ang lalaki sa hula

(para kay gie)

 

sa bawat buklat ng baraha

ay pigil mo ang iyong hininga,

ika’y nakanganga

sa minimithi mong pag-asa

 

hinugot sa salansan

ang kahapon ng ‘yong buhay,

hinuhulaan ang ‘yong kahapon

na nais mo na sanang ibaon,

binabalasa ang kasalukuyan

na nais mo na sanang iwan

upang ang hula sa hinaharap

ay iyo nang makamtan

 

apat pang baraha

ang masuyong nakadapa sa tapete

ng iyong kapalaran

na sa iyong mapaniwalaing puso

ay nagpapakutob, nagpapalutang,

binuklat ang una,

bumulaga sa ‘yo ang reynang pula

isinunod ang nasa ilalim

at ngumiti sa ‘yo ang reynang itim

 

saglt na nagmuni-muni

ang magiting na manghuhula,

hinimas ang kanyang bigote

at saka tumitig sa sabik mong mukha

pagkaraka’y nagwika:

"may dalawang babae

sa ‘yong kasalukuyan

na magdidikta ng iyong kinabukasan"

 

nagpatuloy siya sa pagbasa ng baraha,

kagyat na tumingala

ikaw rin ay napatingala

ngunit sa malas

kulabo ang kisame ng pag-asa

wala kang makita

kundi ang agiw ng ‘yong mga gunita

 

muli’y nagtihaya

ng isa pang kartong parihaba

sa nalalabing dalawang baraha,

gumulantang ang haring itim

sa pag-asa mong naninimdim

at isa pang baraha

ang muli sa ‘yo’y naghatid saya

nang malantad ang korona

nitong haring pula.

 

abot sahig ang ‘yong ngiti

sa bagong pag-asang bumati,

tumalilis ang tanong:

sa edad mong kuwarenta y seis

sino kayang biyayang suwerte

ang katumbas ng lalaki sa hula?

 

subali,

kidlat ang katotohanang:

ang hula

ay hula.

ika-25 ng abril, 1997 / kalakhang maynila

Balik sa Main Page l Balik sa Kontents