- Создавање
- Во почетокот Бог ги создаде небото и земјата. Земјата беше безоблична и празна и имаше темнина над бездната. Духот Божји лебдеше над водата. И рече Бог: Нека биде светлина. И би светлина. И виде Бог дека светлината е добра и ја оддели Бог светлината од темнината. И светлината Бог ја нарече ден а темнината ја нарече ноќ. И би вечер и би утро, ден први. Потоа рече Бог: Нека има свод среде водата и тој да разделува вода од вода. И создаде Бог свод и ја одвои водата од под сводот од водата над сводот. Така и стана. И сводот Бог го нарече небо. И би вечер и би утро, ден втори. И рече Бог: Нека се собере водата што е под небото на едно место и нека се појави суво. И стана така. И сувото Бог го нарече земја, а собраните води ги нарече мориња. И виде Бог дека е добро. И пак рече Бог: Нека израсне од земјата зеленило - трева што дава семе според својот род и вид и дрво плодородно на земјата што дава плод и има во себе семе според својот род и вид. И стана така. И пушти земјата од себе зеленило - трева што дава семе според својот род и вид а и дрво плодородно што раѓа плод и чие семе е според нивниот род на земјата. И виде Бог дека е добро. И би вечер и би утро, ден трети. Потоа рече Бог: Нека се појават светила на сводот небесен што ќе ја осветлуваат земјата, за да го делат денот од ноќта и да бидат знаци и за времињата и за деновите и за годините, и нека светат на сводот небесен за да ја осветлуваат земјата. И би така. И создаде Бог две големи светила, светило поголемо да управува со денот а светило помало да управува со ноќта, и ѕвезди, и ги постави на сводот небесен да ја осветлуваат земјата и да управуваат со денот и ноќта и да ја оделуваат светлината од темнината. И виде Бог дека е добро. И би вечер и би утро, ден четврти. Потоа рече Бог: Нека произведе водата лазачи, живи суштества и птици да полетаат над земјата под сводот небесен. И би така. И создаде Бог големи риби и секаков вид животни влекачи а кои ги произведе водата според нивниот род како и секаков вид крилати птици според родот нивни. И виде Бог дека е добро. И ги благослови Бог велејќи: Плодете се и множете се и наполнете ја водата во морињата и птиците небесни да се множат на земјата. И би вечер и би утро, ден пети. Пак рече Бог: Нека произведе земјата од себе разни суштества според родот нивни: Добиток и лазачи и ѕверки земни според нивниот род. И би така. И создаде Бог ѕверови земни според родот нивни и добиток според родот негов и секакви гадинки на земјата според родот нивни. И виде Бог дека е добро. Потоа рече Бог: Да создадеме човек според нашиот образ и подобие, како што сме ние, кој ќе биде господар над рибите морски и над птиците небесни и над ѕверовите, над целата земја, и над сите гадинки што се движат по земјата. И го создаде Бог човекот според образот свој, според образот Божји го создаде, машко и женско ги создаде. И ги благослови Бог и им рече: Плодете се и множете се и наполнете ја земјата и господарете над неа и овладајте ги рибите морски и ѕверовите и птиците и сиот добиток и со целата земја и со сите животни што лазат по земјата. И рече Бог: Еве ви дадов секаков вид растение што дава семе и какво има по целата земја и секакви дрвја што во себе имаат семе според својот род и вид, тоа да ви биде за храна. А на сите ѕверови земни и на сите птици небесни и на се што се движи по земјата и во кое има жива душа им ги дадов сите тревни растенија за да имаат да јадат. Така и стана. И виде Бог дека е многу добро се она што го беше создал. И би вечер и би утро, ден шести. Така се доврши небото и земјата и сиот украс нивни. И ги заврши Бог до седмиот ден делата свои што ги направи, и се одмори во семиот ден од сите дела свои што ги создаде. И го благослови Бог седмиот ден и го освети, зашто во тој ден се одмори од сите дела свои што ги направи и создаде. Ете така настанаа небото и земјата во она време кога Господ Бог ги создаде земјата и небото.
- Кликни да се вратиш назад на првата страница со линкови за овој WEB
