Mani Matter
Texte
Stand: 28. Dezember 1997 | Ugh!
Mani Matter | Biographie - Bücher | Texte | Tonträger
Alls wo mir id Finger chunnt
Arabisch
Bim Coiffeur
Dene wos guet geit
Dialog im Strandbad
D Nase
Dr Alpeflug
Dr eint het Angscht
Dr Parkingmeter
Dr Rägewurm
Dr Wecker
Ds Heidi
Ds Nüünitram
Dynamit
Es git e Bueb mit Name Fritz
Hemmige
Hie ir Schwyz
I han es Zündhölzli azündt
Mir hei e Verein
Nei säget sölle mir
O wi tumm
Us emene lääre Gygechaschte
Warum syt dir so truurig?
Alls wo mir id Finger chunnt
Text & Musik: Mani Matter
Am Tag won i uf d'Wält bi cho, si hei mers speter gseit
Da het my Mueter grad deheim es Suppegschir verheit
Und sider ischs mys herte Los bis a mys Läbesänd
Alls wo mir id Finger chunnt verbricht mer i de Händ
I cha mer Müe gäh wi i wott, es nützt mer alles nüt
Was geschter no isch ganz gsy isch i tuusig Bitze hütt
Die Schärbehüüfe won i hinderla, die rede Bänd
Alls wo mir id Finger chunnt verbricht mer i de Händ
I han emal es Meitschi gchennt, s'isch truurig aber wahr
Es Meitschi ganz us Porzelan mit rabeschwarze Haar
Uf einisch isch es zue mer cho, het gseit: Jitz isch es z'Änd
Alls wo mir id Finger chunnt verbricht mer i de Händ
Und won i's du zum letschten Abschid a mys Härz ha trückt
Da han i's z'fescht umarmet und vor Liebi grad erstickt
I has nid äxtra gmacht, dir chöit mers gloube, Sackermänt
Alls wo mir id Finger chunnt verbricht mer i de Händ
Si hei mi vor e Richter gstellt und hei mi geschter ghänkt
Und won i scho bi ghanget, da uf ds Mal, wär hätt das tänkt
Da het dr Strick la gah im allerletschtischte Momänt
Alls wo mir id Finger chunnt verbricht mer i de Händ
Und sider blyben i Vagant und mache lieber nüt
Dir wärdet das begryffe, drum syt güetig, liebi Lüt
Und gryffet ou i ds Portmonee und gäht e mildi Spänd
Alls wo mir id Finger chunnt verbricht mer i de Händ
2/4
|Am______|Dm______|G7______|C_______|
|Dm______|Am______|E7______|________|
|Am______|Dm______|G7______|C_______|
|Dm______|Am______|E_______|Am______|
Arabisch
Text & Musik: Mani Matter
Dr Sidi Abdel Assar vo El Hama
Het mal am Morge früe no im Pijama
Ir Strass vor dr Moschee
Zwöi schöni Ouge gseh
Das isch dr Afang worde vo sim Drama
S isch d Tochter gsy vom Mohamed Mustafa
Dr Abdel Assar het nümm chönne schlafa
Bis är bim Mohamed
Um d Hand aghalte hed
Und gseit: I biete hundertfüfzig Schaf a
Dr Mohamed het gantwortet: Bi Allah
Es fröit mi, dass my Tochter dir het gfalla
Doch wärt isch si, my Seel
Zwöhundertzwänzg Kamel
Und drunder chan i dir sen uf ke Fall la
Da het dr Abdel Assar gseit: O Sidi
Uf sone tüüre Handel gang i nid y
Isch furt, het gly druf scho
E billigeri gno
Wo nid so schön isch gsy, drfür e gschydi
Doch wenn es Nacht wird über der Sahara
Luegt är dr Mond am Himel häll und klar a
Und truuret hie und da
De schönen Ouge na
Und dänkt: Hätt i doch früecher afa spara
2/4
|Am______|________|________|________|
|Am______|________|________|________|
|Dm______|________|Am______|________|
|E_______|________|Am______|
Anmerkung: Beim Am-Akkord wird nur die 1., 3. und 5. Saite angeschlagen (also E, Gis und H)
Bim Coiffeur
Text & Musik: Mani Matter
Bim Coiffeur bin i gsässe vor em Spiegel, luege dry
Und gseh dert drinn e Spiegel wo ar Wand isch vis-à-vis
Und dert drin spieglet sech dr Spiegel da vor mir
Und i däm Spiegel widerum dr Spiegel hindefür
Und so geng wyter, s'isch gsy win e länge Korridor
