Return
to The marvels of Swift/Phonetic Burns
Robert
Burns
Tibbie Dunbar.
By Burns, Robert .
O, wilt thou go wi' me,
Sweet Tibbie Dunbar?
O, wilt thou go wi' me,
Sweet Tibbie Dunbar?
Wilt thou ride on a horse,
Or be drawn in a car,
Or walk by my side,
O sweet Tibbie Dunbar?
I care na thy daddie,
His lands and his money,
I care na thy kin
Sae high and sae lordly;
But say thou wilt ha'e me
For better for waur -
And come in thy coatie,
Sweet Tibbie Dunbar!
TOP
Coming Through The Rye.
By Burns, Robert .
Coming thro' the rye, poor body,
Coming thro' the rye,
She draiglet a' her petticoatie
Coming thro' the rye.
O, Jenny's a' wat, poor body;
Jenny's seldom dry;
She draiglet a' her petticoatie
Coming thro' the rye.
Gin a body meet a body
Coming thro' the rye,
Gin a body kiss a body -
Need a body cry?
Gin a body meet a body
Coming thro' the glen,
Gin a body kiss a body -
Need the warld ken?
TOP
John Anderson.
By Burns, Robert .
John Anderson, my jo John,
When we were first acquent
Your locks were like the raven,
Your bonnie brow was brent;
But now your brow is bald, John,
Your locks are like the snow;
But blessings on your frosty pow,
John Anderson my jo!
John Anderson, my jo John,
We clamb the hill thegither,
And mony a canty day, John,
We've had wi' ane anither:
Now we maun totter down, John,
But hand in hand we'll go,
And sleep thegither at the foot,
John Anderson my jo.
Red, Red Rose, A.
By Burns, Robert .
O my Luve's like a red, red rose
That's newly sprung in June;
O my Luve's like the melodie
That's sweetly played in tune.
As fair art thou, my bonnie lass,
So deep in luve am I;
And I will luve thee still, my dear,
Till a' the seas gang dry:
Till a' the seas gang dry, my dear,
And the rocks melt wi' the sun;
I will luve thee still, my dear,
While the sands o' life shall run.
And fare thee weel, my only Luve,
And fare thee weel awhile!
And I will come again, my Luve,
Tho' it ware ten thousand mile.
Up in the Morning Early.
By Burns, Robert .
Cauld blaws the wind frae east to west,
The drift is driving sairly;
Sae loud and shill 's I hear the blast,
I'm sure it 's winter fairly.
Up in the morning 's no for me,
Up in the morning early;
When a' the hills are cover'd wi' snaw,
I'm sure it is winter fairly.
The birds sit chittering in the thorn,
A' day they fare but sparely;
And lang 's the night frae e'en to morn,
I'm sure it 's winter fairly.
Up in the morning 's no for me,
Up in the morning early;
When a' the hills are cover'd wi' snaw,
I'm sure it is winter fairly.
Lament for Culloden.
By Burns, Robert .
The lovely lass o' Inverness,
Nae joy nor pleasure can she see;
For e'en and morn she cries, "Alas!"
And ay the saut tear blins her ee:
Drumossie moor -Drumossie day -
A waefu' day it was to me!
For there I lost my father dear,
My father dear, and brethren three.
Their winding-sheet the bluidy clay,
Their graves are growing green to see:
And by them lies the dearest lad
That ever blest a woman's ee!
Now wae to thee, thou cruel lord,
A bluidy man I trow thou be;
For mony a heart thou hast made sair
That ne'er did wrang to thine or thee.
Ye Banks and Braes O'Bonnie Doon.
By Burns, Robert .
Ye banks and braes o' bonnie Doon,
How can ye bloom sae fair!
How can ye chant, ye little birds,
And I sae fu' o' care!
Thou'll break my heart, thou bonnie bird
That sings upon the bough;
Thou minds me o' the happy days
When my fause Luve was true.
Thou'll break my heart, thou bonnie bird
That sings beside thy mate;
For sae I sat, and sae I sang,
And wist na o' my fate.
Aft hae I roved by bonnie Doon
To see the woodbine twine,
And ilka bird sang o' its love;
And sae did I o' mine.
Wi' lightsome heart I pu'd a rose
Frae aff its thorny tree;
And my fause luver staw the rose,
But left the thorn wi' me.
Scots, Wha Hae Wi' Wallace Bled.
By Burns, Robert .
Scots, wha hae wi' Wallace bled,
Scots, wham Bruce has aften led,
Welcome to your gory bed,
Or to victory!
Now's the day, and now's the hour;
See the front o' battle lour,
See approach proud Edward's power -
Chains and slavery!
Wha will be a traitor-knave?
Wha can fill a coward's grave?
Wha sae base as be a slave?
Let him turn and flee!
Wha for Scotland's king and law
Freedom's sword will strongly draw,
Freeman stand or freeman fa',
Let him follow me!
