Radio Baku Bae, 01-Mei-2007
Selamat Datang Rumah-Kopi "Sibu-Sibu"
Victor Manuhutu - Ambon
Kalo mo unju laga jang jadi Tatu, jadilah Bobara. (momo Otohilo)
Di kunci usbu minggu lalu, beta dudu di tapalang di bawah poster-poster Simon
Tahamata, Sonny Silooy, Jacob Sihasale dll lalu pikirang bajalang pontar di antara
donci-donci Hawaiian tempo dulu.
Beta jadi inga kata-kata Upu Kapitang Hawaiian, Beng Leiwakabessy, waktu ontua
mau hela kaeng par acara Potong Tema di Sibu-Sibu. Rumah Kopi Sibu-Sibu bukang
cuma jadi tampa par taru amanisal kahidopang maar akang jadi saksi momou betapa
hebat hasil karya anak-anak Maluku di seluruh dunya. Samua dapa lia akang di
poster-poster di dinding Sibu-Sibu.
Bukang itu saja, Sibu-Sibu kasi inga generasi kini tentang budaya bermusik orang
Maluku yang tinggi. Contoh, lagu-agu Kapanya band yang legendaris dengan selera
tinggi dimana personilnya pernah memainkan musik Maluku di era 70-an dari Ambon
sampe ka Singapore. Di Sibu-Sibu lagu-lagu Kapanya mengalun buju-buju badang.
Seng terasa air mata beta malele di jiku tapalang tagal obsesi selama 2 taong katong
uru palang-palang akang su jadi kenyataan yaitu rumah kopi khas Maluku pertama
Ambon.
Khas Maluku dalam segala hal mencerminkan jiwa haus yang menggelora tentang
cinta par akang negri ini. Khas Maluku molai dari Sibu-Sibu pung interior, akang pung
donci-donci masa lalu, akang pung poster-poster, akang pung makanang deng
minomang yang samua mewakili selera deng cita rasa orang Maluku.
Beta pung pikiran bajalang toro inga orang tatua dolo-dolo di negri Haria. Dong kalo
mancari ikang malang-malang, ka dong nai deng lampu di parao, ka dong kokahu, la
par user dinging deng kasi panas badang dong biasa minom kopi deng campuran
rempah Maluku. Beta jadi tapikir, mangapa kong seng bisa beta pake akang di
Sibu-Sibu? Mangapa kong ramuan orang tatua dolo-dolo beta seng pake kas tunju
tentang dong pung selera su tinggi sejak lama?
Timbangan berat maar inga momo Otohilo pung kata-kata par beta sama deng pilang
jatuh di batang leher. Apa Otohilo bilang? Sampe oras ini kata-kata itu masi
malayang di teng-tenga kapala.
Otohilo pung malayo par beta bagini; kalo mau unju laga, jang sama ikang Tatu maar
jadilah Bobara. Kalo os jadi Tatu, sadiki-sadiki la lari maso dalang lubang batu.
Sadiki-sadiki toro. Jadi Bobara yang seng pung tampa sambunyi. Maka dari itu jadilah
seperti seekor Bobara yang siap menantang.
Filosopi Bobara deng Tatu beta punggul dari Otohilo pung mulu karepu, seorang yang
buta huruf maar seng parnah buta hati dalam hal mengajari orang. Filosopi ini biking
kuat beta pung tulang balakang par kasi jadi obsesi rumah kopi Sibu-Sibu khas
Maluku.
Sibu-Sibu lalu campor ramuan Maluku dari orang tatua yang suka minom kopi waktu
mancari laut. Jadilah minoman khas Sibu-Sibu yang akang pung rasa laeng deng
yang ada. Seng parcaya? Coba sunsang akang Kopi Areng-Areng, Kopi Susu
Sibu-Sibu, Kopi Rarobang yang adalah minoman energi biking badang gargatang
apalai minom deng talor, siap par manyabong hrrrrnnggg.
Samua minomang ini akang baku tongka deng kukis-kukis khas Maluku sampe deng
pilihan koyabu gula, kasbi tone gula merah Ulath deng sinoli gula. Jang bilang itu
sagu lempeng, sagu gula, poporcis sampe akang pung brownis khas Amboina.
Samangat!
Caca Souisa, seorang hawaiianist kota Ambon seperti merasa muda kembali ketika
menikmati Kopi Rarobang saat ditemani petikan snar hawaiian Rudy Wairatta dalam
donci Haliwe March dan Honolulu March. Apalai ternyata karya Caca mengalun
lembut yaitu Rianti dan Lema-Lema dari Album Supel Group di tahun 80'an.
Usi Vivi Manuputty yang turut hadir waktu peresmian Sibu-Sibu terlihat matanya
berkaca-kaca ketika menonton video mereka bersama Siwalima ditahun 1987 ketika
melakukan kunjungan budaya ke Belanda tempo hari.
Ir Eddy Parera sampe tutup mata lalu menggoyangkan kepala dan kakinya ketika
Album Ambon Jazz Rock menggelitik dia tentang kenangan kota Makassar tempat
dia bersekolah dulu. Maka benarlah kata beta pung tamang yang turunan kasta
kakarlak, Reginald Price, old song always bring back old memories.
Sibu-Sibu su datang. Dia bukang angin bardaya maar dia angin sibu-sibu yang
mengalun lombo-lombo. Dia ibarat jojaro kaeng kabaya yang manari "meliuk" patah
tanjong. Dia ibarat lautan tado waktu balayar di tengah bulan terang. Dia gurih seperti
sagu Ambon.
Hail Buang Lansyik yang menyertai logo Sibu-Sibu menyiratkan pondasi kultural anak
negri untuk mempertahankan budayanya. Hail bagi orang Haria adalah rumah kacil
(rumah ucing) tampa jaga kabong. Jadi, Hail Buang Lansyik adalah tempat melepas
suntuk yang bernama Sibu-Sibu.
Sibu-Sibu di konsepkan untuk semua lapisan deng par keluarga ambel senang sambil
bernostalgia deng donci Ambon tempo dulu. Sibu-Sibu diharapkan mewakili citra dan
selera masyarakat Ambon yang berkelas. Salamat datang Sibu-Sibu Coffee Shop,
selamat memberikan nuansa baru di negeri tercinta ini. Waka Mena!
Menu Rumah Kopi Sibu-Sibu
Copyright © 2007 RadioBakuBae.com. All right reserved.
|
