diyos

 

noong ako’y tatlong gulang pa lamang

at medyo meron ng wisyo at konting alam

ang sabi ng nanay ko

meron raw isang diyos.

tinuruan niya akong mag-antanda’t magkurus:

paggalang raw ito.

 

noong unang baytang ko sa primarya

ganito rin ang itinuro ng maestra

at dahil ako’y puwede nang lumakad mag-isa

tuwing araw ng pangilin

ay lagi ko siyang binibisita.

 

noong pagtuntong ko sa hayskul

biglang nagbago ang aking paniniwala.

dalawa na ang diyos!

una ‘yung itinuro ni inay at ng titser

ang pangalawa’y ang maskuladong si gener

ang diyos at hari-harian

sa aming barkadahan.

 

noong ako’y kumukuha na ng kurso

ang paniniwala ko’y lalong gumulo.

marami na ang diyos:

ang binibisita ko t’wing linggo,

‘di lang iisang gener

naragdag pa ang teror kong titser.

at ang bago kong nakilala

na mistulang haring aso

na walang setro’t korona

na kung tawagin ng mga tuta nila

ay panginoon at amo.

sila ang kumukontrol at nagpapahirap

sa bayan kong malapit nang gumuho

sa disenyong ipinaanyo

ng mga dayuhang ‘di naman taga-langit

bagkus ay sa dagat-dagatang apoy ng impyerno

sila nagpapasasang nakalikmo.

 

ngayong ako’y beinte dos anyos na,

‘di ko na alam ang paniniwalaan

sa rami ng kanilang pangalan

sa dami ng relihiyo’t mananampalataya

at p’wedeng sampalatayaan.

siya bang nakadipa?

ang matatapang ba’t siga?

sila bang burukrata kapitalista,

at sampu ng mga amo nila?

o ang bago kong idinadambana?

ang supling kong iniwanan ng ina.

ika-7 ng hunyo 1994 / nasugbu, batangas

 

Balik sa Main Page l Balik sa Kontents