By oppression's woes and pains,
By your sons in servile chains,
We will drain our dearest veins,
But they shall be free!
Lay the proud usurpers low!
Tyrants fall in ev'ry foe!
Liberty's in ev'ry blow!
Let us do or die!
Lassie Wi' the Lint-White Locks.
By Burns, Robert .
Lassie wi' the lint-white locks,
Bonie lassie, artless lassie!
Wilt thou wi' me tent the flocks?
Wilt thou be my dearie, O?
Now Nature cleeds the flowery lea,
And a' is young and sweet like thee;
O, wilt thou share its joys wi' me,
And say thou'lt be my dearie, O?
And when the welcome simmer shower
Has cheered ilk drooping little flower,
We'll to the breathing woodbine bower
At sultry noon, my dearie, O.
When Cynthia lights, wi' silver ray,
The weary shearer's hameward way,
Through yellow waving fields we'll stray,
And talk o' love, my dearie, O.
And when the howling wintry blast
Disturbs my lassie's midnight rest,
Enclasped to my faithful breast,
I'll comfort thee, my dearie, O.
Bonnie Lesley.
By Burns, Robert .
O saw ye bonnie Lesley
As she gaed o'er the Border?
She's gane, like Alexander,
To spread her conquests farther.
To see her is to love her,
And love but her for ever;
For Nature made her what she is,
And ne'er made sic anither!
Thou art a queen, fair Lesley,
Thy subjects we, before thee;
Thou art divine, fair Lesley,
The hearts o' men adore thee.
The Deil he could'na scaith thee,
Or aught that wad belang thee;
He'd look into thy bonnie face,
And say "I canna wrang thee!"
The Powers aboon will tent thee;
Misfortune sha'na steer thee;
Thou'rt like themsel' sae lovely
That ill they'll ne'er let near thee.
Return again, fair Lesley,
Return to Caledonie!
That we may brag we hae a lass
There's nane again sae bonnie!
My Heart's in the Highlands.
By Burns, Robert .
Farewell to the Highlands, farewell to the North,
The birth-place of Valour, the country of Worth;
Wherever I wander, wherever I rove,
The hills of the Highlands for ever I love.
My heart's in the Highlands, my heart is not here;
My heart's in the Highlands a-chasing the deer;
A-chasing the wild-deer, and following the roe,
My heart's in the Highlands wherever I go.
Farewell to the mountains high covered with snow;
Farewell to the straths and green valleys below;
Farewell to the forests and wild-hanging woods;
Farewell to the torrents and loud-pouring floods.
My heart's in the Highlands, my heart is not here;
My heart's in the Highlands a-chasing the deer;
A-chasing the wild-deer, and following the roe,
My heart's in the Highlands wherever I go.
Mary Morison.
By Burns, Robert .
O Mary, at thy window be,
It is the wished, the trysted hour!
Those smiles and glances let me see,
That make the miser's treasure poor:
How blythely wad I bide the stour,
A weary slave frae sun to sun,
Could I the rich reward secure,
The lovely Mary Morison.
Yestreen, when to the trembling string
The dance gaed thro' the lighted ha',
To thee my fancy took its wing,
I sat, but neither heard nor saw:
Tho' this was fair, and that was braw,
And yon the toast of a' the town,
I sighed, and said amang them a',
"Ye are na Mary Morison."
O Mary, canst thou wreck his peace
Wha for thy sake wad gladly dee?
Or canst thou break that heart of his,
Whose only faut is loving thee?
If love for love thou wilt na gie,
At least be pity to me shown;
A thought ungentle canna be
The thought o' Mary Morison.
Fareweel To A'Our Scottish Fame.
By Burns, Robert .
Fareweel to a' our Scottish fame,
Fareweel our ancient glory;
Fareweel ev'n to the Scottish name,
Sae famed in martial story!
Now Sark rins over Solway sands,
And Tweed rins to the ocean,
To mark where England's province stands -
Such a parcel of rogues in a nation!
What force or guile could not subdue
Thro' many warlike ages,
Is wrought now by a coward few,
For hireling traitor's wages.
The English steel we could disdain,
Secure in valour's station;
But English gold has been our bane -
Such a parcel of rogues in a nation!
O, would or I had seen the day
That treason thus could sell us,
My auld grey head had lien in clay
Wi' Bruce and loyal Wallace!
But pith and power, till my last hour,
I'll mak this declaration:
We're bought and sold for English gold -
Such a parcel of rogues in a nation!
Ae Fond Kiss, and then We Sever.
By Burns, Robert .
Ae fond kiss, and then we sever;
Ae fareweel, and then for ever!
Deep in heart-wrung tears I'll pledge thee,
Warring sighs and groans I'll wage thee.
Who shall say that Fortune grieves him
While the star of hope she leaves him?
Me, nae cheerful twinkle lights me,
Dark despair around benights me.