I däm my Chopf gwüss hundertfach vo hinden und vo vor
Isch ufgreit gsy i eier Kolonne, z'hinderscht isch dr Chopf
I ha ne nümme gchennt, so chly gsy win e Gufechnopf
My Chopf, dä het sich dert ir Wyti, stellet öich das vor
Verloren ir Unäntlechkeit vom länge Korridor
I ha mi sälber hinde gseh verschwinde, ha das gseh
Am heiterhälle Vormittag und wi we nüt wär gscheh
Vor Chlupf han i mys Muul ufgscperrt, da sy im Korridor
Grad hundert Müüler mit ufgange win e Männerchor
E Männerchor us mir alei, es cheibe gspässigs Gfüel
Es metaphysischs Grusle het mi packt im Coiffeurgstüel
I ha d'Serviette vo mer grissen, ungschore sofort
Das Coiffeurgschäft verla mit paar entschuldigende Wort
Und wenn dir findet i sött e chly meh zum Coiffeur ga
De chöit dir jitz verstah warum i da e Hemmig ha
4/4
|C_______|____Am__|Dm______|____G7__|
|C_______|____Am__|Dm______|G7______|
Letzte_Strophe:
|C_______|____Am__|Dm______|____G7__|
|C_______|____Am__|Dm__G7__|____C___|
Dene wos guet geit
Text & Musik: Mani Matter
Dene wos guet geit
Giengs besser
Giengs dene besser
Wos weniger guet geit
Was aber nid geit
Ohni dass's dene
Weniger guet geit
Wos guet geit
Drum geit weni
Für dass es dene
Besser geit
Wos weniger guet geit
Und drum geits o
Dene nid besser
Wos guet geit
4/4
|Am______|E_______|E7______|Am______|
|Dm______|Am______|E7______|Am______|
|________|G7______|C_______|E_______|
|Am______|Dm______|Am__E___|Am______|
Dialog im Strandbad
Text & Musik: Mani Matter
"Was gsehn i", seit ds Vreni zum Stini
"Du treisch ja Mini-Bikini!"
"Das sy nid dyni Bikini"
Seit ds Stini
"S'sy mini!"
"Ja, Stini, die Mini-Bikini sy dyni
das gsehn i", seit ds Vreni
"S'treit keni so weni
Wi du"
3/4
|D_______|A7______|D_______|________|
|________|A7______|D_______|________|
|G_______|________|D_______|________|
|A7______|________|D_______|________|
|________|A7______|D_______|G_______|
|D_______|________|A7______|________|
|D_______|
D Nase
Text & Musik: Mani Matter
Loset mit was für Methode
Mängisch ds Schicksal eim tuet schla
Loset mit was für Methode
Mängisch ds Schicksal eim tuet schla
Zumnen Arzt isch eine cho dä
Het e zlängi Nase gha
Het e zlängi Nase gha
Dokter tüet mer d'Nase chürze
So chas nümme wytergah
Dokter tüet mer d'Nase chürze
So chas nümme wytergah
Nie chan i es Bierli stürze
Ohni se im Nasse z'ha
Ohni se im Nasse z'ha
Wil si geng isch aputscht a se
Het mi d'Frou sogar verlaa
Wil si geng isch aputscht a se
Het mi d'Frou sogar verlaa
S'geit kei Tür zue vor myr Nase
Wo se nid drinn ygchlemmt ha
Wo se nid drinn ygchlemmt ha
Wo der Dokter mit em Mässer
Ihm die Nase gchürzt het gha
Wo der Dokter mit em Mässer
Ihm die Nase gchürzt het gha
Het dr Ma grüeft: Jitz wirds besser
I fa nöi mys Läben a
I fa nöi mys Läben a
Doch bim heiga het im äbe
D'Richtig gfählt dr Nase na
Doch bim heiga het im äbe
D'Richtig gfählt dr Nase na
Är isch schreg uf d'Strass, het ds Läbe
Under emnen Outo gla
Under emnen Outo gla
4/4
|Am______|Dm__Am__|________|Dm__Am__|
|G7__C___|Am______|E___Am__|________|
Dr Alpeflug
Text & Musik: Mani Matter
S'sy zwee Fründen im ne Sportflugzüg
En Alpeflug ga mache
Flügen ufe zu de Gipflen und
Z'dürab de Gletscher nache
Hinde sitzt dr Passagier
Dä wo stüüret, dä sitzt vor
Und es ratteret und brummet
Um sen ume dr Motor
Da rüeft dä, wo hinde sitzt:
Lue, ds Bänzin geit us, muesch lande!
