2004年3月6日
今日練左三個鐘頭車，頭兩粒鐘我同Kevin都係練斜路打八字同埋行路試0個兩條路，最後一個鐘我地就膽粗粗踩入淺水灣，見只係用左兩個幾字就入到淺水灣，跟住我地就再踩入赤柱，天氣有0的寒，加上我無帶風褸，條路沿山而行，一陣陣寒風吹過來，個人真係打冷震。我地0係赤柱兜左好耐，0的路又上又落，回旋處都有幾個，行到我連路都唔記得左點行，不過好彩Kevin佢話識路，最後我地都可以出番去黃竹坑，不過好景不常，一路上我都係跟住Kevin車尾，0係最後一段回程路時，佢唔知點解會行左條出九龍&灣仔線，我見佢咁行就知佢原來無留意路牌，無計唯有跟埋去睇下會發生咩事。當我地見到隧道口(香港仔隧道)，我地0既問題終於出現喇，學牌係唔俾過隧道架，於是我地停埋架車0係一邊，然後隧道職員就過來問我地咩事，當然仲會俾人小一餐啦,，最後兩個職員帶我地推番架車到對面線(係要落車推)，然後渣返番駕駛學院。呢次經歷真係畢生難忘﹗
2004年3月7日
今日好開心，同若仙傾左成個幾鐘頭電話，發覺佢同以前讀書時真係判若兩人，開朗左好多，又成熟左好多，不過佢把聲都仲係咁陰聲細氣，嘻~不過都幾得意，可以得閒扮細路呃下人﹗其實我好想見下佢，不過有時覺得相見爭如不見，或者呢0的係我老毛病啦，我想永遠留個好印象俾佢。
2004年3月15日
呢個星期日日都去練車，練到個人好悶，開始對渣電單車無乜興趣，後日就係考牌0既大日子，雖然我已經對兩條考試路程練得好熟，但都好睇當日0既路面情況，我當然唔想再考多次喇，一
take pass係有0的難度，但只要小心0的渣就應該問題不大了。
呢個星期我日日都有打電話俾若仙，每次同佢傾都好開心，反而小瑛次次打俾佢，佢都係唔得閒，我同佢距離又拉番遠左。如果有人睇到我呢段文字，可能會覺得我份人唔係好得，但如果諗深一層，如果你對一個人好，但佢又對你不理不采，我諗任何人都忍受唔到。相反，若仙佢份人好得意，我鐘意佢把好
cutie 0既聲音，鐘意佢講去旅行0既趣事，鐘意佢講佢平日0的傻野，鐘意佢話人某李時0既語氣。0係呢一刻佢0係我心目中係最好架，甚至比嘉儀更好，不過因為佢好，所以我先唔敢見佢，我怕佢見到缺乏自信0既我，我怕佢唔會再聽我電話。以前我砌好一盒模型，我都覺得佢係完美架，我都會將佢放0係0的我易見到0既地方，擺出唔同0既姿勢，從不同角度去欣賞佢，無幾耐我就會將佢抹乾淨放回原盒，我唔係開始睇厭佢，而係我想更好咁保存佢，每一個模型我都好鐘意，但唔係每一個模型都可以保存得好好，模型係咁，感情亦然。
今日若仙佢原來返份新工，但佢份工睇來好似好忙，忙到連電話都聽唔到，我聽佢咁講個心有0的唔舒服，我擔心佢份工會好辛苦。有時我會覺得男人0既存在唔多唔少都係為左女人，為女人分擔問題，好好咁照顧佢，如果要捱的話就等男人去捱，總好過女人辛苦，我咁諗係大男人左少少，但係我都唔想我鐘意0既人太辛苦。
2004年3月17日
今日都係一個好值得紀念0既日子，今日係我同Kevin去考電單車路試0既日子。今朝我地仲特登book多個鐘去練車，起初我0的斜路打八字居然差左，可能因為考試壓力，而且今朝返去見到有人考時又係衰0係斜路八字度，令到心情緊張起來，當我不斷練習時，我每次第一個八字都會失平衡，我心諗我要控制我情緒，要定0的，到左臨考前最後一次練習都仲係打得嘛嘛地，然後就要渣番架車去起步點等阿sir喇。今日考試又係Kevin出車先，我記得上兩次強制試又係咁0既次序。當我目送Kevin出街之際，我個考官都來左喇，好緊張呢，當我慢慢渣架車去斜路時心情好沉重，心裏面不斷同自己講鎮定同心呼吸，然後打第一個八字落斜時講小心0的，終於第一個八字打得OK，然後餘下兩個就定好多喇。雖然今日考試時天色好灰，出車時仲有0的雨點，不過阿sir都照考試，都算好人唔駛我地再排期，今日考試路線係行壽山村，但好唔好彩0係上山條路前面有個學神慢駛，上到百佳又遇到架校van，其間佢仲停車兩次，第二次我知個阿sir都趕時間，所以我決定0係第二次就爬佢頭，當然我係做足晒功夫先爬頭啦，之後段路就好正常喇，就咁就安全返去考試起步點，就咁就考完喇，最後—keke~梗係考到牌啦﹗