I'll ne'er blame my partial fancy;
Naething could resist my Nancy;
But to see her was to love her,
Love but her, and love for ever.
Had we never loved sae kindly,
Had we never loved sae blindly,
Never met -or never parted,
We had ne'er been broken-hearted.
Fare thee weel, thou first and fairest!
Fare thee weel, thou best and dearest!
Thine be ilka joy and treasure,
Peace, enjoyment, love, and pleasure!
Ae fond kiss, and then we sever;
Ae fareweel, alas, for ever!
Deep in heart-wrung tears I'll pledge thee,
Warring sighs and groans I'll wage thee.
Jean.
By Burns, Robert .
Of a' the airts the wind can blaw
I dearly like the West,
For there the bonnie lassie lives,
The lassie I lo'e best:
There wild woods grow, and rivers row,
And mony a hill between;
But day and night my fancy's flight
Is ever wi' my Jean.
I see her in the dewy flowers,
I see her sweet and fair;
I hear her in the tunefu' birds,
I hear her charm the air:
There's not a bonnie flower that springs
By fountain, shaw, or green,
There's not a bonnie bird that sings
But minds me o' my Jean.
O blaw ye westlin winds, blaw saft
Amang the leafy trees;
Wi' balmy gale, frae hill and dale
Bring hame the laden bees;
And bring the lassie back to me
That's ay sae neat and clean;
Ae smile o' her wad banish care,
Sae charming is my Jean.
What sighs and vows amang the knowes
Hae passed atween us twa!
How fond to meet, how wae to part
That night she gaed awa!
The Powers aboon can only ken,
To whom the heart is seen,
That nane can be sae dear to me
As my sweet lovely Jean!
Highland Mary.
By Burns, Robert .
Ye banks and braes and streams around
The castle o' Montgomery,
Green be your woods, and fair your flowers,
Your waters never drumlie!
There simmer first unfauld her robes,
And there the langest tarry;
For there I took the last fareweel
O' my sweet Highland Mary.
How sweetly bloomed the gay green birk,
How rich the hawthorn's blossom,
As underneath their fragrant shade
I clasped her to my bosom!
The golden hours on angel wings
Flew o'er me and my dearie;
For dear to me as light and life
Was my sweet Highland Mary.
Wi' mony a vow and locked embrace
Our parting was fu' tender;
And, pledging aft to meet again,
We tore oursels asunder;
But, O, fell Death's untimely frost,
That nipt my flower sae early!
Now green's the sod, and cauld's the clay,
That wraps my Highland Mary!
O pale, pale now, those rosy lips
I aft hae kissed sae fondly;
And closed for aye the sparkling glance
That dwelt on me sae kindly;
And mouldering now in silent dust
That heart that lo'ed me dearly!
But still within my bosom's core
Shall live my Highland Mary.
Charlie he's my darling.
By Burns, Robert .
'Twas on a Monday morning,
Right early in the year,
That Charlie cam to our town,
The young Chevalier. -
CHORUS
An Charlie he 's my darling, my darling, my darling,
Charlie he 's my darling, the young Chevalier. -
As he was walking up the street,
The city for to view,
O there he spied a bonie lass
The window looking thro'. -
An Charlie he 's my darling, my darling, my darling,
Charlie he 's my darling, the young Chevalier. -
Sae light 's he jimped up the stair,
And tirled at the pin;
And wha sae ready as hersel
To let the laddie in. -
An Charlie he 's my darling, my darling, my darling,
Charlie he 's my darling, the young Chevalier. -
He set his Jenny on his knee,
All in his Highland dress;
For brawlie weel he ken'd the way
To please a bonie lass. -
An Charlie he 's my darling, my darling, my darling,
Charlie he 's my darling, the young Chevalier. -
It's up yon hethery mountain,
And down yon scroggy glen,
We daur na gang a milking,
For Charlie and his men. -
An Charlie he 's my darling, my darling, my darling,
Charlie he 's my darling, the young Chevalier. -
Auld Lang Syne.
By Burns, Robert .
Should auld acquaintance be forgot,
And never brought to mind?
Should auld acquaintance be forgot,
And auld lang syne?
For auld lang syne, my dear,
For auld lang syne,
We'll tak a cup o' kindness yet,
For auld lang syne.
And surely ye'll be your pint-stowp,
And surely I'll be mine!
And we'll tak a cup o' kindness yet,
For auld lang syne.
For auld lang syne, my dear,
For auld lang syne,
We'll tak a cup o' kindness yet,
For auld lang syne.
We twa hae run about the braes,
And pu'd the gowans fine;
But we've wandered mony a weary fit
Sin' auld lang syne.
For auld lang syne, my dear,
For auld lang syne,
We'll tak a cup o' kindness yet,
For auld lang syne.
We twa hae paidled i' the burn,
Frae morning sun till dine;
But seas between us braid hae roared
Sin' auld lang syne.
