Siwalima, 26 Maret 2007
Rumpu Sabuku Memer
Victor Manuhutu
Ill weeds grow fast (no name)
Bajalang ronda amper malam di kunci usbu biking hati snang sadiki. Beta pake
otopet saja sebab lombar pinang par slep beta su abis. Maklum beta manusia pekar
jadi musti ada yang tunda, kio, kalo seng beta katinggalan berita tentang beta pung
bendar kebanggaan. Hasil bajalang jingkal bendar la beta tulis kisah ini.
Ternyata tukang manyapu kintal dari kantor Walikota Ambon musti kasi pake dong
deng kaca mata tabal supaya dong bisa lia rumpu-rumpu koliling bendar Ambon.
Beta molai dari beta pung pinggir rumah. Beta nai oto langsung tancap gas 60 asap
itang iko blakang, oto maraya nai-nai Kudamati. Sampe di muka skolah STM, beta
skrek tagal rumpu sabuku memer dari taon sukun bulang gomu sampe oras ini masi
dudu pamalas sa. Sondor ada orang yang mau pi angka buang akang di alor.
Batul-batul paleng pamalas orang tukang manyapu dari kantor Walikota Ambon.
Sebuah mobil tua yang reyot, mogok dari zaman Majapahit, rusak dan dibiarkan
teronggok dari zaman kenek Gajah Mada, tidak ada usaha untuk menyingkirkannya.
Mobil demikian adalah sampah yang merusak pemandangan. No kalo seng mangarti
itu adalah sampah, kata melayu Ambon yang tepat untuk barang sejenis itu adalah
rumpu!
Bajalang tarus lewat Farmasi, dimuka SD, ada jalanan macet. Beta pung dalang
pikiran oto stop bajalang alias macet, sama di Batavia saja. Katong musti kasi
kesempatan par oto-oto sabla straat ambel bagiang kamuka, baru kong katong toma
palang-palang. Bagitu lewat kasana, lagi-lagi beta pung hati mangkal par Walikota
Ambon pung tukang manyapu rumpu. Laste-laste beta musti kasi kaluar kata; potar
dong tu, dong pung mata ada lai kaseng par lia akang rumpu sabuku memer
dipingging straat ini? Sampe biking straat macet bagitu.
Ternyata ada sebuah mobil sedan dibiarkan rusak terpakir di pinggir straat dari zaman
soldadu Dolan baku skot deng soldadu Japang. Yang beta heran, itu kapala tukang
manyapu dari kantor Walikota Ambon par sagala hari pulang bale diatas straat itu
maar hati pait seng ada.
Mobil sedan rusak dan dibiarkan terpakir diatas straat adalah sampah. Sampah
adalah rumpu dalang kintal. Apa kantor Walikota seng ada pung mobil Derek? Kalo
seng ada mobil Derek loko ambel oto Yunus ka oto Dominggus, pi hela lalu pi colo
akang oto sedan busu tu di jambatang Mardika. He-eh jua ni, rumpu dari zaman
soldadu Dolan baku skot deng soldadu Japang dong kasi tinggal macang deng
monument mangkali par orang Australia mau nonton akang.
Beta toma tarus, ka Batu Gantong, Waihaong trus ka AJ Patty. Sampe dimuka
kantor Walikota, lagi-lagi beta goyang kapala dua-dua tagal memang beta pung
kapala ada dua. Beta jadi seng abis pikir. Bagimana katorang mau biking barsih kaki
aer sementara kapala aer saja masi tetap kabor? Katorang tra bisa komentar birmang
pung kintal kotor tagal kintal Walikota sandiri kotor.
Itu mobil sampah "kelder" Afvalvefrwijdfring dari zaman Pattimura digantung di depan
Niew Victoria, masih tetap dibiarkan mencintai kantor Walikota Ambon. Kalo itu
"kelder" Afvalvefrwijdfring bisa stori dia pasti bilang; nasi bungkus dooo, beta su dapa
strap dari ujang sampe panas lalu su ujang ulang, beta su palau ni.
Mobil mogok seharusnya tidak dibiarkan terparkir berbulan-bulan didepan kantor
Walikota Ambon yang menjadi standar atau citra kebersihan kota Ambon. Mobil
mogok terparkir didepan kantor Walikota Ambon menjadi contoh buruk kebersihan
kota Ambon.
Sepertinya Walikota kita harus mencoba mengendarai mobil yang kemudian dibiarkan
mogok ditengah jalan, seng usah sampe kota besar di luar negeri, di Jakarta saja.
Batul oto batuk-batuk, apalai sampe mogok, eh oto Derek ribu-ribu su dudu urung.
Dong akan hela ale deng oto-oto la pi colo kamana jiku tagal ale dipikir sampah yang
akan menghalangi.
Oto "kelder" Afvalvefrwijdfring yang mogok berbulan-bulan adalah sampah yang
merusak pemandangan dan merusak citra kota Ambon.
Beta seng perlu berkomentar tentang kawasan slum Batu Merah maar kalo mau lia
impian kota Ambon yang bersih dan sejuk, layangkanlah pandangan anda ke
complex makam soldadu Australia. Itu mimpi kacupeng ditengah mimpi raksasa Ouw
tentang Ambon yang bersih.
Beta seng tau, apa kantor Walikota Ambon ada pung oto Derek. Kalaupun ada maka
perlu katong kasi fam par itu Derek supaya dia ada pung rasa malu par dia pung
Matarumah. Deng oto Derek banyak hal yang tukang manyapu dari kantor Walikota
bisa biking, diantaranya Derek akang oto-oto busu dari pinggir-pinggir straat di bendar
Ambon. Angka buang akang oto-oto busu tu di ujung tanjong biar jadi rumah par ikan
Saing-Saing, Lalosi deng Gotana.
Demikianlah ulasan radio tali hulaleng yang dibawakan oleh reporter anda yaitu
Otohilo. Katorang baku dapa ulang digelombang yang sama yaitu gelombang
taguling-guling yang dipancarkan dari ujung pohon Sureng. Otohilo putar donci
instrumental Hawaiian oleh George de Fretes, Pulau Ambon, amato par basudara
samua. Mena!
Copyright © Siwalima Ambon
|
