unang araw ng pasukan
- pagsakay ko kanina sa dyipni
- tungo sa opisinang pinaglilingkuran
- nakasabay ko itong mga istudyante
- na sa tingin ko’y handang-handa
- para sa unang araw ng klase.
- pero nang igala ko itong paningin
- ay akin ring napansin
- ang mga iskwelang ‘di pa paanyo
- dahil mukhang bitin pa sa bakasyon
- na kanilang iginala’t ipinaglaboy.
- ito’y kita sa mga ‘di nasuklay na buhok,
- anyong ‘di na nakaligo,
- sa mga matang pupungas-pungas
- na ang kulapol ng muta’y
- ‘di na pinunas.
- nakakalibang pagmasdan
- ang kanilang yabangan
- ng kanilang bagong biling bag at notbuk
- na ang disenyo ng pabalat ay larawan
- ng paboritong artista’t basketbolista.
- mga bagong unipormeng polo
- na kay tikas ng tindig ng mga kuwelyo
- sanhi ng pulidong almirol nito.
- mga bago’t nagkikintabang sapatos
- na nalimutan nang alisin ang etiketa.
- pero sa kanilang lahat,
- ang lalo kong pinagmasdan
- ay ang hitsura ng bata sa aking tapat.
- lasa ko’y sarili lamang ang naihanda
- (dahil amoy bagong paligo siya).
- walang dalang bag,
- ni lumang notbuk o pad.
- tanging ang pudpod na mongol
- na ang pambura’y pudpod
- ang sa bubot niyang palad ay nakakuyom.
- naninilaw na ang gusot na kamisetang
- ang imprenta’y ngalan ng sikat na panlabang sabon.
- ang kabiyak na dahon ng istepin niyang suot
- ay kalawanging kawad ang tanging naghuhugpong.
- ako sa kanya ay naawa,
- dahil ‘di ko ito naranasan
- noong ako’y isang istudyante - - - - -
- kaya ipinagbayad ko siya ng pamasahe.
hunyo 1994 / nasugbu, batangas