamakang deng akang
pung kler dan bobou lai'. 'Lebe bae ale pi jua daripada duduk tarus disini, nanti panas
tikam pica bumbungan kapala'. Pelan-pelan beta lalu liat spook geser panta, badiri
dan mulai hotu masuk teluk Ambon, sambil hala dua kamboti pono kukis katagorang.
Spook pantas kecewa, karna anana seng tapancing katagorang par bakalae lai.
Harap-harap masih mendidih, ternyata dong su cakadidi satu deng laeng. Spook lupa
kalau anana negeri su dapa tau kalau dolo-dolo dong samua makang cabar, yang
merah ronanya menggincu kukis katagorang. Spook memang pantas kecewa karna
donci kukis katagorang su tabale jadi dendang sawat deng totobuang. Apalai anana
negeri semakin paham cara pasang sungga-sungga, par pele spook pung arika.
'Spook sudah basi karna anana su palasi!', ungkap tanta engge dari negeri Pelasona
Nanuroko.
Spook memang layak pergi, untuk tidak kembali lagi. Cuma saja kerna namanya
spook, maka ia ditakdirkan pergi untuk kembali. 'There's a lot of spook hanging on the
roof of bumbungan Baileo Negri oras skarang ini' ucap Matoke si cleaning service
baileo. 'Bukang itu saja, amper salalu dorang balumpa turun par barmaeng tutup
buka, hasen, kacong, enggo blek, mutel, dan bahkan gici-gici disitu. Beta sampe
mau patah blakang par slaber ruang-ruang badaki di baileo sagala hari' sergah Matoke
deng wer bersungut. 'Mangapa ale seng pasang plang saja disitu lalu tulis Forbidden
for Spook' tanya beta antusias. 'Bagaimana beta mau larang, kalau spook batamang
deng Staff Saniri Negri, sampe deng Marinyo' sanggah Matoke kapanasang. Segra
beta tapaku di tampa dengar Matoke sumbur bagitu. Amper lai beta loha cakalang
goreng yang baru talucu masuk gargantang di warung Ija. 'Apakah spook disitu jual
kukis katagorang juga?' selidik beta sambil mengingat saekor spook yang beta jumpa
di jiku Batumerah-Mardika tanggal 19 Januari kamareng. 'Jang salah tamang, spook
disitu seng bajualan kukis katagorang lai, tapi su papalele kadera katagorang' ucap
Matoke kecut.
Cerita Matoke cabar beta untuk hotu menuju Baileo dalam wer panas padis. Masuk
pintu Baileo beta skrek karna uap panas sumbur bakar kulit muka yang memang su
itang gampang. Atmosphere yang aneh untuk sebuah gedung yang disejuki aliran AC
central di seluruh ruangnya. Lebe tacigi lai ketika beta liat ratusan ekor spook ada
tikang krom barmaeng jumpalitan dari ruang ke ruang di Baileo. Memerah ceria rona
muka mereka pertanda hati seng lagi kasiang. Dari salah satu ruang beta dengar
hongi suara orang. Deng talinga tabadiri beta geser par manginte. Ternyata di ruang
itu, staff Saniri Negri batambong balapis ada urung Kadera Katagorang. Disampingnya
saekor spook tinggi besar badiri tegap, dalam balutan baniang manyala berbenang
emas. Deng aer muka sumringah dia batariak lelang gaya Amerika. Sementara
peserta lelang badiri baku injak kaki sampe jari mai biru balau bangka-bangka, karna
tampa seng kasih bae. Beta pung dalang hati balisah par mau sorong lebe kamuka
lai, maar akhirnya beta putuskan tapaku nonton di tampa saja. Kalau saniri negri su
baku injak kaki par iko lelang kadera katagorang, jang cega-cega garadus kacil
macam beta masuk tacampor. Bisa-bisa dong injak dari jari kaki sampe bumbungan
kapala.
Ternyata cerita Matoke batul. Di Baileo, Spook su bawa roll. Dulunya cuma papalele
kukis katagorang, skarang ini spok su naik klas jadi salesman kadera katagorang.
Spook rupanya su belajar banyak tentang trick bajualan di negri ini. Deng kursi
katagorang, spook seng perlu mulut basantan par tarewas koliling negri lai. Slak
datang taruh kadera di Baileo saja, anana negri akan katagorang sama orang kanal
sawang. Karnanya seng bisa skrek, kalau spook dapa slak par pegang roll di baileo
negri oras ini. Konci rekeng beta ambil keputusan segra tinggalkan Baileo. Sebelum
hela kaki kaluar pintu Baileo beta rasa ada tangan pegang beta pung balakang. Pas
putar leher par cartau, di blakang beta su badiri spook saekor, yang bakudapa beta di
jiku jambatang Batumerah tanggal 19 Januari lalu. Maar beda deng oras itu, skarang
dia pung muka su liat onosel. 'Tamang ada meku par kadera katagorang lai?'
tanyanya dalam nada baterek. 'Geser dari jalang kaluar jang beta tikang deng sungga'
jawab beta ketus, lalu talucu pi jauuuhhh paskali.
MASARIKU NETWORK
|