Wie? Was seisch? rüeft dr Pilot
Los, i ha di nid verstande
Wie? Was hesch gseit? rüeft dä hinde
Warum landisch nid sofort?
Red doch lüter, rüeft dä vorne
Bi däm Krach ghör i kes wort
I versta's nid, rüeft dä hinde
Warum machsch's nid? Bisch drgäge?
I versta's nid, rüeft dä vorne
Muesch mer's würklech lüter säge!
Wie? Was seisch? rüeft dise, lue
Dr Tank isch läär, du flügsch nümm wyt!
Los, bi däm Mordstonnerslärme
Rüeft dä vorne, ghör i nüt
Aber los doch, rüeft dä hinde
Gottfridstutz mir hei nid d'Weli
Tue nid ufgregt, rüeft dä vorne
Red doch lüter, gottverteli!
Los, rüeft dise, we mir jitz nid lande
Gheie mir i ds Tal!
Ghöre gäng no nüt, rüeft äine
Los begryf doch das emal!
So het im Motorelärme
Dr Pilot halt nid verstande
Dass ihm jitz ds Bänzin chönnt usga
Und dass är sofort sött lande
Da uf ds mal wird's plötzlech still
Nämlech wil ds Bänzin usgeit
Und jitz wo me's hätt verstande
Hei si beidi nüt meh gseit
Dr eint het Angscht
Text & Musik: Mani Matter
Dr eint het Angscht
Dr ander chönnt lache
Dr ander het Angscht, dass
Dr eint chönnt lache
Und alli mache si
Alls wo si mache
Us Angscht dervor, dass
Öpper chönnt lache
Und wil nid alli
Über ds glyche lache
Chönnt me mängisch ds einte
Oder ds andere mache
Und s'würd i beidne
Fäll öpper lache
So chunnts, dass si halt de
Gar nüt mache
Si dänke nid dra
Bi däm, was si mache
Bi däm heisst das
Was si nid tüe mache
Us Angscht dervor, dass
Öpper chönnt lache
Dass öpper darum
Ersch rächt chönnt lache
Es isch im Grund ja
Grad das zum lache
Dass si geng Angscht hei
Das öpper chönnt lache
Und was si o mache
Dass niemer söll lache
Es nützt ne drum alles nüt
3/4
Strophe 1:
|C_______|________|Dm______|________|
|G7______|________|C_______|________|
|Am______|________|Dm______|________|
|D7______|________|________|G_____G7|
Strophen 2 & 3:
|C_______|________|Dm______|________|
|G7______|________|C_______|________|
|Am______|________|________|Dm______|
|D7______|________|G_______|______G7|
Strophe 4:
|C_______|________|Dm______|________|
|G7______|________|C_______|________|
|Am______|________|Dm______|________|
|Am______|Dm______|G7______|________|
|C_______|
Dr Parkingmeter
Text & Musik: Mani Matter
Bimne Parkingmeter ha
Ni mys Outo welle la
Aber ha kes Zwänzgi gha
Für bim Gältschlitz ynezla
Ja was machen ig jitz da
Hani tänkt, i chönnti ja
Schnäll zur Poscht am Egge gah
Mir es Zwänzgi wächsle la
Aber halt, de müesst i ja
Chönne ds Outo hie la stah
Und zu däm Zwäck müesst i da
Zersch es Zwänzgi ynela
Und es Zwänzgi han i ja
Äbe nid, i müessti da
Zersch zur Poscht am Egge gah
Und mys Outo hie la stah
Und für ds Outo hie la z'stah
Müesst i zersch es Zwänzgi ha
Und das isch was i nid ha
Wen i nid uf d'Poscht cha gah
Zwar uf d'Poscht müesst i nid gah
Wen i ds Zwänzgi hätt, doch da
I das Zwänzgi ja nid ha
Chan i ds Outo nid la stah
Und i cha kes Zwänzgi ha
Wil i nid uf d'Poscht cha gah
Und uf d'Poscht chan i nid gah
Wil i ja kes Zwänzgi ha
Bimne Parkingmeter ha
Ni mys Outo welle la
Aber ha kes Zwänzgi gha
Und ha wider müesse gah
4/8
|C______|Dm______|G7______|C_______|
|Am_____|Dm__F___|C___G7__|C_______|
Dr Rägewurm
Text: Mani Matter ; Musik: Georges Brassens ("Ballade des dames du temps jadis")
Anmerkung: Mani Matters erstes Chanson von 1953, auf der Melodie von George Brassens' "Ballade des dames du temps jadis" basierend, einer Vertonung eines Gedichts von François Villon
