trip to jerusalem
- nahilo ako nang nahilo
- sa pag-ikit sa nakabilog na mga bangko
- at kahit mamahalin ang sala set ko
- sa inosenteng silya’y nakikipag-agawan ako
- nahilo ako nang nahilo
- sa pag-aasam sa ‘pinangakong premyo
- at kahit ang musika ay hindi gusto
- panay ang kendeng ng balakang kong puro buto
- pumailandang muli ang pangpinal na tugtugin
- para indakan at ikutan namin
- kaming dalawang huling kalahok
- ang nagsasayawan,
- nagbabalyahan,
- at nagpapakiramdaman
- parang mga buwitreng nakaabang
- sa pagsila sa sisiw na upuan
- diniinan ng opereytor ang stop button
- at bago pa nakadamba ang patpatin kong puwitan
- sa naiinip na upuan
- ako’y
- nahilo nang nahilo
- nahilo nang nahilo
- sa isang pamosong laro
- nahilo nang nahilo
- sa matining na ikit ng mundo
- nahilo nang nahilo
- tungo sa aking pagkatalo
- nahilo nang nahilo
- nang ‘di man lang nakilala si kristo
ika-28 ng nobyembre 1998 / indang, kabite
- Balik sa Main Page l Balik sa Kontents