lover’s lane

bago pa man tayo nagkahiwalay

bago pa man ako nagkaroon ng kapalit sa ‘yong buhay

bago pa man nagbunga ang ating pagmamahalan

bago pa man tayo pinag-isa ng batas at simbahan

bago pa man naganap ang unang pagsasanib ng ating katauhan

bago pa man kita sa iyong thesis ay tinulungan

bago pa man nangyari ang ‘di mabilang na singhalan at lambingan

bago pa man kita nayakap at nahalikan

bago pa man ang ating unang date sa jollibee sa baclaran

bago pa man tayo naging magkasintahan

bago pa man na ika’y aking inagaw sa dati mong katipan

bago pa man ika’y aking sinuyo at niligawan

bago pa man na ako’y naglakas-loob na ika’y ihatid at sabayan

 

at,

 

bago mo pa man natanggap ang una kong humahangang liham

 

ay

 

nauna na riyan

ang matiyaga kong pag-ukit ng iyong pangalan

katabi ng aking pangalan

sa loob ng disenyo

ng isang payak na puso

doon sa balat ng puno ng kaymito

sa may lover’s lane

 

marso 1995 / indang, kabite

 

Balik sa Main Page l Balik sa Kontents