nakakainggit sila

nakakainggit ang apoy sa siga

na naghihintay na lang sa kanyang paghupa,

at sa pagsanib ng kanyang usok

sa mga ulap doon sa bundok.

maging ang butiki

ay namamahinga na sa tabing bintana

matapos humalik at magbigay-pugay

sa lupa.

nakakainggit si vincent;

iiyak, tatawa, iihi, tatae,

tatahimik

‘pag nasubuan ng dede.

nakakainggit si diane;

kuntento na sa hapunang buto,

walang pagod sa pakikipaghabulan,

walang sawa sa pag-aaruga

sa kanyang pitong supling

na bago pa lamang natututong tumakin.

 

samantalang ako,

maski siguro ikaw,

o maging sila ay sakbibi ng pangamba

ang ‘di lubos na kilalang katauhan

sa mga ‘di mahagilap na kasagutan

ng mga katanungan sa buhay.

 

"nais kong maging apoy sa siga

‘tas ay maging usok

at maglaho kapag natupok.

nais kong maging butiki

tumalatak na lang kung gabi

nais kong maging sanggol muli

‘tulad ni vincent,

basal sa kainosentehan.

nais kong maging tulad ni diane

kahit bantay lang ng tahanan"

 

 

ika-12 ng hulyo 1995 / lungsod ng heneral santos

 

Balik sa Main Page l Balik sa Kontents