KAMUS SI-PALUI
TIAP hari pakan saminggu sakali bubuhan Palui tulakan ka pasar,
tujuannya kada lain hanya handak balilihat haja.Atawa manukar barang saraba
sadikit kaya timbaku, tali wan kawat unjun, atawa manukarakan kiriman bininya
gasan dapur.Bila tulakan biasanya bakawan-kawan, mulai matan subuh imbah
sembayangan lalu bahanyut basapida, sajam dua jam sampai ka pasar.Imbah
maandak sapida lalu bakukuling, bahanu nang talawas bamandak di wadah urang
bajual ubat atawa di wadah urang bajual minyak harum.
Tapi minggu tadi Palui tulak ka pasar saurangan haja karna kakawalannya
kada kawa umpat sibuk manuntungakan tabasan kabun.
+ Kalu sudah tuntung batutukar lakasi bulik abahnya ai, jangan sampai
tatahan-tahan dijalan kaina kahujanan garing pulang awak ujar bininya.
= Aku paham haja umanya ai, kada usah curigalah kadada jua urang nang
handak wan aku nang kada paduitan ini sahut Palui.
+ Nang dikahadanki urang kada duitnya tapi wayah ini banyak bibinian
nang hakun dimadu dijadiakan bini anum, ujar bini Palui.
= Alhamdulillah, artinya aku ini masih payu haja wan bibinian nang
bujang-bujang, ujar Palui.
IMBAH tuntung bapander, Palui langsung manurunakan sapida buruknya
lalu maninjak laju ampah ka pasar.Balum sampai simpang tiga, Palui malihat
banyak urang bamandakan di pinggir jalan.
+ Satop..... ayu satop, ujar patugas.
= Palui takajut, manggatar lalu mangacak rem sapidanya.
+ Ayu turun matan sapida, adakah sampiyan mambawa lading atawa karis
ujar patugas batakun.
= Kanapa ada musuhkah maka pina bacarian lading wan karis. Wayah ini
jaman aman kada kaya wayah revolusi tadi kita kamana-mana bagagaman tarus
sahut Palui.
+ Itu napa bajujulan di higa pinggang, pasti ada mambawa sanjata ujar
patugas sambil manunjuk ka pinggang Palui.
= Ini.......ini tukul, jawab Palui.
+ Tukul tamasuk sanjata jua, ayu kaluarakan ujar patugas.
= Maaf hajalah, tukul ini kada kawa dikaluarakan,jawab Palui
+ Aku parlu malihat karna tukul bisa jua mambinasaakan urang bila dipukulakan
ujar patugas sarik.
= Tukul ini bawaanku matan halus, ujar Palui pulang.
+ Ayu lakasi buka bajunya, kalu kada sampiyan kutahan kada bulih ka
pasar ujarnya.
= Umailah, karas banar kawal kita ini kada pamarcayaan wan nang tuha
kaya aku ini ujar Palui manyindir.
+ Ini parintah atasan karna kaadaan mancekam, sahut petugas.
Karna dipaksa maka Palui manuruti haja, disandarakannya sapida kapunggung
nyiur lalu bagamat dibukanya baju sambil malihatakan tukulnya di pinggang
nang ganalnya kaya ganggam.
= Nah......ini tukulnya, sudah kupadahakan matan tadi bahwa tukul ini
bawaan matan dalam parut, ujar Palui.
+ Ooooo....... kukira tadi tukul wasi kaya gasan batukang, sakalinya
tukul awak daging tumbuh, ujar patugas.Maaflah, ulun salah kira, ayu silakan
sampiyan batarus ampah ka pasar, ujar patugas imbah mancium tangan Palui.
emhati/fullah KAMUS SI-PALUI