- kapirasong dugo
- (alay sa mga nanay at tatay)
i. paano binuo?
- pingkian ng pawisang katawan
- habang tinitiis ang gabing maalinsangan
- at nang ang kapirasong dugo
- ay tuluyang mabuo.
- ito’y bunga ng pagmamahalan
- (at kunminsa’y pagbubuntalan)
- na may sangkap na indayog ng balakang
- at pagsasanib ng likidong hininga
- ng nagsusuyuang sinapupunan.
- hindi nila inda ang pagod
- sa maghapong kayod,
- ang tanging nais ng isipan - - -
- itong obaryo ay mapunlaan.
ii. paghihintay.
- siyam na tatlumpung paglubog at pagsikat
- nitong haring araw ang ipinaghintay.
- inaalagaan, pinaaasiman,
- sa bitamina’y sinusuplementuhan.
- pinakikiramdaman ang mumunting sikad,
- ipinagsulsi ng baru-baruan
- para sa nakasasabik na paghalik ng liwanag
- sa may bahid lamad pa n’yang katawan.
- at sa nakakainip na paghihintay nang pagkalagas
- nang nagkaka-edad na pilas ng dahon ng kalendaryo,
- ang kapirasong dugo ay naging kumpleto.
- hindi lamang dugo - -
- may kaluluwa, may laman, may buto.
iii. mga pangarap (unang bahagi ng mga "sana")
- sana’y maging inhinyero,
- kailangang-kailangan ito sa bansang Arabo.
- sana’y maging doktor,
- para gumamot sa aking alta-presyon.
- sana’y maging pulitiko,
- pinuno ng nasyon.
- sana’y maging abugado,
- eksperto sa pagnunotaryo.
- sana’y maging pulis,
- sikat at laging laman ng diyaryo.
- sana’y matupad itong matataas na pangarap
- dahil ayaw na kung saan lang bumagsak
- itong magiging paboritong anak.
- ayaw maging magbubukid, na bubungkal sa lupa.
- ayaw maging karpintero, na sa mga pagawaa’y bubuo.
- ayaw maging pabrikante o obrero
- na laging pawisan at mabaho.
- mga manggagawang hindi na sikat
- ay singliit pa ng langgam sa lansangan,
- na twina’y maraming ipinaglalaban
- kahit kapalit ay hungkag na tiyan,
- sa mga kasagutang walang katiyakan.
iv. ang pagdatal.
- sumapit na ang oras na pinakaaasam.
- paghihirapan, pagtititisan,
- iiri, halos matuyuan ng laway.
- habang ang nakapantalo’y nakapamewang,
- tambak na ang beha sa paghihintay.
- siya man ay parang mapapatai rin,
- kinakabaha’t pinagpapawisan ng butil-butil.
- panalangin niya sana ay normal
- at huwag biyakin ang tiyan
- dahil takot siyang magastusan.
- operasyon . . .
- lagitikan ng gunting na pagulong-gulong
- sa pawisang guwantes na panay ang sulong.
- walang anestiyang sa kanya’y tumulong.
- heto’t hawak na ang sinulid at karayom.
- hay! salamat. sa wakas ay nalagpasan
- ang makipot na sipit-sipitan
- nitong animo’y dagang bagong silang.
v. pag-aalaga (ikalawang bahagi ng mga "sana")
- sana’y ang pagkakita ng liwanag
- ay maging tanglaw sa karimlan
- sana’y ang unang uha
- ay mga salitang matalinghaga
- at sigaw ng katotohanan.
- sana’y ang pinutol na pusod
- na inilagay sa kisame
- ay mag-akyat ng maraming plake.
- sana’y ang inunan
- ay maging unan ng bayan.
- sana’y ang munting hininga,
- sana’y ang pinahid na lamad at dugo
- ay handang ibuwis upang bansa’y mabuo.
- sana’y ang donselya pang isipan
- na tulad ng matabang punlaan
- ay hindi mahasikan
- nitong binhi ng kasamaan
- at maging ugat ng kabuktutan.
- ika-26 ng mayo 1994 / nasugbu, batangas