kaibigang gitarista

(para kay pareng joel)

 

psst. kaibigang gitarista

paringgan mo naman ako ng kanta,

‘di pa ako inaantok

at ‘di ko rin alam kunsaan pupunta.

 

psst. kaibigang gitarista

paringgan mo naman ako ng kanta,

at sa makabuluhan mong himig

ay sasabayan kita.

 

sabay nating kathain

ang ating pangarap

na buhat sa panaginip

ng malupit nating daigdig

na ang kapanataga’y tuluyan nang ipinagkait.

 

likhain natin ang pinakamagandang awitin

na magpapaalab sa bawat damdamin

ng mga kababayang nahihimbing

sa tinig mo’y sila’y iyong pabangunin.

 

pasayawin natin sila,

paawitin natin sila,

pasipulin natin sila,

papalakpakin natin sila

sa tulong ng matatalim na kwerdas

ng kulay langit mong gitara.

 

psst. kaibigang gitarista

paringgan mo ako ng kanta,

kanta ng pag-ibig,

pag-ibig sa daigdig,

sa daigdig ng panaginip.

 

psst. kaibigang gitarista

paringgan mo ako ng kanta,

‘wag ka agad mapapagod

dahil ‘di pa ako inaantok

at maging libreng pangarap

ay sadyang kayramot.

 

sa makabayan mong melodiya

sasabayan kita.

ika-7 ng oktubre, 1994 / nasugbu, batangas

 

Balik sa Main Page l Balik sa Kontents