- ang hinahangaan ko’y isang baliw
- alagad siya ng sining
- iyon ang natitiyak ko
- sa kanyang kilos at bihis
- sa kanyang mga likha
- isa pa lamang ako noong dalagita
- sukdol-langit na ang aking paghanga
- at kaytayog nang pagtingin ko sa kanya
- bukod sa galing niyang manamit
- (kahit ‘di naman talaga siya pogi)
- talagang marami sa kanya’y bilib
- marami siyang talento
- iyon ang alam ko
- matalinong istudyante
- mahusay na manunula
- katunayan nga’y marami siyang akda
- na ako mismo ang una niyang tagabasa
- at tagahanga
- isa rin siyang pintor
- pintor-kulapol
- naiiba ang kanyang sining
- naiiba ang kanyang ekspresyon
- ang kanyang pagiging malaya
- marami siyang kakatwang kilos
- ‘yan ang napansin ko
- eksentriko
- kung ano ang uso
- sa kanya’y hindi ito uso
- at kung ano ang hindi uso
- sa kanya ito’y usong-uso
- at ‘pag siya nama’y nakiuso
- (o kaya nama’y nagpauso)
- magtataka kang lalo
- kagaya na lamang halimbawa
- nitong pulseras sa paa
- tanggap na naman ito sa ating moda
- babae man o lalake
- o kahit na anong kasarian
- pero lubha siyang naiiba
- kakaibang pulseras sa paa
- ‘yun bagang bagong singko sentimo
- na may butas sa gitna
- tinuhog-tuhog niya ito
- ng sinalapid na hibla ng sako
- at siyang itinali’t ipinalamuti
- sa maputi niyang binti
- aniya’y repleksyon daw ito
- ng mapanghusgang lipunan
- at kulang sa kaluluwang kulturang pilipino
- palibhasa’y manunulat nga
- minsa’y napansin ko siya
- na may salamin na sa mata
- bilog
- pero nang aking masdan
- wala naman talagang salamin
- preym lang
- at ang nakakagulat pa
- sa tuwing kukusutin niya
- ang singkitin niyang mata
- itong pobreng salamin
- ay iniaangat pa niya
- at panaka-nakang bubugahan
- ng kanyang hininga
- sabay punas sa manggas ng kanyang kamiseta
- at alam mo ba, ang kanyang mga akda
- mga akdang siya lang yata ang nakakaisip lumikha
- mga akdang siya lang yata ang kayang umunawa
- mantakin mong pati ang bisyo niyang panonood
- ng triple x sa betamaks
- (at maging ang kanyang paggahasa sa sarili)
- ikinatha ng tulang sa pamagat pa lamang
- ay iiskandaluhin ng tiyak ang iyong kahinhinan
- ayre pa ang matindi
- nang minsang makaisip magplano
- nang pagpaparenobeyt ng kanyang kuwarto
- ang pinakaminimithi raw niyang disenyo
- ay isang silid na mistulang kubeta’t banyo
- baldosa ang sahig
- ang swits ng ilaw ay gripo ng tubig
- ang bukilya ng bumbilya
- ay nasa loob ng dutsa
- bath tub raw ang nais niyang kama
- lababo ang lamesa
- at inidoro ang silya
- pati raw ang kanyang pabango
- deodorant at pulbos
- ililipat niya sa sisidlan ng kloroks
- muriatic acid at albatros
- magkaminsan,
- sa panahon na siya’y abalang-abala sa kanyang sining
- akin siyang pinagmamasdan
- sabay aking paghihinalaan
- na ‘di kaya ito’y naeengkanto
- o ‘di kaya’y nalululong sa damo
- dili kaya’y naaksidente ta’s nabagok ang ulo
- o baka kaya naman
- kulang lang sa buwan nang siya ay isilang
- kaya nga,
- ‘di na rin ako magugulat
- kung mabalitaan kong siya’y pakalat-kalat
- doon sa gitna ng aming plasa
- o kaya’y sa harap ng simbahan
- habang nagbibilang
- ng laksa-laksang layang-layang
- subalit,
- kahit pa maglakad siya ng hubad
- o patuwad
- kahit pa maisipan niyang lumikha
- ng bagong alpabeto’t salita
- at magpasyang manirahan sa ibang planeta
- kahit pa siya’y pagkasunduan
- na ipasok sa mental
- kahit pa siya’y maging ganap na baliw
- o buwang
- o magkatililing
- o magkatopak
- ay patuloy ko pa rin siyang hahangaan
- patuloy ko pa rin siyang iintindihin.
- s’yanga pala,
- ang hinahangaan ko’y ang aking kuya.
1995 / indang, kabite