- ta - ka - tak
- (talambuhay ng isang manunulat)
- ipinanganak kang kakambal ay teklado ng makinilya
- ang mga kamay mo’y papel at tinta
- ang mga paa mo’y sa karanasan nabihasa
- at pintig ng puso mo’y mga kuwento at tula
- ang bawat hininga mo’y hinga ng pakikipagsapalaran
- kaya’t ang bawat kilos mo’y dagdag na karanasan
- at ang nahahabing ala-ala sa pahina ng iyong isipan
- ay tula, sanaysay, nobela’t katha ng ‘yong kasaysayan
- ang pagbabagong anyo ng utal mong kamusmusan
- ang patuloy na paglago ng ‘di bihasa mong asal
- ay matalas na dila ng pinanday mong katauhan
- at batikang tilamsik ng kilos mo sa lipunan
- ngayong ganap ka nang anluwage ng akda at katha
- tahanan mo’y nalikha sa haligi ng mga puna’t paghanga
- ang yero ng katotohanan ang panabing mo sa luha
- mga pundasyong hatid ay kalayaan at tuwa
- umiinog ang mundo mo sa piniling landas
- kasabay ang pag-ibig, galit, mga damdaming wagas
- dito na muling tumahak pabalik ang bukas
- sa kahapon na iniwanan na ng ‘yong buhay at bakas
Ika-27 ng mayo 1996 / umuulan /indang, kabite