Radio Vox Populi [Ambon], 02-Apr-2007
POPMAL SU ABIS, Beberapa Catatan Talapas
Oleh: Siake Manue
Beta musti buka tulisan ini deng bataria "Salamat lai voor basudara yang su iko
Popmal". Sebaliknya beta tar'perlu tarewas "Cueeeee" par user Kusu, sebab sampe
konci Popmal, seng saorang atlit lai yang jadi Kusu. Maski beta seng nonton samua
mata lomba, maar su tantu beta pung biji mata ada tarkira barita-barita di surat kabar
deng televisi. Baik itu berita-berita yang biking sajo hati, maupun berita yang biking
sasa ulu hati.
Beta mulai deng beberapa barita yang biking hati rasa sajo.
Di Popmal ini dong su tamba beberapa mata lomba yang biking orang smangat par
hotu pi nonton. Antara laeng baku tumbu/tinju parampuang deng baku balap motor. Di
Popmal ini lai dong su pake banya parkakas elektronik par biking haringan dong pung
karja. Taru contoh, papang bola basket su pake alat rekeng digital. Jadi bagmana
bola talucu masu, langsung score hotu nai deng otomatis.
Di Popmal ini jua beta snang lia opa-opa deng oma-oma mantan atlit Maluku
berprestasi, dipake par bembeng bandera deng lari obor Popmal. Bagitu lai Popmal ini
mencatat record pertama kali lomba olahraga di Maluku pake kuis par masyarakat.
Anana negri pung sanang alee, tagal cuma deng manyau dua soal gampang-gampang
lewat SMS saja, su bisa punggul motor di Upu Latu pung dalang kintal.
Su tantu maski beta pung hati rasa sajo, maar tetap saja ulu hati saki jua seng
sadiki. Akang saki bukang tagal beta mau banding Popmal deng Kejurnas atau PON,
tetapi ulu hati tacucu tagal beta banding deng jaman Porda, 30'an taong yang lalu.
Lebe tacucu lai kalo beta banding deng Porwil Iramasuka (Irian, Maluku, Sulawesi &
Kalimantan) yang dibiking di Ambon par taong 1973.
Oras Porda I mau dicikar di Ambon par taong 1972, seantero jiku bendar Ambon su
pono deng bandera-bandera sabuku memer dari kabupaten-kota. Orang-orang yang
rasa diri jago gambar su daftar diri par iko sayembara biking ikon Porda. Banding
deng tempo itu beta pung hati rasa tar'snang, tagal dimuka Popmal amper beta tar lia
bandera-bandera kabupaten-kota sapanggal alus lai yang dipasang dalang kota. Beta
seng tau mangapa. Beta rai-rai saja kalo dolo memang mungkin, tagal
penyelenggaraan Porda I dong kasi akang par Upu Latu Kota Ambon deng hulu
balangnya. Su tantu Upu Theo Manuputty tar mau ilang muka, kalo orang dapa lia
paitua pung Bendar Ambon tar siap par sambut kontingen-kotingen Porda. Beta rasa
kalo Popmal kamareng kasih akang par Upu Jop Papilaja deng Koni Kota Ambon,
mangkali kota pung muka lebe tarangka kapa'ee. Apalai katong su tau kalo Upu Koko
nih paling tingkai par jaga gengsi. Paitua tar suka biking apapa yang tar'model.
Contohnya pembukaan Porkot (Pekan Olahraga Kota Ambon), yang beta liat jauh
lebe manyala dar acara pembukaan Popmal (Pekan Olahraga Provinsi Maluku).
Catatan beta yang berikut tagae deng persiapan Stadion Mandala Remaja. Beta
tarkira di surat kabar, itu perbaikan stadion dibiking ancor lele paskali. Track and
field/lintasan lari deng lapangan yang bar'biking, balandong aer waktu ujang, lalo
bongkar biking batul lai. Slak bagitu, beta dengar kalo pengurus KONI Provinsi pung
hati mandidi, tagal konsultan deng kontraktor ator karja sondor konsultasi deng KONI.