考到牌後我第一個想通知0既係若仙，佢問我考到牌後想買0的咩俾自己獎勵下自己，我當時答佢話想買架車俾我自己，但其實我心裏面係想見下佢當獎勵自己，不過我咁講實會嚇親人啦，所以最後都係講0的無聊野，哈~真白痴﹗夜晚返左Lam
Tin食飯，開icq時見到小瑛，我同佢講我考到牌喇，但佢只係"哦，係呀﹗"。佢呢個回覆都幾好，我已經決定左喇，唔駛再亂諗0野﹗
2004年3月20日
呢兩晚都同若仙傾電話傾左成三個鐘，嘩~好耐無試過咁馬拉松式煲粥，每次講完都好口乾，但每次講完都有0的
heehee~，宜家我只係想努力去改進自己。
2004年3月21日
今晚又同若仙傾電話，今次超耐，傾左差唔多五個鐘，估唔到今晚講左好多關於自己0既感情觀、人生觀、理想男/女朋友0既0野，今晚我同佢講左關於小瑛同我0既曖昧關係已經結束，現在係最重要，其實我有0的暗示現在0係電話筒另一邊係最重要，唔知佢意唔意會到呢﹗琴晚發夢，我夢見若仙企左0係梯級上面，其實我仲記得然後我將佢抱住，呢0的可能係日有所思。愈了解若仙愈發覺佢有時都幾缺乏自信，但佢性格係我喜歡0既，而且同我有0的相似潻，今晚我都有好幾次咁講0的希望可以增強佢自信0既說話，況且呢0的都係事實，希望佢唔好以為我係為左"乙水"
佢先咁講。今晚雖然夜訓左少少，但都好開心。今次我好想可以同若仙0係埋一齊，其實我早在F2-3識若仙時就鐘意佢，但係果時同佢唔熟，電話都無打過俾佢，不過以前都幾勇，曾經0係地鐵站入閘處大聲同佢講過鐘意佢，然後有次仲0係Mc記食早餐又試過捉住佢隻手，今日返屋企其中一個目的係想搵返當年佢送俾我0既一個鐵牌，上面有佢同我0既名，可惜我搵左好耐都搵唔番。雖然我之後都有拍過拖有鐘意過其他女仔，但係有"找對了"的感覺都係第一次，我愈了解佢就愈覺得佢係我搵0既人，希望可以補償番失去左0既時間。
今日下午同屋企人飲茶，好耐未試過可以成家人坐埋一齊飲茶。阿媽知道我考到電單車牌後，都係例牌話左我幾句，叫我唔好渣電單車，不過可惜我脾氣固執，佢應該都知我係唔會改架啦，然後大佬今次居然主動話出錢借住俾我買車先，不過我都係需要時間考慮下自己可唔可以付擔，我唔想因為養車而影響生活。
2004年3月22日
呢幾日放假心情特別輕鬆，可能因為已經考到個車牌，心頭大石放抵左。不過今朝收到若仙0既msg話佢琴晚訓得唔好，又諗番0的傷心0野，可能係我琴晚提太多過去0既事，勾起佢0的唔開心事，我想盡量令佢開心，反而帶俾佢咁多煩惱。今日成日都掛住佢，都無乜做過其他0野，好擔心佢又亂諗野攪到自己唔開心，究竟我點先可以幫佢分擔0下呢？有時我鐘意advise人聽某首歌，算係以歌寄意，又可以抒緩情緒，但今次我唔知可以為佢點咩歌，唯有留言俾佢，希望佢會意會到。
2004年3月28日
過去0既廿四小時，我0既心情起伏得特別大，今晚若仙好明確同我講，佢同我只係想做住朋友先，琴日我原來誤會左佢所指0既"好感"，原來係朋友0個種好感，我一直都以為我仍然有希望，但今晚佢終於好坦白咁同我講左—REJECT。其實咁樣仲好，起碼今次我敢開口，又可以得到答案，原來我一直都係咁自作多情，一直都係活於自己幻想0既世界，以前我唔識得點去面對感情0既問題，有人對我好少少我就會好得意，以為0個個人係咪對我有0的意思呢，我知道咁樣好幼稚呀，我知道我咁樣呢世都唔可以搵到個真心愛我0既人。其實，愛係一種單純0既直覺，需要簡單咁表達，仲要勇於面對，我有時過份保護自己‥‥
2004年3月29日
八" 力" & Honey's Day
2004年3月31日
愛情可以改變一個人，我已經改變，熱戀0個種天旋地轉0既感覺，我也感覺到，所以我今日發左一陣燒，好彩我有最好0既"葯水"。
從今以後我要好好咁打理自己0既時間，好好咁計劃自己0既前途，以前我無乜決心去想呢0的問題，可能係因為自己一個人0既事，但宜家唔同喇，我唔想第日仲要人地同我一齊捱，我都想Honey過得幸福，以後唔會再係我一個人0既事咁簡單。
|
