balitang gasgas
- pagsabog ng may bahid-dilim pang liwanag
- sa siwang ng atip na kinakalawang,
- nag-inat ang mga kumakalam na sikmura’t
- tumilaok ang mga ‘di pa nangaghihisong bunganga.
- dumapo itong mainit-init pang diyaryo
- sa sabik sa pahinga kong mga kamay,
- at nagpanagpo ang tinta ng peryodiko
- at ang mga nakasingsing kong kalyo.
- ang balitang gasgas ay nakakatakot.
- nakakarimarim.
- halos humimay sa aking laman
- ganap na nagpawala ng gana
- sa isang amusal na walang ulam.
- tatlong parte ng katawan:
- pugot na ulo,
- kulang sa daliring mga kamay
- at kabiyak na suso
- ang magkakahiwalay na natagpuan.
- walang saksi ayon sa pahayagan.
- op-dyuti ang kerteyker ng kapayapaan.
- nakahilata sa tsapang pananggalang
- sa sarili nilang kabuktutan.
- nakasampay sa adik na upuan
- ang uniporme nilang ‘di ginamit
- sa ‘di makitang katotohanan.
- ‘di makita?
- o sadyang ipininid la’ang ang mga mata?
- at ang naunang naglakas ng loob
- na ang biktima’y masdan
- ay ang walang buhay na kislap ng kamera.
- tanging ang bulaan at lukot na pahayagan
- ang naging saksi’t kanlungan
- ng ginutay na katawan
- at pinaslang na buhay.
ika-20 ng mayo, 1994 / nasugbu, batangas