For auld lang syne, my dear,
For auld lang syne,
We'll tak a cup o' kindness yet,
For auld lang syne.
And there's a hand, my trusty fiere,
And gie's a hand o' thine!
And we'll tak a right guid-willie waught
For auld lang syne.
For auld lang syne, my dear,
For auld lang syne,
We'll tak a cup o' kindness yet,
For auld lang syne.
Afton Water.
By Burns, Robert .
Flow gently, sweet Afton, among thy green braes!
Flow gently, I'll sing thee a song in thy praise!
My Mary's asleep by thy murmuring stream, -
Flow gently, sweet Afton, disturb not her dream!
Thou stock-dove whose echo resounds through the glen,
Ye wild whistling blackbirds in yon thorny den,
Thou green-crested lapwing, thy screaming forbear, -
I charge you, disturb not my slumbering fair!
How lofty, sweet Afton, thy neighbouring hills,
Far-marked with the courses of clear-winding rills!
There daily I wander, as noon rises high,
My flocks and my Mary's sweet cot in my eye.
How pleasant thy banks and green valleys below,
Where wild in the woodlands the primroses blow!
There oft, as mild evening weeps over the lea,
The sweet-scented birk shades my Mary and me.
Thy crystal stream, Afton, how lovely it glides,
And winds by the cot where my Mary resides!
How wanton thy waters her snawy feet lave,
As gath'ring sweet flowerets she stems thy clear wave!
Flow gently, sweet Afton, among thy green braes!
Flow gently, sweet river, the theme of my lays!
My Mary's asleep by thy murmuring stream, -
Flow gently, sweet Afton, disturb not her dream!
O whistle, and I'll come to ye, my lad.
By Burns, Robert .
O whistle, and I'll come to ye, my lad,
O whistle, and I'll come to ye, my lad;
Tho' father, and mother, and a 'should gae mad,
Thy Jeanie will venture wi' ye, my lad.
But warily tent, when ye come to court me,
And come nae unless the back-yett be a-jee;
Syne up the back-style and let naebody see,
And come as ye were na comin to me -
And come as ye were na comin to me -
O whistle, and I'll come to ye, my lad,
O whistle, and I'll come to ye, my lad;
Tho' father, and mother, and a 'should gae mad,
Thy Jeanie will venture wi' ye, my lad.
At kirk, or at market whene'er ye meet me,
Gang by me as tho' that ye car'd nae a flie;
But steal me a blink o' your bonie black e'e,
Yet look as ye were na lookin at me -
Yet look as ye were na lookin at me -
O whistle, and I'll come to ye, my lad,
O whistle, and I'll come to ye, my lad;
Tho' father, and mother, and a 'should gae mad,
Thy Jeanie will venture wi' ye, my lad.
Ay vow and protest that ye care na for me,
And whyles ye may lightly my beauty a wee;
But court nae anither, tho' jokin ye be,
For fear that she wyle your fancy frae me -
For fear that she wyle your fancy frae me -
Duncan Gray.
By Burns, Robert .
Duncan Gray cam here to woo,
Ha, ha, the wooing o't,
On blythe Yule Night when we were fu',
Ha, ha, the wooing o't,
Maggie coost her head fu' high,
Looked asklent and unco skeigh,
Gart poor Duncan stand abeigh;
Ha, ha, the wooing o't.
Duncan fleeched, and Duncan prayed;
Ha, ha, the wooing o't,
Meg was deaf as Ailsa Craig;
Ha, ha, the wooing o't,
Duncan sighed baith out and in,
Grat his een baith bleer't and blin',
Spak o' lowpin ower a linn;
Ha, ha, the wooing o't.
Time and Chance are but a tide,
Ha, ha, the wooing o't,
Slighted love is sair to bide,
Ha, ha, the wooing o't,
Shall I, like a fool, quoth he,
For a haughty hizzie dee?
She may gae to -France for me!
Ha, ha, the wooing o't.
How it comes let Doctors tell,
Ha, ha, the wooing o't,
Meg grew sick as he grew hale,
Ha, ha, the wooing o't,
Something in her bosom wrings,
For relief a sigh she brings;
And O her een, they spak sic things!
Ha, ha, the wooing o't.
Duncan was a lad o' grace,
Ha, ha, the wooing o't,
Maggie's was a piteous case,
Ha, ha, the wooing o't,
Duncan could na be her death,
Swelling Pity smoored his Wrath;
Now they're crouse and canty baith,
Ha, ha, the wooing o't.
TOP
For a' that and a' that.
By Burns, Robert .
Is there, for honest Poverty
That hings his head, and a' that;
The coward-slave, we pass him by,
We dare be poor for a' that!
For a' that, and a' that,
Our toils obscure, and a' that,
The rank is but the guinea's stamp,
The Man 's the gowd for a' that. -
What though on hamely fare we dine,
Wear hoddin grey, and a' that.