Einisch nach emne grosse Gwitter
Einisch nach emne grosse Sturm
Isch zum Bode cho use z'schnaagge
Ganz vergnüegt e Rägewurm
Är blinzlet froh und glücklech
Und het Fröid am Sunneliecht
Da gseht er wi grad ir Nechi
E zwöiten usechriecht
Är tuet lächle, seit Grüessech wohl
Eh wi schön isch es hütt uf Ärde
Dir syt hübsch, weit dir nid my Frou
Myni Frou Gemahlin wärde
Doch dr ander, statt dass er ja seit
Statt dass är an em Gfalle fänd
Rüeft är: I bi, du tumme Kärli
Dys eigete Hinteränd
Das Gschichtli isch zwar truurig
Doch es zeigt, der Früelig macht eim sturm
So geits jedem Rägewürmli
Geits bim hinderschte Rägewurm
3/4
|C_______|________|G7______|C_______|
|________|________|G7______|C_______|
|F_______|Em______|Dm______|A7______|
|G7______|C_______|G7______|C_______|
Dr Wecker
Text & Musik: Mani Matter
Leider geit ir Nacht my wecker
Immer füf Minute vor
Lütet mir drum jede Morge
Füf Minute z'früech i ds Ohr
Aber wen i nen am Abe
Füf Minute hinder tät
Wär i drum de bim i-ds-Bett-ga
wider füf Minute z spät
Syg's am Abe, syg's am Morge
S'nimmt mer füf Minute Pfuus
Füf Minute sy nid vil, doch
Mit dr Zyt macht's öppis us
I zwölf Tag isch das e Stund
I drei Monet schon e Nacht
Won i wäg däm blöde Wecker
schliesslech schloflos hätt verbracht
I ha Sorge wäg myr Gsundheit
Uswäglos isch d Situation
Zletscht han ig dr Wecker furtggäh
Sider weckt mi ds Telefon
4/8
|C_______|________|F______|________|
|G_______|________|C_______|________|
Ds Heidi
Text & Musik: Mani Matter
Är wohnt a dr glyche Gass
Und i bi mit dir i d'Klass
So ischs cho, das mir grad beidi
Ds Härz a di verlore hei
Heidi, mir wei di beidi
Beidi, Heidi, hei di gärn
Är isch grosse Held im Sport
I probieres meh mit Wort
Jeden uf sy Art umwärbe
Mir di, Heidi, ig und är
Heidi, mir wei di beidi
Beidi, Heidi, hei di gärn
Zum Bewys är heig di gärn
Schiesst är Gool bi FC Bärn
Ig erkläre mi dir schlicht
I Form vo lyrische Gedicht
Heidi, mir wei di beidi
Beidi, Heidi, hei di gärn
Jede Sunntig dänksch am Mätsch
Är syg dä wo d'lieber hätsch
Findsch daheim vo mir e Brief
De chehrt sech ds Blatt, du süfzgisch tief
Heidi, mir wei di beidi
Beidi, Heidi, hei di gärn
S'het nid chönne wytergah
Hesch nid beidi chönne ha
Schliesslech hei du är und i gseit
Heidi, jitz entschliessisch di
Heidi, entscheid di, beidi
Wei di, beidi chasch nid ha
Hätti gwüsst wis usechunnt
Einisch ire schwache Stund
Hesch du di verlobt, s'isch zvil
Mit ihm am Sunntig nach em Spil
Nei, di Entscheidig, Heidi
Nei dy Bscheid - i bi enttüüscht
Dadrus han i glehrt, dass hütt
Nümm so vil erreicht, wär d'Lüt
Mit Literatur erchlüpft
Wi wär a ds rächten Ort hi stüpft
4/8
|Am______|Dm__Am__|____F___|____Am__|
|________|Dm__Am__|E___Am__|____E7__|
|C_______|G7______|C_______|G7__C___|
Letzte Strophe:
|Am______|Dm__Am__|____F___|____Am__|
|________|Dm__Am__|E___Am__|E___Am__|
Ds Nüünitram
Text & Musik: Mani Matter
Geschter z'Nacht het ds Nüünitram statt hei i ds Depot z'gah
Plötzlich, niemer weis warum, sys Schinegleis verla
Isch zum Himel ufegflogen und dert natina
I dr Nacht verschwunden ohni Spure z'hinderla
Sibe Hünd hei kläglich gjoulet grad wo das isch gscheh
Und e chalte Windstoss isch dür d'Monbijou-Allee
Und s'het e Betrunkne wos als einzige het gseh
Dür die lääare Strasse brüelet: Oherjeminee!