Beta jadi inga waktu stadion itu mau dibangun menjelang PORWIL IRAMASUKA
taong 1973. Oras itu Upulatu Hasan Slamet tar mau ilang muka. Lak'laki manekad
tarabe sak par kas'datang konsultan tekhnis tetap KONI Pusat, yang biasa dipake par
manyimpang deng kas'batul Stadion Senayan di Jakarta. Antua pung nama Ir.
Purnomo yang karja di Dept PU Jakarta. Paitua kemudian datang dan karja masohi
deng Ir. Darto Sudarto, (Kakanwil PU Maluku oras itu) par tarkira pekerjaan
pembangunan Stadion Mandala Remaja. Pembangunan itu dikerjakan oleh PT
Pemalut, deng kontraktor Ence Benga. Saksi hidop pekerjaan itu ialah tata Zeth
Sahuburua (sebagai salah satu konsultan di PT Pemalut) yang sampe skarang masih
tinggal di dekat stadion itu.
Beta seng tau par kas'batul stadion itu di muka Popmal, apakah panitia ada pi diskusi
sadiki deng paitua Zeth ka'seng. Dengan demikian dong bisa tau gamutu barapa
kapala yang pake par lapis karikil deng tana di bawa lapangan itu. Atau juga dong
bisa dapa tau bagemana manyimpang pipa-pipa di bawah konstruksi lapangan, par
buang aer-aer yang su diisap oleh lapisan gamutu, karikil, tanah deng paser. Ini
balong termasuk soal stell lampu stadion, yang par waktu dolo saja Upu Hasan
Slamet su sewa tekhnisi dari perusahan Philips di Jakarta.
Deng bandingan di atas tantu saja beta seng skrek baca barita "biking la'bale bongkar
par biking batul" dimuka Popmal mau bajalang. Itu tagal pekerjaan dikontrakan par
konsultan deng kontraktor yang tar pung pengalaman spanggal lai di olahraga.
Laste-laste beta dengar kalo panitia gepe mati informasi, bahwa lintasan lari pung
panjang lebe 6,4 meter. Bapa kamponang jua, itu skang record-record lari deng jarak
400 meter ka'atas sebenarnya seng pake.
Catatan laeng lai, tagae deng pengumuman juara-juara. Beta lia final tinju di televisi
slak beta takajo, tagal pembagian madali biasa-biasa saja. 30 taong lalu mulai dari
devile kontingen sampe deng barbage madali, su pasti pohong talinga tabla dengar
musik khas dari masing-masing kabupaten-kota. Tempo itu jau-jau di muka Porda lai,
panitia su tagi lagu-lagu khas yang dipilih oleh tiap kabupaten-kota. Lagu-lagu itu
dong biking banya akang kong dibagi ke samua lokasi bertanding. Slak marinyo
pertandingan tabaos pembagian madali, langsung lagu-lagu babunyi iko urutan
madali. Balong lai Panglima Kodam parenta pasukan Korsik (Korps Musik) barmaeng
sagala hari, sampe mau pata pinggang tagal pikol perkakas musik sagala jam.
Pokoknya kontingen pung bulu nyawa badiri, deng samangat bertanding manyala
macang api obor tasirang bensin, slak dengar lagu-lagu khas dari daerahnya. Banding
skarang, beta rai-rai mangkali par Popmal ini dong manyanyi bisi-bisi saja, tagal
suara su abis par baku malawang deng bakalai.
Soal acara pembukaan Popmal yang talamburang sampe mic par Upu Latu talapas
ditabrak official Maluku Tenggara, beta kira tagal dong seng ator acara deng run
down/urut-urutan yang ta'ukur. Kumbali beta musti kas'inga kalo dolo waktu
pembukaan Porda atau Porwil Iramasuka, pengurus Koni bajalang rembeng-rembeng
buku puti Pedoman Penyelenggaraan Pekan Olahraga, yang dikeluarkan Koni Pusat
lewat Musornas. Di buku itu penyelenggaraan pembukaan pekan olahraga di-plot
hanya dua jam, deng urut-urutan yang detail. Setiap komponen acara ada
penanggung jawab. Sementara itu par beberapa komponen pada satu area yang
sama dong pasang saorang LO, yang berkoordinasi langsung melalui handy talkie ke
manager acara pembukaan. Kong itu selama pembukaan amper seng ada satu
komponen acara lai yang talpas dari run down design. Apalai sampe musti
kecolongan pengumuman pemenang dalang acara pembukaan yang biking official
mangamu, la tabrak mic di muka Upu Latu.