Gie fools their silks, and knaves their wine,
A Man 's a Man for a' that.
For a' that, and a' that;
Their tinsel show, and a' that;
The honest man, though e'er sae poor,
Is king o' men for a' that. -
Ye see yon birkie ca'd, a lord,
Wha struts, and stares, and a' that,
Though hundreds worship at his word,
He's but a coof for a' that.
For a' that, and a' that,
His ribband, star and a' that,
The man of independent mind,
He looks and laughs at a' that. -
A prince can mak a belted knight,
A marquis, duke, and a' that;
But an honest man 's aboon his might,
Gude faith he mauna fa' that!
For a' that, and a' that,
Their dignities, and a' that,
The pith o' Sense, and pride o' Worth,
Are higher rank than a' that. -
Then let us pray that come it may,
As come it will for a' that,
That Sense and Worth, o'er a' the earth
Shall bear the gree, and a' that.
For a' that, and a' that,
It's comin yet for a' that,
That Man to Man the warld o'er,
Shall brothers be for a' that. -
To a Louse.
By Burns, Robert .
ON SEEING ONE ON A LADY'S BONNET AT CHURCH
Ha! whare ye gaun, ye crowlin ferlie!
Your impudence protects you sairly:
I canna say but ye strunt rarely
Owre gauze and lace;
Tho' faith, I fear ye dine but sparely
On sic a place.
Ye ugly, creepin, blastit wonner,
Detested, shunned by saunt an' sinner,
How daur ye set your fit upon her,
Sae fine a lady!
Gae somewhere else and seek your dinner,
On some poor body.
Swith, in some beggar's haffet squattle;
There ye may creep, and sprawl, and sprattle
Wi' ither kindred, jumpin cattle,
In shoals and nations;
Whare horn or bane ne'er daur unsettle
Your thick plantations.
Now haud ye there, ye're out o' sight,
Below the fatt'rels, snug an' tight;
Na faith ye yet! ye'll no be right
Till ye've got on it,
The vera tapmost, towering height
O' Miss's bonnet.
My sooth! right bauld ye set your nose out,
As plump an' grey as onie grozet:
O for some rank, mercurial rozet,
Or fell, red smeddum,
I'd gie ye sic a hearty dose o't,
Wad dress your droddum!
I wad na been surprised to spy
You on an auld wife's flainen toy;
Or aiblins some bit duddie boy,
On's wyliecoat;
But Miss's fine Lunardi! -fie!
How daur ye do't?
O Jenny, dinna toss your head,
An' set your beauties a' abread!
Ye little ken what cursed speed
The blastie's makin!
Thae winks and finger-ends, I dread,
Are notice takin!
O, wad some Power the giftie gie us
To see oursels as others see us!
It wad frae monie a blunder free us
An' foolish notion:
What airs in dress an' gait wad lea'e us,
And ev'n Devotion!
To a Mouse.
By Burns, Robert .
On Turning her up in her Nest with the Plough
Wee, sleekit, cow'rin', tim'rous beastie,
O what a panic's in thy breastie!
Thou need na start awa sae hasty,
Wi' bickering brattle!
I wad be laith to rin an' chase thee
Wi' murd'ring pattle!
I'm truly sorry man's dominion
Has broken nature's social union,
An' justifies that ill opinion
Which makes thee startle
At me, thy poor earth-born companion,
An' fellow-mortal!
I doubt na, whiles, but thou may thieve;
What then? poor beastie, thou maun live!
A daimen-icker in a thrave
'S a sma' request:
I'll get a blessin' wi' the lave,
And never miss't!
Thy wee bit housie, too, in ruin!
Its silly wa's the win's are strewin':
And naething, now, to big a new ane,
O' foggage green!
An' bleak December's winds ensuin'
Baith snell an' keen!
Thou saw the fields laid bare and waste
An' weary winter comin' fast,
An' cozie here, beneath the blast,
Thou thought to dwell,
Till, crash! the cruel coulter past
Out thro' thy cell.
That wee bit heap o' leaves an' stibble
Has cost thee mony a weary nibble!
Now thou's turned out, for a' thy trouble,
But house or hald,
To thole the winter's sleety dribble
An' cranreuch cauld!
But, Mousie, thou art no thy lane
In proving foresight may be vain:
The best laid schemes o' mice an' men
Gang aft a-gley,
An' lea'e us nought but grief an' pain,
For promised joy.
Still thou art blest, compared wi' me!
The present only toucheth thee:
But, oh! I backward cast my e'e
On prospects drear!
An' forward, tho' I canna see,
I guess an' fear!
To a Mountain Daisy.
By Burns, Robert .
ON TURNING ONE DOWN WITH THE PLOUGH, IN APRIL, 1786
Wee, modest, crimson-tipped flow'r,
Thou's met me in an evil hour;
For I maun crush amang the stoure
Thy slender stem:
To spare thee now is past my pow'r,
Thou bonie gem.