Das het amne Polizischt wo dert zur Stell isch gsy
Hüenerhut ygjagt, dass är es Ei het gleit derby
Und e Frou het tänkt: Wie nützlech doch die Tschugger sy!
Het ds Ei gno und's bräglet bis's es Stierenoug isch gsy
Doch dr Stier isch us dr Pfanne drusbrönnt und dervo
D'Frou het afa brüele, lut und Zetermordio
Bis dr Stier sech in es Tram verwandlet het und so
Uf de Gleis isch wytergfahre gäge ds Tramdepot
Druf ischs wider stiller worden und de schliesslech Rue
Ds Nüünitram isch hinden um e Rank em Depot zue
Eine het no grüeft: I pfuuse, blaset mir id Schue!
Und dir heit jitz vo mym Gschichtli sicher alli gnue
4/8
|Am_______|________|________|________|
|_________|________|________|________|
|G7_______|________|________|________|
|Am_______|________|E_______|Am6+____|
Dynamit
Text & Musik: Mani Matter
Einisch ir Nacht won i spät no bi gloffe
D'Bundesterrasse z'düruf gäge hei
Han i e bärtige Kärli atroffe
Und gseh grad, dass dä sech dert, jemers nei
Dass sech dä dert zu nachtschlafener Zyt
Am Bundeshus z'schaffe macht mit Dynamit
I bi erchlüpft und ha zuen ihm gseit: Säget
Exgüse, aber es gseht fasch so us
Wi dass dir da jitze würklech erwäget
Das grad id Luft welle z'spränge das Hus
Ja, seit dä Ma mir mit Für, es mues sy
Furt mit däm Ghütt, i bi für d'Anarchie
Was isch als Bürger mir da übrigblybe
Als ihm's probiere uszrede, i ha
Ihm afa d'Vorteile alli beschrybe
Vo üsem Staat, eso guet dass i cha
Ds Rütli und d'Freiheit und d'Demokratie
Han i beschworen, är sölls doch la sy
D'Angscht het mys Rednertalänt la entfalte
Chüel het dr Wind um üs gwäit i dr Nacht
Während ig ihm en Ouguschtred ha ghalte
Dass es es Ross patriotisch hätt gmacht
Zletscht hei dä Ma mini Wort so berückt
Dass är e Tränen im Oug het verdrückt
So han i schliesslech dr Staat chönne rette
Är isch mit sym Dynamit wieder hei
Und i ha mir a däm Abe im Bett en
Orde zuegsproche für my ganz allei
Glunge isch nume, dass zmonderischt scho
Über mi Red mir du Zwyfel si cho
Han ig ihm d'Schwyz o mit Rächt eso prise
Fragen i mi no bis hüt hindedry
Und no uf eis het dä Ma mi higwise
Louf i am Bundeshus sider verby
Mues i gäng dänke, s'steit numen uf Zyt
S'länge fürs z'spränge paar Seck Dynamit
6/8
|Am______|________|________|____G___|
|Am______|________|________|____G___|
|C_______|____E___|____Am__|E_______|
|Am______|
Es git e Bueb mit Name Fritz
Text & Musik: Mani Matter
Es git e Bueb mit Name Fritz
Es git e Bueb mit Name Fritz
Und dä cha renne wi dr Blitz
Und dä cha renne wi dr Blitz
Är rennt, dä unerhört Athlet
Är rennt, dä unerhört Athlet
So schnäll, das me ne gar nid gseht
So schnäll, das me ne gar nid gseht
Und wil er geng isch grennt bis jitz
Und wil er geng isch grennt bis jitz
Het ne no niemer gseh, dr Fritz
Het ne no niemer gseh, dr Fritz
Und ig sogar, dr Värslischmid
Und ig sogar, dr Värslischmid
Mues zuegäh: Vilich gits ne nid
Mues zuegäh: Vilich gits ne nid
4/4
|C_______|F___C___|G7__C___|G7______|
Hemmige
Text & Musik: Mani Matter
S'git Lüt, die würden alletwäge nie
Es Lied vorsinge, so win ig jitz hie
Eis singen um kei Prys, nei bhüetis nei
Wil si Hemmige hei
