GEURAKAN ATJÈH MEURDÉHKA

SEUNAMBÔT 4 DÉSÈMBÈR NIBAK SEKJEN GAM

Alhamdulillah, Sjukô keu Po Teuh Allah Ta'ala. Bahwa uroënjoe geutanjoe bansa Atjèh na lam lindongan Allah Ta'ala. Geutanjoe mantong Neugaséh lé Po Teuh Allah Ta'ala. Alhamdulillah.

Lam tjaèitan peurdjuangan bansa Atjèh, uroënjoe nakeuh uroë peunjata bumoe Atjèh njoe meurdéhka nibak pendjadjahan Indonesia.

Uroënjoe nakeuh uroë keuramat njang geupeulahé 23 thôn njang kalheuëh uléh ulèë-ulèë peudjuang nibak bansa Atjèh njang bak watèë njan geupimpin lé Dr Tengku Hasan Muhammad di Tiro. Uroënjoe, 4 Désèmbèr 1999 nakeuh meubida that ngon 4 Désèmbèr thôn-thôn sigohlom njoe. Uroënjoe geutanjoe bansa Atjèh ta sambôt uroë keuramatnjoe ngon saboh keumeunangan njang ka na lam djaroë. Meunjo bak watèë njang ka u-likôt hanja anggèëta Geurakan Atjèh Meurdéhka njang sambôt uroë djroh njoe bak teumpat-teumpat njang meusom-som, maka uroënjoe ban bandum rakjat Atjèh dan bansa Atjèh njang na lam dônja njoe ka geusambôt deungon bangga dan teubuka.

Salah saboh keumeunangan bansa Atjèh uroënjoe nakeuh keusadaran ngon keinsafan. Bansa Atjèh uroe njoe ka sadar, ka geuturi soë droëgeuh. Ka geuteupeuë toh hak droëgeuh dan ka geutém beudoh djak tuntut hak droëgeuhnjan. Njoe ka leumah bukti nibak uroënjoe dan hana meusaboh bansa pih lam dônjanjoe njang keumah peulanguë lé bansa geutanjoe njoe.

Teuma djinoe lam watèë geutanjoe ta meusuka ria ta sambôt uroë keuramatnjoe, geutanjoe beu-taingat sabé bahwa keumeunagan njang na uroënjoe nakeuh ateuëh keuheundak Allah Ta'ala. Ateuëh hakikatnjan geutanjoe bèk tuwo sagai soë Po geutanjoe. Buët geutanjoe hana makna dan hana meuho udjông meunjo le that ria dan teukabô. Bèk geutanjoe bangga dan peuhèbatdroë, sang sang shit geutanjoekeuh njang po bandum buëtnjoe, sabab singoh akan na ureuëng laén njang leubèh hèbat nibak geutanjoe.

Keu bandum angèëta, peudjuang dan tantra nibak Geurakan Atjèh Meurdéhka, ulôn sibagoë sidroë manusia njang lahé meubansa Atjèh di bumoe Atjèh lôn seuru supaja droëneuh bandum bèk sagai tuwo keusoë dan keupeuë buëtnjoe neupeulaku. Ateuëh hakikat buëtnjoe geutanjoe bandum peulaku keu bansa Atjèh dan meusabab bansa geutanjoe mantong teungoh didjadjah, maka buët geutanjoe beudeuh dab beulagèë njang hakikatnjan, bèk sagai meutuka. Bèk sagai geutanjoe tuwo bahwa bansa Atjèhnjoe kon lahé nibak saboh golongan, maka geutanjoe beutahormat dan ta meudjroh-djroh ngon bandum golongannjan. Bèk sagai tuwo keu Po Teuh Allah Ta'ala.

Beuhantjô Indonesia dan beubagaih meurdéhka Atjèh mulia.

Wabillahitaufik Walhidayah, Wassalamu’alaikum Warahmatullahiwabaratuh.

Teuku Don Zulfahri

Sekjen GAM