Alas! it's no thy neebor sweet,
The bonie lark, companion meet,
Bending thee 'mang the dewy weet,
Wi' spreckled breast!
When upward-springing, blithe, to greet
The purpling east.
Cauld blew the bitter-biting north
Upon thy early, humble birth;
Yet cheerfully thou glinted forth
Amid the storm,
Scarce reared above the parent-earth
Thy tender form.
The flaunting flow'rs our gardens yield,
High shelt'ring woods and wa's maun shield;
But thou, beneath the random bield
O' clod or stane,
Adorns the histie stibble-field,
Unseen, alane.
There, in thy scanty mantle clad,
Thy snawy bosom sunward spread,
Thou lifts thy unassuming head
In humble guise;
But now the share uptears thy bed,
And low thou lies!
Such is the fate of artless Maid,
Sweet flow'ret of the rural shade!
By love's simplicity betrayed,
And guileless trust,
Till she, like thee, all soiled, is laid
Low i' the dust.
Such is the fate of simple Bard,
On Life's rough ocean luckless starred!
Unskilful he to note the card
Of prudent lore,
Till billows rage, and gales blow hard,
And whelm him o'er!
Such fate to suffering worth is giv'n,
Who long with wants and woes has striv'n,
By human pride or cunning driv'n
To mis'ry's brink,
Till wrenched of ev'ry stay but Heav'n,
He, ruined, sink!
Ev'n thou who mourn'st the Daisy's fate,
That fate is thine -no distant date;
Stern Ruin's ploughshare drives, elate,
Full on thy bloom,
Till crushed beneath the furrow's weight,
Shall be thy doom!
John Barleycorn.
By Burns, Robert .
There were three kings into the east,
Three kings both great and high,
An' they hae sworn a solemn oath
John Barleycorn should die.
They took a plough and ploughed him down,
Put clods upon his head;
An' they hae sworn a solemn oath
John Barleycorn was dead.
But the cheerfu' spring came kindly on,
And show'rs began to fall;
John Barleycorn got up again,
And sore surprised them all.
The sultry suns of summer came,
And he grew thick and strong;
His head weel armed wi' pointed spears,
That no one should him wrong.
The sober autumn entered mild,
When he grew wan and pale;
His bending joints and drooping head
Showed he began to fail.
His colour sickened more and more,
He faded into age;
And then his enemies began
To show their deadly rage.
They've ta'en a weapon long and sharp,
And cut him by the knee;
Then tied him fast upon a cart,
Like a rogue for forgerie.
They laid him down upon his back,
And cudgelled him full sore;
They hung him up before the storm,
And turned him o'er and o'er.
They filled up a darksome pit
With water to the brim;
They heaved in John Barleycorn,
There let him sink or swim.
They laid him out upon the floor,
To work him farther woe,
And still, as signs of life appeared,
They tossed him to and fro.
They wasted, o'er a scorching flame,
The marrow of his bones;
But a miller used him worst of all,
For he crushed him 'tween two stones.
And they hae ta'en his very heart's blood,
And drank it round and round;
And still the more and more they drank,
Their joy did more abound.
John Barleycorn was a hero bold,
Of noble enterprise;
For if you do but taste his blood,
'Twill make your courage rise;
'Twill make a man forget his woe;
'Twill heighten all his joy:
'Twill make the widow's heart to sing,
Tho' the tear were in her eye.
Then let us toast John Barleycorn,
Each man a glass in hand;
And may his great posterity
Ne'er fail in old Scotland!
Address to the Unco Guid.
By Burns, Robert .
O ye wha sae guid yoursel,
Sae pious and sae holy,
Ye've nought to do but mark and tell
Your neebour's fauts and folly!
Whase life is like a weel-gaun mill,
Supplied wi'store o'water,
The heapet happer's ebbing still,
And still the clap plays clatter.
Hear me, ye venerable Core,
As counsel for poor mortals,
That frequent pass douce Wisdom's door
For glaikit Folly's portal's;
I, for their thoughtless, careless sakes,
Would here propone defences,
Their donsie tricks, their black mistakes,
Their failings and mischances.
Ye see your state wi'theirs compared,
And shudder at the niffer;
But cast a moment's fair regard
What maks the mighty differ?
Discount what scant occasion gave,
That purity ye pride in,
And (what's aft mair than a' the lave)
Your better art of hiding.
Think, when your castigated pulse
Gies now and then a wallop,
What ragings must his veins convulse,
That still eternal gallop:
Wi'wind and tide fair i'your tail,
Right on ye scud your sea-way;
But in the teeth o'baith to sail,
It mads an unco leeway.
See Social-life and Glee sit down,
All joyous and unthinking,
Till, quite transmugrified, they're grown
Debauchery and Drinking:
O would they stay to calculate
The eternal consequences;
Or your more dreaded hell to state,
Damnation of expenses!
