‘di ko

‘di ko akalain

na sa aking pamamaybay

sa pilapil ng buhay

ay nariyan kang masuyong aagapay

sa aking mga pagkakadupilas

 

‘di ko akalain

na sa aking paglalayag

sa lawak ng dagat

ay nariyan kang masuyong sasagip

sa aking pagkalunod

 

‘di ko akalain

na sa aking paglipad sa tayog

ng langit

ay nariyan kang masuyong aalalay

sa aking mga baling pakpak

 

akalain mo nga naman

 

ika-26 ng setyembre 1998 / indang, kabite

 

Balik sa Main Page l Balik sa Kontents