twentiyet

(alay kay bulkang taal)

 

pitumpu't-pitong pares ng paa

ang sabik na nagkita-kita,

nagsama-sama.....

mithiin ay iisa

ngayong araw ni kupido

ikaw - bulkang taal.....

ay maakyat at makasuyo

 

sa duyan ng alon at awit ng lawa

ituktok mo bulkan ay aangkinin

ng kislap ng aking kamera

sa pagitan ng mga tagay,

tawanan at hiyawan

ay naroroon ang pagnanasang

kalikasan mo'y makaulayaw

naroroon ang pananabik

na maikumot ang mga bituin mo sa langit

naroroon ang natatanging mithiin

na lupa mo'y maging banig

sa gabing, ang anggi ng lawa mo'y

lamig at kapayapaan ang hatid.

 

pangahas ang bawat hakbang,

'di pansin ang init ng iyong hininga

na sa aking katawang-lupa ay tila umiiga

sapat na ang kagustuhang ika'y aking marating

at sa 'yong kagandahan

magsawa ang aking mga retina.

 

mga bago at lumang kakilala

ang sa bulwagan mo taal ay aking kasalamuha

ang magkarelasyong si may at terry

ang dati nang kakulitang sina egay at tony

ang giyang sina sir manoy, sir mar at sir rex

ang batikang grupo ni batman at ed,

si pedro, si arnold, si marie at marami pang iba

mga pangalang 'di ko na maalala

ngunit, isa lang ang tiyak

mga ngiti nila'y mananatiling nakatatak

sa pangahas kong isipan

at sa pahina ng bago kong karanasan.

 

tila yata nagtataka ang bilog mong buwan

sa aming tawanan

maaring ikaw lawa'y nagtatanong rin

kung ano ang aming pakay sa mabato mong pampang

magsaya lang ba't malasing?

tumakas sa tudyo ng kawalang kasuyo

ngayong araw ng mga puso?

o para ibandera ang bagong medyas na thorlo?

ako rin ay nagtatanong sa aking sarili

pagtakas ba ito sa ulol na sibilisasyon?

 

nilulunod ng bawat tagay

ang lalim ng paghikbi

saksi ang laway at suka

na iniluwa ng gabi

sumasayaw ang hampas ng alon

natutusta ang pulutang fishball

bawa't isa'y unti-unting nabubulol

sa himig ni marley at cabangon

at kasabay ng huling patak ng alak

ipinaghele mo bulkang Taal

ang bawat isa amin

sa duyan ng iyong kalikasan.

 

mahapdi ang unang haplit ng sinag ng araw

ginigising ang bubong ng aking tent.

kaylangan ng bumangon

sa umagang ang hikab mo'y

amoy alak

amoy upos ng sigarilyo

ang tamis ng nagdaang gabi'y

may bahid ngiti sa 'yong labi.

at sa aking pag-uwi

isinilid ko sa aking backpack

ang basyo ng bote ng alak

na saksi sa kasiyahan at karanasan

ang plastik ng basura

na 'di bagay sa 'yong kalikasan

ang bawa't huni ng uwak

na 'di ko maririnig sa siyudad

at ang pinakahuli,

maingat kong itinupi

ang sumibol na bagong mithi

na ikaw bulkang taal

ay babalikang muli.

.....para sa isang bagong karanasan

.....para sa isang bagong tula

 

araw ng mga puso 1997 / sto. tomas, batangas

 

Balik sa Main Page l Balik sa Kontents