Si wäre vilicht gärn im Grund gno fräch
Und dänke, das syg ires grosse Päch
Und s'laschtet uf ne win e schwäre Stei
Dass si Hemmige hei
I weis, das macht eim heiss, verschlat eim d'Stimm
Doch dünkt eim mängisch o s'syg nüt so schlimm
S'isch glych es Glück, o we mirs gar nid wei
Das mir Hemmige hei
Was unterscheidet d'Mönsche vom Schimpans
S'isch nid die glatti Hut, dr fählend Schwanz*
Nid dass mir schlächter d'Böim ufchöme, nei
Dass mir Hemmige hei
Me stell sech d'Manne vor, wenns anders wär
Und s'chäm es hübsches Meiteli derhär
Jitz luege mir doch höchstens chly uf d'Bei
Wil mir Hemmige hei
Und we me gseht, was hütt dr Mönschheit droht
So gseht me würklech schwarz, nid nume rot
Und was me no cha hoffen isch alei
Dass si Hemmige hei
* [Anmerkung Mani Matters: "Man hat mich darauf aufmerksam gemacht, dass Schimpansen auch keinen Schwanz haben. Das wusste ich zwar nicht, aber es bestätigt ja nur meine These; und wen das stört, der kann statt dessen singen: Was unterscheidet d'Mönsche vom Schimpans / S'isch nid di glatti Hut, d'Intelligänz"]
4/4
|Em______|Am______|D7______|G_______|
|________|H7______|Em______|H7______|
Letzte Strophe:
|Em______|Am______|D7______|G_______|
|________|H7______|Em__H7__|Em______|
Hie ir Schwyz
Text & Musik: Mani Matter
Hier ir Schwyz da hei d'Politi-
Ker fasch geng e gsunde Schlaf
S'isch der Lohn vom guete Gwüsse
Si sy würklech alli brav
Denn si glouben a d'Regierig
Wo alles weis und alles cha
Und drum säge si zu allem
Was da chunnt geng nume ja
Doch vereinzelt
Wett fasch säge schwarzi Schaf
Wo uf alls e grossi Wuet hei
Die si gar nid öppe brav
Gloube gar nüt der Regierig
Wo nüt so macht wi si's wei
Und drum säge si zu allem
Was da chunnt geng nume nei
Und will die so destruktiv sy
Sy die andre dopplet brav
Und wil dies so dopplet brav sy
Disi ersch rächt schwrzi Schaf
S'macht der Aschyn, dass mir nume
Die zwo Müglechkeite hei
Dass men immer nume ja seit
Oder immer nume nei
Wivil schöner wär's, die vile
Hätte nid so gsunde Schlaf
Und sie wären e chly kritisch
(Glychs gilt für die schwarze Schaf)
Nume däwäg isch es müglech
Dass mir mal dä Zuestand hei
Wo me je nach däm was chunnt ou
Mängisch ja seit, mängisch nei
[Melodie fehlt]
I han es Zündhölzli azündt
Text & Musik: Mani Matter
I han es Zündhölzli azündt
Und das het e Flamme gäh
Und i ha für d'Zigarette
Welle Füür vom Hölzli näh
Aber ds Hölzli isch dervo-
Gspickt und uf e Teppich cho
Und es hätt no fasch es Loch i Teppich gäh dervo
Ja me weis was cha passiere
We me nid ufpasst mit Füür
Und für d'Gluet ar Zigarette
Isch e Teppich doch de z'tüür
Und vom Teppich hätt o Grus
Chönne ds Füür i ds ganze Hus
Und wär weis, was da nid alles no wär worde drus
S'hätt e Brand gäh im Quartier
Und s'hätti d'Füürwehr müesse cho
Hätti ghornet i de Strasse
Und dr Schluuch vom Wage gno
Und sie hätte Wasser gsprützt
Und das hätt de glych nüt gnützt
Und die ganzi Stadt hätt brönnt, es hätt se nüt meh gschützt
Und d'Lüt wären umegsprunge
I dr Angscht um Hab und Guet
Hätte gmeint s'heig eine Füür gleit
Hätte ds Sturmgwehr gno ir Wuet
Alls hätt brüelet: Wär isch tschuld?
