|
|
2003年9月5日
寫網上日記其實有0的矛盾，有時寫寫自己生活0既點滴想俾人多0的了解自己，但有時又會有0的事唔想俾太多人知，要揀過度過先放上網咁就唔夠隨心，咁樣再寫都好似無乜意思。近排好多事都在轉變，仲好似變得好快，呢一年，我0既人生好似有左重大0既轉變，有預感呢年入面0既抉擇會影響我往後0既人生。
原來感情(連友情在內)係唔可以勉強，今晚放學同Cathy一齊搭車，佢講佢以前好多朋友都無晒聯絡0既野，其實要解釋0既話，都只係講番0的好老土0既野...緣份囉...因為人生旅途中每個站都會遇到唔同0既人，每個行程都會有唔同0既人同行，如果要計只好計你同佢一齊0既行程長短。有時要勉強去關心一個唔會對你上心0既人，反而令自己錯失左一0的關心你自己0既人，到頭來原來自己只係活在幻想當中，話浪費左時間咩﹖咁又好似講唔通，因為自己原來都有開心過。
2003年9月9日
今日我突然間諗，我應該搵個識理財0既女朋友來管下我，因為我個個月出糧都洗鬼晒，唉~真係頭痛，月頭就要驚到月尾。
新學年又開始，今年要俾心機讀先得，唔可以好似上年咁玩玩下，呢個sem 有堂 econ ，雖然0的野都好似學過晒，不過溫故知新呢個道理我都仲識，而且個阿 sir 有句令我好深刻：get more than you learn in class，don't just pass through this course.佢呢句真係提醒左我。
2003年9月16日
呢排返夜返得密左0的，終於都捱唔住大前日請左病假，跟住星期日咁橋 dayoff ，琴日一返工又俾個賤人"height ming"插我，真係一返工就同老子來呢套，有口話人無口話自己呢條PK，我即刻無明火又起，0係帶病0既情況下我又同佢開火，話我請病假請得密左0的，其實我已經無一個月一day架啦，其他部門大把姐姐仔個個月請都係咁，我真係病有晒醫生紙佢反過來插我，本能反應下我大聲少少同佢講我有葯食真係病，又唔係話咋病，唔通病都要返工，0係公司做到死呀？佢條PK居然仲可以話醫生紙可以係假，咁我話，咁好丫，如果要炒咪炒囉，俾個理由我就得喇﹗終於，今次係我大鑊全勝。其實如果同自己個 supervisor 過唔去，返工時真係有0的腹背受敵0既感覺，唉—
今晚上 management ，個 lecturer 照書讀，當全班人係木頭咁佢有佢讀，面對呢0的咁0既環境，我地梗係又無晒心機聽書啦，傾下傾下原來大家都發覺最近 Kevin 變左好多，咁我地就估係咪因為佢同佢女朋友分手所致，所以宜家佢咁放縱自己，開頭佢講佢無事，我地仲以為佢可以handle到，但最近0的舉動好似証明左，佢好似連自己都未擦覺到自己開始失控。其實每日我地都可能做錯事，有時明知係錯都會繼續，唔知係因為自己固執，還是情有可原，總之有時做錯事反而令自己好過點，但到有一日要面對後果時，唔知仲有幾多個人仍然無悔當初0既決定。我宜家每日都做著我人生入面最錯0既事，每日重覆同樣0既錯誤，我知道我今日做錯聽日未必可以來得切補救，但係我又無從入手就不如擺手，就由得佢繼續犯錯，但良知與內疚每日都攻擊我，諗諗下....我0既生活又何尚唔係腹背受敵﹖