Hal laeng yang biking beta dapa senu waktu lia Ketua Harian Koni Provinsi Maluku,
kas'tau kalo seng ada istilah juara umum tapi pengumpul madali terbanyak. Beta
seng tau lak'laki punggul atorang ini di sapa pung jiku, karna dar dunya dolo sampe
skarang tadi nih samua orang su tau, bahwa istilah juara umum salalu dipake par
kontingen pengumpul emas terbanyak. Kumbali beta dapa taku jang sampe lak'laki
pake jurus permainan "Kusu kumpul biji gondal". Sbab kalo permainan itu memang
lak'laki seng ada lawaaan.
Satu perkara yang biking beta pung ulu hati paling ngilu adalah ketika membaca
satambong persengketaan, sampe baku pukul di lapangan antara official. Bapa-bapa
Bupati iko mangamu deng gartak mau kas'pulang madali la tarek kontingen pulang.
Lebe celaka lai baku tumbu yang terjadi antara sesama anggota Panpel. Balong lai
wasit-wasit yang mangamu tagal su abis karja maar balong dapa pese/kepeng. Su
tantu dolo-dolo hal-hal macang bagini ada alai, maar beta seng lia akang bagitu
satambong macang di Popmal ini. Sala satu sebab yang biking tacungkel perkara
bagini adalah loga-loganya kwalitas banyak wasit deng pelatih. Beta seng tau apakah
samua wasit yang ator mata lomba su punya sertifikat ka'balong.
Dolo-dolo sertifikat wasit merupakan syarat par ator lomba. Tagal itu mulai dari Upu
Latu Soemeru sampe Hasan Slamet, ada sekian banya wasit deng pelatih dikirim
kaluar par iko penataran, supaya bisa dapa sertifikat deng brevet sebage pelatih.
Sebaliknya juga deng biaya pemda banyak pengurus pusat cabang-cabang olahraga
dikontrak par menatar disini. Ambel contoh par cabang voley, Jopie Hehanussa deng
Leo Rolex pelatih tim nasional, dikontrak selama lebe kurang dua bulang par menatar
di Ambon. Oras Upu Hasan Slamet juga dibangun kerjasama deng IKIP Manado.
Melalui kerjasama itu didatangkan Drs Rambing selama satu bulang tare-tare par
menatar pelatih deng perwasitan, serta kas'kaluar sertifikat. Di jiku laeng par cabang
Pencak Silat, dong kas'datang Drs Arifin deng tamang-tamang dari PB IPSI par
menatar deng melatih pelatih. Deng bagitu pelatih-pelatih Silat bisa dapa sertifikat.
Memang dolo-dolo alokasi kepeng jua bukang perkara gampang par kas'datang
pelatih-pelatih nasional, atau par kirim pelatih daerah iko penataran di luar. Salah satu
amanisal dana olahraga dong dapat dari pembagian presentase Lotto Koni, yang oras
itu dibiking secara nasional par dukung dana pengembangan olahraga.
Dana APBD sandiri memang seng talalu basar par oras itu. Taru misal dalang taong
1975 dana APBD par olahraga hanya sebesar Rp 45 juta. Taong 76, Rp. 40 juta. Dan
taong 77 nai menjadi Rp 60 juta. Terobosan pendanaan dilakukan Upu Hasan Slamet
melalui program bapa angkat, par dukung setiap cabang olahraga. Bapa angkat
diambil dari amper semua kapala dinas, ditambah deng pengusaha-pengusaha yang
talamburang di Maluku. Tentang ini, cabang tinju Maluku perna punya seorang bapa
angkat yang sangat fenomenal dan dikenang sampe oras tadi nih. Namanya Hadi
Budoyo, yang waktu itu jadi kapala PT Mina Kartika di Ambon.