Ds ganze Land i eim Tumult
Dass me gschosse hätt uf d'Bundesrät am Rednerpult
D'UNO hätt interveniert
Und d'UNO-Gägner sofort o
Für ir Schwyz dr Fride z'rette
Wäre beid mit Panzer cho
S'hätt sech usdehnt natina
Uf Europa, Afrika
S'hätt e Wältchrieg gäh und d'Mönschheit wär jitz nümme da
I han es Zündhölzli azündt
Und das het e Flamme gäh
Und i ha für d'Zigarette
Welle Füür vom Hölzli näh
Aber ds Hölzli isch dervo-
Gspickt und uf e Teppich cho -
Gottseidank dass i's vom Teppich wider furt ha gno
4/4
|C________|G7_______|Am_______|E________|
|F________|C________|G7_______|C________|
Mir hei e Verein
Text & Musik: Mani Matter
Mir hei e Verein, i ghöre derzue
Und d'Lüt säge: Lue dä ghört o derzue
Und mängisch ghören i würklech derzue
Und i sta derzue
Und de gsehn i de settig, die ghöre derzue
Und hei doch mit mir im Grund gno nüt z'tue
Und anderi won i doch piess derzue
Ghöre nid derzue
Und ou was si mache, die wo derzue
Tüe ghöre, da standen i nid geng derzue
Und mängisch frage mi d'Lüt: Du lue
Ghörsch du da derzue?
Und i wirde verläge, sta nümm rächt derzue
Und dänken: O blaset mir doch i d'Schue
Und gibe nume ganz ungärn zue:
Ja i ghöre derzue
Und de dänken i albe de doch wider: lue
S'ghört dä und dise ja ou no derzue
Und de ghören i doch wider gärn derzue
Und i sta derzue
So ghör i derzue, ghöre glych nid derzue
Und stande derzue, stande glych nid derzue
Bi mängisch stolz und ha mängisch gnue
Und das ghört derzue
Mir hei e Verein, i ghöre derzue
Und d'Lüt säge: Lue dä ghört o derzue
Und mängisch ghören i würklech derzue
Und i sta derzue
6/8
|Am______|E___Am__|________|E___Am__|
|Dm______|Am______|E___Am__|
Nei säget sölle mir
Text & Musik: Mani Matter
Nei säget sölle mir vo nüt meh andrem tröime
Mir wo müesse läben i de gottvergässne Stedt
Wo men uf em Trottoir louft und wenn men über d Strass wott
Mues warte bis me vom'ne grüene Liecht d Erloubnis het
Und we mes nid so macht, de wird men überfahre
Isch das der Ändpunkt vo'r Entwicklig vo füftuusig Jahre
Nei säget sölle mir vo nüt meh andrem tröime
Mir wo müesse schaffe i're gottvergässne Stell
Wo me win es Redli isch i're Maschine
Wo niemer überluegt und wo eim gseit wird was me söll
Und we me nid geng ufpasst wird men überfahre
Isch das der Ändpunkt vo'r Entwicklig vo füftuusig Jahre
Nei säget sölle mir vo nüt meh andrem tröime
Als beschtefalls vo Ferie vierzäh Tag lang am'ne Meer
Wo me Kriminal-Romän list under Palme
Für chly z'gseh wi's wär wenn ds Läben intressanter wär
Bis dass me schliesslich froh isch wider heizue z fahre
Isch das der Ändpunkt vo'r Entwicklig vo füftuusig Jahre
Nei säget sölle mir vo nüt meh andrem tröime
Als sälber einisch z wärde wi di bess're Here, wo
E Swimmingpool im Garte hei und uf Safari
Göh, solang si no ke Härzinfarkt hei übercho
Solang si mit em Merz no i ke Boum sy gfahre
Isch das der Ändpunkt vo'r Entwicklig vo füftuusig Jahre
Nei säget sölle mir vo nüt meh andrem tröime
Mir wo müesse läben i de gottvergässne Stedt
2/4
1. - 4. Strophe:
|Am_______|C_______|________|Dm______|
|G7_______|________|________|Am______|
|_________|________|________|E7______|
|_________|________|________|Am______|
|_________|Dm______|________|G7______|
|_________|F_______|________|E7______|
|_________|
Schluss:
