Kisah Bahasa Banjar:

Batatangguhan

= Sambil mahadang dauh tangah hari baiknya kita batatangguhan, ujar Palui wayah dudukan di warung pakacil Isul.

+ Batatangguhan harus bataruh sahut Garbus.

- Aku akur haja, taruhannya siapa nang kalah mambayari nginuman ini sahut Tuhirang.

+ Ikam Lui mulai manyurung pandir ujar Garbus.

= Cuba sambatakan, puhun nyiur itu napa nang kadada babunyi sambatan nyiurnya.Cuntuhnya : batang, batang nyiur; katilambung, katilambung nyiur; palapah, palapah nyiur; humbut, humbut nyiur ujar Palui.

- Aku manangguh “sabut” ujar Tuhirang.

= Sabut, “sabut nyiur” ujar Palui.

+ Aku manangguh, “undayang” sahut Garbus.

= Salah jua karna undayang adalah undayang nyiur ujar Palui.

+ Kalu kaya itu kami mangalah sabarataan, tapi kami handak mambalas ujar bubuhannya.

= Jawabannya nang bujur adalah “tupai”, karna tupai hidup wan makannya dipuhun nyiur sahut Palui.

+ GILIRAN kami manyurung tatangguhan ujar Garbus.Cuba ikam tangguh, matan awak sapi itu apanya nang kada kawa dimanfaatakan manusia.Cuntuh : dagingnya dimakan, tanduknya gasan hiasan, susunya banyak vitamin ujar Garbus.

- Jawabnya gampang yaitu talapak batisnya ujar Tulamak.

+ Talapak batisnya tanduk jua jadi kawa gasan hiasan sahut Garbus manjawab.

- Jawabanku “garubak sapi” ujar Palui, kaya aku tadi manjawab bahwa bagian nyiur nang kada disambat nyiur adalah tupai ujar Palui mambalas.

+ Jawaban ikam salah jua Lui ai, ujar Garbus.

- Aku umpat manjawab ujar Tuhirang, jawabanku adalah dauh masigit ujarnya. + Dauh masigit itu asalnya kulit sapi jua jadi artinya masih kawa dimanfaatakan manusia jawab Garbus.

- Kira-kira jawaban nang bujur adalah tahinya ujar Palui.

+ Sama haja Lui ai, tahinya tapakai jua gasan pupuk, ujar Garbus kada hakun kalah.

= Ayu ja, kalu kaya itu kami mangalah sabarataan kada kawa manjawab ujar Palui.

+ Jawabannya nang bujur matan awak sapi nang kada kawa dimanfaatakan adalah “banyu liurnya” nang balilihan dimuntungnya.Ayu adalah urang nang hakun manginum atawa mamakai banyu liurnya gasan minyak harum, ujar Garbus sambil baampik.

= Jadi kalu kaya itu tatangguhan kita kadada nang kalah wan kadada nang manang.Artinya kadada nang manjamin mambayariakan nginuman ini ujar Palui, sambil manulis bon dibuku cacatan hutangnya.

+ Jadi topik tatangguhan kita hari ini adalah “tupai” wan “banyu liur sapi” ujar Garbus mangalangkang tatawa. emhati/aleks