trenta

(para kay cora at sa tulad mo pa)

 

ha?

sa edad mong trenta

ay dalaga ka pa?

at anong sabi mo?

ika’y nabubuwisit

sa paghihintay sa nakakainip

ng iyong pinakakaasam

na pakikipag-isang dibdib

(at syempre sa unang gabi ng pakikipagtalik).

 

batid ko sa lamlam ng ‘yong mga mata

ang prustrasyong nadarama,

ang ‘yong pagkasawa

at ang iyong pangamba

sa bangungot ng pagtandang-dalaga.

‘wag mong sisihin ang pekeng nadama

ng mga lalaking iyong idinambana

 

‘wag mo ring sisihin ang taglay mong ganda

‘di naman hitsura’t edad ang nagdirikta

nang pagsapit ng kaganapan ng saya.

 

‘di nga ba’t ang kapalara’y

‘di naman isang pagkakataon,

‘di rin ito napipilit

‘di ito pag-aala tsamba.

ang kaganapan ng pangarap

ay nasa tapat na pagharap

sa reyalidad na nagaganap.

 

mayroon akong panukala:

mamasyal ka ng ilog mamaya

baka roo’y iyong matagpuan

ang prince charming

mong palaka.

ika-17 ng mayo, 1996 / indang, kabite

 

Balik sa Main Page l Balik sa Kontents