Ye high, exalted, virtuous Dames,
Tied up in godly laces,
Before ye gie poor Frailty names,
Suppose a change o'cases;
A dear-loved lad, convenience snug,
A treacherous inclination-
But, let me whisper I' your lug,
Ye're aiblins nae temptation.
Then gently scan your brother Man,
Still gentler sister Woman;
Though they may gang a kennin wrang,
To step aside is human:
One point must still be greatly dark,
The moving Why they do it:
And just as lamely can ye mark,
How far perhaps they rue it.
Who made the heart, 'tis He alone
Decidedly can try us,
He knows each chord, its various tone,
Each spring, its various bias:
Then at the balance let's be mute,
We never can adjust it;
What's done we partly may compute,
But know not what's resisted.
TOP
Tam O'Shanter.
By Burns, Robert .
A Tale
"Of Brownyis and of Bogilis full is this Buke." -Gawin Douglas.
When chapman billies leave the street,
And drouthy neebors neebors meet,
As market-days are wearing late,
An' folk begin to tak' the gate;
While we sit bousing at the nappy,
An' getting fou and unco happy,
We think na on the lang Scots miles,
The mosses, waters, slaps, and stiles,
That lie between us and our hame,
Whare sits our sulky, sullen dame,
Gathering her brows like gathering storm,
Nursing her wrath to keep it warm.
This truth fand honest Tam o'Shanter,
As he frae Ayr ae night did canter,
(Auld Ayr, wham ne'er a town surpasses,
For honest men and bonie lasses).
O Tam! hadst thou but been sae wise,
As ta'en thy ain wife Kate's advice!
She tauld thee weel thou was a skellum,
A blethering, blustering, drunken blellum,
That frae November till October,
Ae market-day thou was nae sober;
That ilka melder, wi' the miller,
Thou sat as lang as thou had siller;
That ev'ry naig was ca'd a shoe on,
The smith and thee gat roarin fou on;
That at the Lord's house, ev'n on Sunday,
Thou drank wi' Kirkton Jean till Monday.
She prophesied that, late or soon,
Thou would be found deep drowned in Doon;
Or catched wi' warlocks in the mirk,
By Alloway's auld haunted kirk.
Ah, gentle dames! it gars me greet,
To think how mony counsels sweet,
How mony lengthened sage advices,
The husband frae the wife despises!
But to our tale: Ae market-night,
Tam had got planted unco right;
Fast by an ingle, bleezing finely,
Wi' reaming swats, that drank divinely;
And at his elbow, Souter Johnny,
His ancient, trusty, drouthy crony;
Tam lo'ed him like a vera brither;
They had been fou for weeks thegither.
The night drave on wi' sangs an' clatter;
And aye the ale was growing better:
The landlady and Tam grew gracious,
Wi' favours, secret, sweet, and precious:
The Souter tauld his queerest stories;
The landlord's laugh was ready chorus:
The storm without might rair and rustle,
Tam did na mind the storm a whistle.
Care, mad to see a man sae happy,
E'en drowned himself amang the nappy;
As bees flee hame wi' lades o' treasure,
The minutes winged their way wi' pleasure:
Kings may be blest, but Tam was glorious,
O'er a' the ills o' life victorious!
But pleasures are like poppies spread,
You seize the flow'r, its bloom is shed;
Or like the snow falls in the river,
A moment white -then melts for ever;
Or like the borealis race,
That flit ere you can point their place;
Or like the rainbow's lovely form
Evanishing amid the storm. -
Nae man can tether time or tide;
The hour approaches Tam maun ride;
That hour, o' night's black arch the key-stane,
That dreary hour he mounts his beast in;
And sic a night he tak's the road in,
As ne'er poor sinner was abroad in.
The wind blew as 'twad blawn its last;
The rattling showers rose on the blast;
The speedy gleams the darkness swallowed;
Loud, deep, and lang the thunder bellowed:
That night, a child might understand,
The De'il had business on his hand.
Weel mounted on his grey mare, Meg,
A better never lifted leg,
Tam skelpit on thro' dub and mire,
Despising wind, and rain, and fire;
Whiles holding fast his gude blue bonnet;
Whiles crooning o'er some auld Scots sonnet;
Whiles glow'rin round wi' prudent cares,
Lest bogles catch him unawares;
Kirk-Alloway was drawing nigh,
Whare ghaists and houlets nightly cry.
By this time he was cross the ford,
Whare in the snaw the chapman smoored;
And past the birks and meikle stane,
Whare drunken Charlie brak's neck-bane;
And thro' the whins, and by the cairn,
Whare hunters fand the murdered bairn;
And near the thorn, aboon the well,
Whare Mungo's mither hanged hersel'.
