apartment # 8

 

[klik.

channel 2

volume: 7

brightness/contrast: +34

display: theater]

 

[part 1]

 

walong ga-kahon ng posporo

ang pinagdikit-dikit

sa pinagdugsong-dugsong na andamyo.

tirahan daw ito ng tao

kung panahong ang kulog at kidlat

ay para bagang nag-uunahan.

 

[commercial]

 

sa panabihan nito ay may makipot na kanal.

doon ay may selebrasyong nagaganap.

nagkakarera ang mga beha

na pinapanood ng mga naglulundagang ipis

habang ang mga patay na daga

ay pinaglalamayan ng langaw

na galing sa almusal ng panis na bahaw.

 

dalangin ko’y ‘wag kukulo ang tiyan.

pagkatapos kumain ng hapunan.

ayaw kong makipaglipon

sa anlalawa’t butiki

na nasa loob ng silid-kapanatagan

na gamit ng walong pamilya

kung kaya’t ang labi ng inodoro

ay may lipstik na tae

at kayat ng ihi ng kapit-silid kong babae.

 

[part 2]

 

susubukin kong ipikit itong pagal

na retina. dahil sa bagal

ng ikot nitong bentilador

at hirap na hirap na radyo

sa pagpik-ap ng paboritong istasyon

ang kama ay tila pinrito sa init

kaya kahit pawisan

at nakikipag-apir sa lamok

ay pipilitin kong matulog.

 

[lipat ng channel:]

 

bubuuin ko sa aking balintataw

na ang mundo’y hindi pa magugunaw.

iisipin kong magagandang binibini

ang nag-uumpok sa labas

sa halip na pulutong ng mga

kalalakihang naglalaro ng tong-its.

kunyari ay isang konsiyerto

na may nakakabusog na tugtugan.

hindi hiyawan

nitong aking kapit-bahay

na puro putang-ina

ang naririnig sa kanila,

na tuloy ay nagpapahumpyak ng aking sikmura.

 

iimadyinin kong ako’y nasa halamanan

nang mababangong orkidyas

o kaya nama’y kabukiran,

amoy pinipig

kung panahon ng anihan.

at nang ‘di manuot sa ‘king ilong

ang samyo ng lansa ng palengke.

at itinapong hasang sa kanal.

sawa na sa makahikang amoy ng katol

at usok ng sigarilyo

sa binilad kong damit

at sa turete kong isipan

ay laging nakakulapol.

 

sana’y wala ako rito

dito sa bahay na inuupahan

kundi’y nasa sariling tahanan

katabi ang paborito kong unan

habang gumagawa ng tulang makabuluhan

‘di tulad ng iyong natunghayan

nakakaduak kung titikman.

 

[klik]

 

ika-26 ng mayo 1994 / nasugbu, batangas

 

Balik sa Main Page l Balik sa Kontents