|E7_______|________|Am______|________|
|_________|E7______|________|________|
|_________|Am______|
O wi tumm
Text & Musik: Mani Matter
Chürzlech louft dr Chaschper hei
Stolperet überne Stei
Amne Trottoir und flügt um
Chürzlech louft dr Chaschper hei
Stolperet überne Stei
Amne Trottoir und flügt um
Oh wi tumm, wi tumm, wi tumm
Wi tumm, wi tumm
S'luegt e Frou zum Fänschter us
Und die müpft derby vom Hus
Uf sy Chopf es Granium
S'luegt e Frou zum Fänschter us
Und die müpft derby vom Hus
Uf sy Chopf es Granium
Oh wi tumm, wi tumm, wi tumm
Wi tumm, wi tumm
D'Ambulanz mues jitze cho
Nimmt ne mit und fahrt dervo
Aber plötzlech macht es Pum
D'Ambulanz mues jitze cho
Nimmt ne mit und fahrt dervo
Aber plötzlech macht es Pum
Oh wi tumm, wi tumm, wi tumm
Wi tumm, wi tumm
Ine Muur isch d'Ambulanz
Nüt am Chaschper isch meh ganz
D'Chnoche broche chrüz und chrumm
Ine Muur isch d'Ambulanz
Nüt am Chaschper isch meh ganz
D'Chnoche broche chrüz und chrumm
Oh wi tumm, wi tumm, wi tumm
Wi tumm, wi tumm
Aber zletscht da het me gschickt
Du dr Chaschper wider gflickt
Mit Gumi arabicum
Aber zletscht da het me gschickt
Du dr Chaschper wider gflickt
Mit Gumi arabicum
Oh wi tumm, wi tumm, wi tumm
Wi tumm, wi tumm
Wi tumm
Wi tumm
2/4
|Am_______|________|Dm______|Am______|
|_________|________|Dm______|Am______|
|_________|Dm______|Am______|E_______|
|E7_______|Am__E___|Am__E___|Am______|
letzte Strophe:
|Am_______|________|Dm______|Am______|
|_________|________|Dm______|Am______|
|_________|Dm______|Am______|E_______|
|E7_______|Am__E___|Am__E___|Am__E7__|
|A________|________|
Us emene lääre Gygechaschte
Text & Musik: Mani Matter
Us emene lääre Gygechaschte
Ziet er sys Inschtrumänt
Und dr Chaschte verschwindet
Und er spilt ohni Bogen
Es Lied ohni Wort
Und er treit e Zilinder
Doch drunder ke Chopf
Und ke Hals und ke Lyb
Keni Arme, no Bei
Das het er alles verloren im Chrieg
Und so blybt no sys Lied
Nume das isch no da
Denn ou e Zilinder
Het er nie kene gha
2/4
|Am______|________|Dm______|Am______|
|E_______|Am______|E_______|E7______|
|Am______|________|________|________|
|________|________|Dm______|Am______|
|E7______|Am______|E_______|Am______|
|E_______|Am______|E_______|Am______|
|Dm______|E7______|Am______|________|
|G7______|C_______|F_______|C_______|
|Dm______|Am______|E7______|Am______|
Warum syt dir so truurig?
Text & Musik: Mani Matter
Warum syt dir so truurig?
Wohl, me gseht nech's doch a
Söttet emal öiji Gsichter
Gseh, wenn der sitzet im Büro
Söttet emal öiji Gsichter
Gseh, wenn der fahret im Tram
Warum syt dir so truurig?
S'geit doch so wi der's weit
Frou u Chind sy doch zwäg, im
Pruef geit's geng e chly vorwärts
S'längt doch ou hie und da
Scho für nes chlys Drübery
Warum syt dir so truurig?
Förchtet der das, wo chönnt cho?
Aber dir syt doch versicheret
Gäge die mügleche Zuefäll
Und wenn ds Alter de chunnt
Heit der e rächti Pension
Warum syt dir so truurig?
Nei, dir wüsset ke Grund
Vilicht, wenn der e Grund hättet
Wäret der weniger truurig
Mänge, wenn ds Läben ihm wehtuet
Bsinnt sech derdür wider dra
3/4
|C_______|Am______|Dm______|________|
|G7______|________|C_______|________|
|Am______|________|Dm______|________|
|G7______|C_______|Am______|________|
|Dm______|G7______|________|C_______|