kuwentong patay-sindi

panay ang giling ng murang katawan,

sa tiyempo ng tugtog na sinasaliwan

ng malamyos na galaw

ng maliit na bewang

nitong babaeng manibalang.

at pagdating sa korus

ng kantang iniindakan

sabay titingin ng malagkit

sa mga manonood

na halos matuyuan ng laway

sa pag-aantay nang tuluyang paghuhubad

ng seksing mananayaw.

 

sigawan, palakpakan at sipol

sa ibabaw nang nagkalat na suka

at kayat ng malansang tamod.

lasing at malagihay na

dahil sa serbesang nainom.

ano ba ang ginagawa

ng mga kalalakihan sa loob,

nagrerelaks ba

o nagpapalipas ng libog?

 

magteteybol.

o-order ng ladies drink

para mawili ang babaeng hubo.

konting tsansing, konting lamas

at konting hipo,

nang sa gayo’y makuntento

at masulit ang ibinayad na piso.

order pa, isang round pa

hanggang sa malango.

 

kanya-kanyang drama,

mga gasgas na drama.

"binata ako at walang asawa,

manedyer pa sa isang malaking kumpanya."

"ako nama’y mayaman at maraming pera."

"sir, ‘wag n’yo naman akong bastusin,

napilitan lang ako sa aking trabaho

dahil sa bahay ay maraming gastusin."

"labandera si inay,

lasenggo at tambay si itay

kaya sarili kong puri’y aking hinalay."

 

ay, ewan!

‘yan talagang buhay na panggabi

kahit ano pang paliwanag,

kahit ano pang katwiran,

talagang talamak na ang sakit ng lipunan

na pagba-bargain

at buy and sell ng sariwang laman.

 

pulang ilaw na patay-sindi.....

mababang lipad na kalapati.....

 

1993 / dasmariñas, kabite

 

Balik sa Main Page l Balik sa Kontents