|
|
2003年10月4日
哎吔~我有預感一直膽心0既事可能就快發生咁，shit!! 而且仲好似會蔓延去左邊，今日0係公司突然間feel到有0的刺痛，呼吸有時好唔自然，希望係我自己太過多疑。
2003年10月5日
今日我同Steven﹑Eva﹑Eva細妹去左東龍洲行山，對於好耐無運動0既我，今日行左幾個鐘就腳仔軟軟，但係條氣管好似順好多。
2003年10月10日
最近我覺得我比起同輩0既朋友，好似好失敗咁，唉﹗唔知由幾時開始，我變得咁悲觀，可能我根本對自己無信心掛。
2003年10月18日
一個人時拎起個電話都有種感覺，就係唔知可以打俾邊個。最近開始我唔再搵我0既"初戀"喇，其實佢一早已經過左去。我應該現實番0的，始終愛情唔可以飲水飽。以前對愛情有太多幻想......
2003年10月31日
今日Halloween，一返到學校見到0的同學(特別係Connie)好似個個心情都 high high 地咁，但係其實今晚我地仲要做 presentation 架喎。哈~ 今晚個 presentation 我地成組人都好 hae ，我覺得我地今年好似衰過上年，每逢星期五就想"了"去玩，果然......我地今晚連lecture都無上就去左打冷醫肚，然後各散去自己0既第二場節目。原本今晚心情應該好開心，但係去打冷途中同 Cathy 有0的嗌叫，基本上平時都可以忍受到佢0的說話，但琴晚唔知點解忍唔住，於是講左句"咁下年唔好一齊，呀唔係，應該係下個sem唔好一組"。其實對我來講，同邊0的人一組都問題不大，反正我都有過一段時間自閉過，果時我已經習慣左一個人，雖然唔開心，但比起要0係人地面前扮開心更辛苦。我知道同佢地一齊應該會比其他人合拍，但係如果有一日唔可以0既話都無辦法，話唔定係整定呢。
今晚第二場節目就係去搵 Ifve 落 bar ，原本已經唔飲得0既我，頭先打冷已經飲左幾杯架喇，但落到 bar 又要飲，終於十一點幾就頂唔住要走先，好鬼瘀.....其實今晚好似白白咁過左個 Halloween 咁。坐的士途中有種感覺，我邊度都唔想去，只係想那個人平平靜靜咁陪我傾下計。