- habang ako’y nabubuhay
- at bago ako mamatay
- habang ako’y nabubuhay
- at bago ako mamatay.....
- pareng joel,
- sumusumpa ako sa harap
- ng larawan ni gary granada
- na ako’y kumpare mong walang sawa
- sa pagdinig at pagsasadiwa
- ng iyong mga awit at tula
- habang ako’y nabubuhay
- at bago ako mamatay.....
- ito’y isang sumpa, etram
- sa dulo ng iyong patalim
- na palagi kong papatulan
- ang iyong mga debate’t argumento
- mga pilosopiya’t kapilosopohan,
- na instrumento sa aking paghahanap
- ng aking mga nawawalang pangarap
- habang ako’y nabubuhay
- at bago ako mamatay.....
- kasamang rizal,
- aking isinusumpa sa titis ng marlboro
- na hinding-hindi ako mauuta
- na umagapay sa pinapanday mong mga katha
- habang ako’y nabubuhay
- at bago ako mamatay.....
- sumusumpa ako sa pinagtasahan ng lapis
- lito,
- na ako’y tagahanga
- ng iyong mga dibuho, larawan
- na sa ating lipuna’y nagsasadula
- habang ako’y nabubuhay
- at bago ako mamatay.....
- jojo,
- ako’y sumusumpa
- sa paborito mong ska
- na hinding-hindi ko
- isisiwalat ang ating sikreto
- kahit pa gantimpalaan ako ng palasyo
- habang ako’y nabubuhay
- at bago ako mamatay.....
- pi’sang rommel, aking isinusumpa
- sa harap ng phone booth sa plasa
- na dadalhin at gagamitin ko
- ang magkatulad nating apelyido
- rebulto man ni don severino’y gumuho
- habang ako’y nabubuhay
- at bago ako mamatay.....
- ito’y isang sumpa, bangge
- sa kaluluwa ni hendrix
- na kahit pa sinong gitarista
- ang aking makaharap
- ang ngilngil pa rin ng iyong gitara
- ang lagi kong hanap-hanap
- kung kaya,
- habang ako’y nabubuhay
- at kahit ganap nang malamig na bangkay
- isang pakiusap, maaari ba?
- na inyo ring isumpa
- sa harap ng poster ni sid vicious
- ang patuloy n’yong pagbasa
- sa aking mga tula
- kahit ba ako’y isa na lamang alaala
unang araw ng taong 1997 / indang, kabite