點解我要開呢一個 Page 黎講我婆婆呢 ? 吾..我想響我未再次見到佢之前諗下有咩同佢講, 我驚我見到我婆婆既時候, 唔知講咩好?
我婆婆已經一個人生活廿幾年啦, 公公響我未出世之前就已經唔響度, 媽咪話公公好好人, 如果佢仲響度, 實好錫我地, 同成日帶我地去海洋公園玩添呀 ! 可惜我只係見過佢兩張黑白相......
婆婆響我心目中係一個對我好好既人, 點解 ? 唔知呀, 感覺係咁囉 ! 我好記得婆婆成日同我講起我細個既野...佢話俾我聽.....
我細細個o個陣時好 "痴" 我婆婆架, 就算佢去 toliet, 度門都要開住俾我望下佢響唔響裡面 ( 我唔係咸濕...睇埋先啦 ), 我婆婆話我驚佢響裡面走左出街唔會番黎 ( 細路仔諗既野係咁架啦 !) 嘻嘻~~~~~
仲有, 仲有, 有一次婆婆 "咩" 住我去街喎, 咁去到間雜貨店, 佢買完野走啦, 走左冇耐, 望望我, 佢嚇左一跳, 點解 ? 佢見到我 "渣" 住一個 "鮑魚刷" ( God ! 衰妹偷野 ~~~~ ) 我婆婆 "拿拿臨" 拿番個 "鮑魚刷" 俾個佬闆 ! 哈哈 !
我又記得, 我婆婆間屋o個間房o個個窗口旁邊有個好恐怖既月曆, 其實係劃左一個美女響上面, 但因為係人劃既關係, 劃到個靚女好似好兇咁望住你, 我次次去到o個間房, 我到唔敢望o個個月曆架 !
咁有一次婆婆帶我去佢屋企過夜, 理所當然我就同佢訓埋一齊啦 ! 但係我好驚, 點解 ? 一來就係....個靚女月曆對住我訓o個張床架 !!! ( 嘩 ! 天呀 ! ) ... 另外既就係... 唔知大家細個o個陣時有冇聽過, 夜晚唔好同老人家訓埋一齊, 因為老婆婆同老公公到深夜既時候, 佢地會變成吸血彊屍去吸細路仔既血....所以o個晚我好驚, 仲好留意住我婆婆既動靜添, 但因仲係細路仔既關係, 後尾我都係陪周公伯伯玩 ! 嘻嘻~~~
我仲響香港既時候, 婆婆成日打電話俾我地, 而我好鍾意同佢傾電話 ! 好得意架 !
但係...所有野都變成我既回憶, 我一直好擔心佢, 由佢開始越行越慢, 佢又話 : "食得太多蝦, 隻眼開始睇得唔係好清楚", 再加上佢對耳一向聽得唔係好好添, 到我 96 年番香港, 佢話佢唔信見到o個個人係我, ( 但我知佢仲記得我, 因為 95 年佢上過去上海住一排, 響o個度仲成日話 : "呢架車仔我拿俾阿芸玩..." ) 依家, 佢唔行得啦, 要成 日訓響張床度, 仲要人餵佢食野...可能你地覺得好平常, 一個八十幾年歲既老人家梗係咁架啦 ! 但....我第一次見到同感受到老既可怕, 我唔驚自己老, 我只係驚我D親人一直老落去 !......
我好想坐響婆婆旁邊, 再聽佢講好多好多次我細細個D野, 因為佢講緊既時侯, 佢好開心架 ! ...... 我要扶住我婆婆去香港仔飲茶 ! ...... 我要去我婆婆屋企同佢一齊住一齊過夜 ! ...... 我要搵個神仙幫我婆婆有番氣力去食佢最鍾意既杏仁餅同雞仔餅....... 我要...... 我要.........
婆婆, 雖然我冇同你講過我有幾愛妳, 但係我依家好想靜雞雞響妳耳邊講 : "婆婆...我愛妳", 變成我地兩個小小既秘密~~~~~ 只有我同你知 ! 我好想見到你呀 ~~ 婆婆 ~~~~~~~~~
◆◇◆◇
呢頁放左響我個家頁都有一段日子!
今日係最後既結尾, 第一次既 update 亦都係最後既一次 update 呢度!
我又諗返起一件事..... 響我仲係幾細個既時候, 大概係小學一年級, 有一晚, 我唔知點解無端端我爸爸佢打起我上黎, 我被打到喊既時候, 即刻沖入我同婆婆o個間房度, 喊醒我婆婆叫佢黎救我, 我婆婆即刻攬住我, o個次好在有佢, 唔係就真係慘!
響呢段日子我真係好辛苦, 一向有少少堅強既我, 一時之間真係接受唔到呢個事實, 一個由我細細個既時候睇到我咁大既人..... 突然唔再響度..... 唔再俾你見到佢..... 既感覺會係點?
婆婆: 對唔住, 你去既時候我唔響妳身邊, 我一直都好掛住妳, 每次聽到妳有事既時候我真係擔心得要死,依家..... 依家妳已經唔響度, 妳知唔知我真係好唔開心, 每當我自己一個人既時候, 我會諗返起我同妳既野, 之後個鼻就會一酸, 我唔想咁, 但係只有咁做先俾我感覺到妳仲響我身旁, 講緊我細個既事俾我知, 重複重複再重複! 我知妳唔想我喊, 但係我真係控制唔到自己! 但我應承妳, 我會好好咁生活落去! 同俾心機讀書!
婆婆~~~ 我唯一既婆婆~~~~~
◆◇◆◇
© 1997 copyright By SuiMui
