kapirasong paghanga

(para kay romina)

 

babae

kang nag-aalyas sa pangalang lalake.

 

peminista

kang sandata’y panulat ng isang aktibista.

 

kamag-anak

kitang, ‘di naman natin ganap na tiyak.

 

ganunpaman,

isang paghanga ang aking naramdaman

sa mga akda mong natunghayan

ng mga retina kong

tulad rin ng mga mata mong

mapagmasid

sa ating paligid

at

anluwage

ng mga kathang-damdamin.

 

sana ang mitsa sa mithi mong pagbabago

ay patuloy ang ningas

tulad ko

maski sa tugma’t ritmo man lamang

nagnanais na mapaalab

pag-ibig sa ating bayan.

 

ika-3 ng hunyo, 1996 / indang, kabite

 

Balik sa Main Page l Balik sa Kontents