Mi dedico ste mie composizion
Ai omeni, e alle donne morbinose,
a quelli veramente, che le cosse
le varda per el verso, che xe bon.
Sotto le metto alla so protezion,
come persone tutte spiritose,
perché da certe teste scrupolose,
i le difenda co la so rason.
Che i diga che qua drento no ghe xe
Né critiche, né offese alle persone,
che de Dio no se parla, né dei Re,
ma sol de cosse allegra, belle, e bone,
cosse deliciosissime, cioè
de bocche, tette, culi, cazzi, e mone.
Mona, cossa mai xestu, che ti ha tanta
Forza, e vertù de far tirar i cazzi,
che ti fa deventar i savi pazzi,
e i coraggiosi in ti se perde, e incanta.
Quei, che d’esser gran teste se millanta,
per ti deventa tanti visdecazzi,
ti fa che i vecchi fazza de regazzi,
e che fazza peccai la zente santa.
Ti ti è quella, che fa che sti avaroni
Deventa generosi in tu’un momento,
e che volta bandiera i buzzaroni;
per ti el più desperà torna contento,
per ti se perde onor, robba, e cogioni.
Mona, mo cossa mai gastu là drento?
Una gran ingiustizia buzzarada,
che la natura all’omo la ga fato,
che in tutti quanti i tempi nol sia in stato
de dar una bonissima chiavada.
La donna xe assae più privileggiada,
e che in questo el so destin no xe stà ingrato,
e, co no la ‘l fa un caso resservato,
la se pol far chiavar anca ammalada;
da zovene, da vecchia, e da puttella,
senza amor, senza voggia, e senza stento
la pol sempre tior drento la capella.
Ma quel che mi considero un portento,
che ancora morta in quella so sportella
ghe ne xe stà, che ghe l’ha messo drento.
Se sia la calamitta, o el ferro sia
Quello che tira, no la xe decisa,
chi dise cha la forza xe divisa,
che tutti do se tira in compagnia.
Cussì come che ghè fran simpatia
Fra el cazzo, quando el tira, e la Marfisa,
ancora sta question resta indecisa,
se in l’uno, o in tutti do sia l’energia.
Mi digo senza tanto dubitar
Che tutta la vertù sia in te la donna,
e lo posso dal fatto giudicar,
perché a mi, no credè che ve cogiona,
la mona me l’ha fatto ben tirar,
ma mi no ho fatto mai tirar la mona.
Ho visto l’altro giorno una puttana
Con una mona granda in tal maniera,
che in prencipio ghe gera una riviera
con un bastimento tutto pien de lana.
Son andà drento in quell’impura tana,
e ho visto che i ziogava alla bandiera,
e che a un postiglion andando de carriera
el caval ghè cascà in t’una fontana.
Ho visto un tiro a sie, e un gran palazzo,
dove ghe gera un omo, che a un puttello
ghe metteva nel cul tanto de cazzo.
E ho visto che, sonando un campanello,
una munega i ha messo in t’un tinazzo,
che al gastaldo gh’avea impestà l’osello.
Tette fatte de latte, e de zonchiada
pastizzetti, che el genio m’incitè,
pometti, che la vita consolè,
cara composizion inzuccarada.
Tette bianche de neve nevegada,
cissinello, dove dormirave un Re,
panna impetria, che el gusto innamorè,
lattesini per dar la pappolada.
Tette de zensamin, de cao de latte,
tette, che al zensamin sé do zucconi,
tette, che nel mio cuor sempre combatte
tette, de darghe mille morsegoni,
tette, che sé per mi le cosse matte,
tette, chi no ve basa è gran cogioni.
Troia xe andada in carcere, perché Paride ingiusto
El ga robbà una mona nel secolo vetusto,
onde per mar, per terra, tutta la terra accesa
a difender s’ha messo la so monaria offesa.
Cussì el gran regno d’Asia xe stà tutto distrutto
E del so estremo eccidio xe stà la mona el frutto.
Cartagine ga perso tutto el Romano impero
Per una mona in Capua, che no valeva un zero.
E i so gran Re famosi Roma ga perso ancora
Perché Tarquinio in mona starghe ha voludo un’ora.
L’illustre Marc’Antonio per la mona d’Egitto
Nella battaglia a leucade el xe restà sconfitto.
De molti altri spropositi xe stà causa la mona;
ma cossa mai no fala sta brutta buzzarona?
Continua versi satanici...
