Kisah Bahasa Banjar:

Kahilangan Hayam

DI KAMPUNG Palui sudah jadi kabiasaan mangawinakan anak-anaknya bila parak bulan puasa.Alasannya karna bulan Syaban sabalum bulan Ramadhan itu tamasuk bulan baik.Tapi disamping itu dimaksudkan supaya pada bulan puasa ada batambah urang di rumah tarutama bagi nang baranak bibinian.Jadi cagar tanyaman manggani’i bangun sahur atawa tulak kalanggar.

= Kalu aku Bus ai, wayah kawin dahulu kada tahu sabab musababnya tapi kabalujuran sama wan nang lainnya yaitu kurang labih tiga minggu sabalum puasa, ujar Palui bakisah wan Garbus.

+ Sama haja wan aku Lui ai karna tagantung kahandak nang tuha-tuha karna sidinlah nang ba-aruhannya sahut Garbus.

= Kawin parak bulan puasa ada nyamannya tapi ada jua kada nyamannya ujar Palui.

+ Kada nyaman karna banyak kurang guring wan karancakan mandi basah baisukannya sahut Garbus.

= Kalu kurang guring itu biasa haja karna kita banyak ba-ibadah kaya tarawih, tadarusan wan bagarakan sahur ujar Palui.

+ Karna samunyaan ini sudah kabiasaan kita maka kita kada kawa baindah sahut Garbus.

= Aku ada pangalaman nang unik wayah hanyar kawin bulan puasa dahulu, sampai sakurungan hayam mintuhaku hilang dicuntan maling ujar Palui.

+ Haw, kanapa maka bisa kaya itu Lui ujar Garbus batakun.

= Tadi ikam mamadahakan bahwa kita banyak kurang guring, tapi aku wayah taguring karna kauyuhan lalu kada kawa bangun sahut Palui.Maklumlah hanyar kawin maka imbah tuntung tarawih wan imbah bagaya wan bini aku tabanyak bapatak di rumah, paham kalu......ujar Palui lihum.

+ Ya, aku sangat maklum sahut Garbus.

= Naaahhh...... karna kauyuhan itulah maka aku guring banar, guring kaya urang mati ujar Palui.Wayah guring itulah rupanya mintuha bini bagarakan mambangunakan biniku karna sidin mandangar ada maling handak mancuntan hayam di kurungan.Karna sidin bibinian maka kada wani manuruni lalu manyuruh biniku manggarak aku nang lagi guring pulas, ujar Palui.

+ Lalu bini ikam manggaraklah Lui ujar Garbus.

= Rupanya biniku takutan, kada wani manggarak aku guring karna dianggapnya bisa manyanyarik apalagi kami masih panganten hanyar ujarnya.

+ Lalu kaya apa kalanjutannya ujar Garbus.

= Karna itulah ahirnya parak sakandangan hayam mintuhaku diangkut maling ujar Palui.

+ Lalu apa alasan bini ikam kada wani mambangunakan ujar Garbus batakun handak tahu.

= Rupanya biniku mambiarakan haja aku guring sampai makan sahur karna bila dibangunakan ujarnya inya cagar kada ka-awakan lagi, cagar makin kauyuhan malayani aku...... maklumlah panganten hanyar masih kumaruk banar bila batamuan ujarnya.

+ Waaahhh, kalu kaya itu larang banar haraga guring ikam itu Lui ai sampai sakurungan hayam jadi taruhannya ujar Garbus.

= Kasihan mintuhaku, banyak banar sidin karugian ujar Palui manyasal. emhati/fulah