asul ni axel

punit at kupas na ang aking maong

nakakatamad lumabas, tila yata aambon

upos ng sigarilyo’y akin na ring itinapon

kasama ng damdaming nakakulong sa kahon

 

‘di ako kayang aliwin ng maingay kong musika

kahit pa ng alak na ang hatid ay pait at pakla

‘di ako kayang pakalmahin ng balisang usok

kahit pa ng pagsuyong pangungutya ang dulot

 

sa loob ng nabubulok at aburido kong silid

ay may mata ng halimaw na pilit sumisilip

nanunukso at nakadila sa nabibiyak kong dibdib

hatid ay mapusyaw na kulay sa nakakalat kong isip

 

papasukin ko ba ang pintuang nag-aapoy?

sasalungain ko ba ang takot na dumadaloy?

gayong.....

sa bawat pagtatangkang umahon sa lagkit ng kumunoy

ang katawang lupa ko’y tila sa kawalan pa rin ang tuloy

ika-2 ng hulyo 1995 / kalakhang maynila

 

Balik sa Main Page l Balik sa Kontents