Deng paitua Hadi Budoyo cabang tinju Maluku berkembang pesat sekali dan merajai
emper seluruh kelas di tingkat nasional. Par oras itu Maluku pernah bapulang 9
madali emas deng 2 perak dari 11 kelas yang dipertandingkan di PON.
Beta kira model bapa angkat musti dihidupkan lai skarang ini oleh Upu Latu Maluku.
Terutama bapa angkat dari banya pengusaha deng kapala dinas. Deng bagitu bapa
angkat mangkali bisa diminta par sumbang madali deng tambah kepeng sadiki par
bayar wasit-wasit lai. Soalnya beta dengar kalo di Popmal ini panitia seng mampu par
bali madali, sampe dong baku kas'pinjang madali waktu pengumuman juara. Bagitu
lai deng wasit-wasit yang katanya ada badiri antre honor di Koni Provinsi sampe oras
tadi nih.
Laste beta mau bilang bahwa katong samua su tantu tar mau olahraga di Maluku
bajalang toro. Maluku pernah dikenal sebagai amanisal atlit nasional Indonesia.
Maluku peranakan banyak pelatih yang bekerja di berbagai provinsi maupun yang
berprofesi sebage pelatih nasional. Masa-masa mangkilat prestasi olahraga Maluku
adalah era sekitar taong 70 sampe 80-an. Di era itu Maluku pernah menempati
ranking ke-5 dalam jumlah pengumpulan madali di PON VIII taong 1973. Ampat orang
atlit hala madali emas waktu itu masing-masing: Nn Olla Renuf (lempar lembing), Nn
Lesnussa (atletik), Charles Thomas dan Wiem Gomies (tinju). Selain itu ada 5 orang
peraih perak deng 5 orang peraih perunggu.
Menjelang berakhirnya era 80-an prestasi olahraga di Maluku semakin menurun. Oras
itu memang telah bertambah semakin banya cabang olahraga yang dilombakan di
tingkat nasional, disamping bertambahnya jumlah provinsi yang iko PON. Selain itu
dunya olahraga Maluku tagoyang deng peristiwa pembajakan atlit-atlit berprestasi
Maluku oleh provinsi laeng. Meskipun Upu Hasan Slamet biking terobosan par
kas'masu beberapa atlit sebagai pegawai negri, maar banyak atlit yang putuskan
kas'tinggal negri, tagal dapa buju fasilitas deng pekerjaan yang dong seng dapa di
negri.
Banyak dari orang-orang yang pernah terlibat jaman kejayaan olahraga di Maluku di
era taong 70-80an, masih hidop sampe oras skarang ini. Sebut saja paitua Arie
Pariela, paitua Oties Manuputty, paitua Ony Wattimena, paitua Henky Gapersz,
mama De Siwabessy, dll. Dong bisa diminta kasi masukan setiap saat par Upu Latu
deng saluruh masnait, yang berkepentingan par kas maju olahraga di Maluku. Dong
tau parsis jaman aer nai aer turung perkembangan olahraga di Maluku. Dong jua
kanal paskali kalakuang kusu potar yang suka barampok amanisal, deng bisa biking
Upu mati langka par ator olahraga di Maluku, kalo Upu seng tarkira batul.
Kalo Upu Latu Soemeroe bisa kas'maju olahraga di Maluku, tagal paitua memang
bakas Kapala Pusat Pendidikan Jasmani Angkatan Darat di Bandung. Kalau Upu
Latu Hasan Slamet bisa tamba kas'maju olahraga di Maluku, karna paitua dikenal
sangat hobi olahraga deng kesenian. Dua-duanya bukang anana negri, dibanding
deng Upu Latu Kace yang ana negri tulen-tulen. Tagal itu beta sangat yakin bahwa
deng pica dada sebage ana negri, maka Upu Latu Kace bisa biking banya perkara
yang jau lebe hebat par perkembangan olahraga di Maluku. Cikar Upu, katong siap
par tohar kusu dan tongka Upu pung blakang.
Copyright © 2005 RadioVoxPopuli.com. All right reserved.
|