Before him Doon pours all his floods;
The doubling storm roars thro' the woods;
The lightnings flash from pole to pole;
Near and more near the thunders roll;
When, glimmering thro' the groaning trees,
Kirk-Alloway seemed in a bleeze;
Thro' ilka bore the beams were glancing;
And loud resounded mirth and dancing.
Inspiring bold John Barleycorn!
What dangers thou canst mak' us scorn!
Wi' tippenny, we fear nae evil;
Wi' usquabae, we'll face the devil!
The swats sae reamed in Tammie's noddle,
Fair play, he cared na deils a boddle.
But Maggie stood right sair astonished,
Till, by the heel and hand admonished,
She ventured forward on the light;
And, wow! Tam saw an unco sight!
Warlocks and witches in a dance;
Nae cotillion, brent new frae France,
But hornpipes, jigs, strathspeys, and reels,
Put life and mettle in their heels.
A winnock-bunker in the east,
There sat auld Nick, in shape o' beast;
A towzie tyke, black, grim, and large,
To gie them music was his charge:
He screwed the pipes and gart them skirl,
Till roof and rafters a' did dirl. -
Coffins stood round, like open presses,
That shawed the Dead in their last dresses;
And by some devilish cantraip sleight
Each in its cauld hand held a light,
By which heroic Tam was able
To note upon the haly table,
A murderer's banes in gibbet-airns;
Twa span-lang, wee, unchristened bairns;
A thief, new-cutted frae a rape,
Wi' his last gasp his gab did gape;
Five tomahawks, wi' blude red-rusted;
Five scimitars, wi' murder crusted;
A garter, which a babe had strangled;
A knife, a father's throat had mangled,
Whom his ain son o' life bereft,
The grey hairs yet stack to the heft;
Wi' mair of horrible and awfu',
Which even to name wad be unlawfu'.
As Tammie glowered, amazed and curious,
The mirth and fun grew fast and furious:
The Piper loud and louder blew;
The dancers quick and quicker flew;
They reeled, they set, they crossed, they cleekit,
Till ilka carlin swat and reekit,
And coost her duddies to the wark,
And linket at it in her sark!
Now Tam, O Tam! had they been queans,
A' plump and strapping in their teens;
Their sarks, instead o' creeshie flainen,
Been snaw-white seventeen hunder linen! -
Thir breeks o' mine, my only pair,
That ance were plush, o' gude blue hair,
I wad hae gi'en them off my hurdies,
For ae blink o' the bonie burdies!
But withered beldams, auld and droll,
Rigwoodie hags wad spean a foal,
Lowping and flinging on a crummock,
I wonder didna turn thy stomach.
But Tam kenned what was what fu' brawlie:
`There was ae winsome wench and waulie',
That night enlisted in the core
(Lang after kenned on Carrick shore;
For mony a beast to dead she shot,
And perished mony a bonie boat,
And shook baith meikle corn and bear,
And kept the country-side in fear);
Her cutty sark, o' Paisley harn,
That while a lassie she had worn,
In longitude tho' sorely scanty,
It was her best, and she was vauntie.
Ah! little kenned thy reverend grannie,
That sark she coft for her wee Nannie,
Wi' twa pund Scots ('twas a' her riches),
Wad ever graced a dance of witches!
But here my Muse her wing maun cour,
Sic flights are far beyond her power;
To sing how Nannie lap and flang,
(A souple jade she was and strang),
And how Tam stood, like ane bewitched,
And thought his very een enriched;
Even Satan glowered, and fidged fu' fain,
And hotched and blew wi' might and main:
Till first ae caper, syne anither,
Tam tint his reason a' thegither,
And roars out, "Weel done, Cutty-sark!"
And in an instant all was dark:
And scarcely had he Maggie rallied,
When out the hellish legion sallied.
As bees bizz out wi' angry fyke,
When plundering herds assail their byke;
As open pussie's mortal foes,
When, pop! she starts before their nose;
As eager runs the market-crowd,
When "Catch the thief!" resounds aloud;
So Maggie runs, the witches follow,
Wi' mony an eldritch screech and hollow.
Ah, Tam! ah, Tam! thou'll get thy fairin!
In hell they'll roast thee like a herrin!
In vain thy Kate awaits thy comin!
Kate soon will be a woefu' woman!
Now, do thy speedy utmost, Meg,
And win the key-stane of the brig;
There at them thou thy tail may toss,
A running stream they dare na cross.
But ere the key-stane she could make,
The fient a tail she had to shake!
For Nannie, far before the rest,
Hard upon noble Maggie prest,
And flew at Tam wi' furious ettle;
But little wist she Maggie's mettle -
Ae spring brought off her master hale,
But left behind her ain grey tail:
The carlin claught her by the rump,
And left poor Maggie scarce a stump.
Now, wha this tale o' truth shall read,
Ilk man and mother's son, take heed:
Whene'er to drink you are inclined,
Or cutty-sarks run in your mind,
Think, ye may buy the joys o'er dear,
Remember Tam o'Shanter's mare.