byuti kontes

kung maganda ka at seksi, sumali ka sa timpalak

sa tatanghaling mutya, ang gantimpala ay limpak

basta’t ikendeng ang lakad sa entabladong karnabal

at pagbutihin ang sagot sa mga katanungang hangal

 

kung bulinggit ka pa at ang dibdib ay munti

sa tanghaling pakontes ng mga komedyante sumali

nagkabisa ng tula o mag-hawaiian dance kaya

puwede ring magpakabaliw na katulad ni sisa

 

kung dalagita ka naman, basta ba’t may pustura

ngumiti nang kay landi hanggang mangalay ang panga

ipakita ang singit hanggang mata nila’y lumuwa

at pang-kalendaryo na ang pinagpantasyahan mong mukha

 

may papremyong losyon para sa binting pinakamakinis

may pabaong tutpeyst sa ngiting pinakamatamis

trip to hongkong naman para kay miss kalamismis

magiging modelo ng panti’t bra ang katawang kurbada

at ‘pag nagustuhan ni direk, may kontrata ka sa pelikula

 

‘di bale nang baluktot ang ingles

basta’t alam kung alin ang "no" at alin ang "yes"

"di bale nang makita ang kaluluwa

kung kaluluwa mo nama’y naka-setro’t korona

at saka mo maiintindihan,

ang eksploytasyon may bago nang katawagan:

"mga kababayan!

ang prestihiyosong byuti kontes, inyong tunghayan!"

 

ika-26 ng marso, 1996 / indang, kabite

 

Balik sa Main Page l Balik sa Kontents