paano kung wala ka na?
- pag-alpas ng iyong ispiritu
- mula sa mahubog mong katawan,
- matapos na alisin
- ang natatanging takip ng iyong kabuuan
- ay aking lalasapin,
- aking sisimsimin,
- at aking dadamahin
- ang naiiba mong bango
- dito sa aking dibdib.
- dahil sa tindi ng sarap
- at ginhawang ipinalasap,
- iyong tinighaw ang uhaw
- ng pagod kong isipan
- at pata kong katawan.
- kaya ayaw kong mangyari,
- ni ayaw kong isipin,
- ‘pagkat ‘di ko yata kaya
- ang ika’y mawala
- dito sa buhay ko
- na sa tuwina’y pagod
- naging kabahagi ka na.
- ‘di ko papayagang
- basta ka na lamang mawala
- sa mundo kong ginagalawan.
- ‘di ko rin papayagang
- lumipas ang maghapong
- ‘di ka natitikman.
- para patunayan sa ‘yo
- kung gaano ka kahalaga,
- kung gaano ka kamahal sa akin,
- ay aking nanamnamin,
- aking sasairin
- ang pinakahuling patak,
- ang natitira mong tamis
- na naiwan at natira
- sa labi ng botelya
- na iyong sisidlan.
- iba talaga ang sensasyon
- na hatid ng sarap
- ng bagong bukas
- at malamig
- na sopdrinks.
- paano kung wala ka na?
hunyo 1994 / nasugbu, batangas