- pakaiingat ka, indang ko
- lupa kang minamahal, sa mundong isinumpa
- sa daigdig ng dahas, kakambal mo’y digma
- ngayo’y kinakatok ng dayuhang mapanira
- kaunlarang mapait sa matatamis na dila
- bantay mong mga payasong de-pangil ay ‘di maaasahan
- sapagkat napipi na sa salaping gahamang sinakmal
- sila’y nalunod na sa maburak na balon ng kamunduhan
- kaming mga anak mo ang ginagawa nilang timbulan
- pakaiingat ka , minamahal kong indang
- mga nakamaskara ang tunay mong kalaban
- ang alay nilang pag-ibig sa katapata’y salat
- pagkagahamang punla, pumapatay pagsambulat
- kaya’t narito kami ngayon, bigkis at natitipon
- iisa ang adhikain, mga palad ay kuyom
- handang makihamok, nakahandang magtanggol
- para sa iyo indang ko, kahit buhay idudulog
- kaylan ma’y di ka hahayaang: kahuyan mo’y putulin
- kaylan ma’y di ka hahayaang: hangin mo’y bihagin
- kaylan ma’y ‘di ka hahayaang: ilog mo’y lasunin
- lalong lalo’t di ko hahayaang: kalayaan mo’y sikilin
- pakaiingat ka, minamahal kong indang
- ang ating kaaway, naglantad na ng kulay
- ngiting kinapital, salitang pinuhunan
- may mapanilang layon sa kanyang upuan
- ngunit pakaasa kang bigkis kami’t natitipon
- pag-ibig sa ‘yo bayan ko, sa puso’y nakabaon
- kung ika’y lupigin, nakahandang magbangon
- palalayain ka bayan ko, pagkatapos ng daluyong
- ika-20 ng setyembre, 1996 / tagig, kalakhang maynila
- Balik sa Main Page l Balik sa Kontents