KAMUS SI-PALUI

Baju Hijau Saragam

DAHULU wayah rami siskamling di kampung Palui, hampir samunyaan pamudanya saban malam umpat kamling. Ada nang bubujuran batugas tapi kada sadikit nang hanya umpat bararamian haja. Hakun haja bamamalaman kada saling guringan main halma, dumino atawa main catur.
Biar kada bataruhan tapi rami haja karna siapa nang kalah digantungi batu atawa butul batali.Ada nang sampai lanjut sampai habang talinga kada saling turunan gantungannya,maka ramilah jadi huhulutan kakawalannya sampai baminggu-minggu.
+ Baiknya kita umpat kamling ini bisa-bisalah maatur waktu, artinya bulih haja badum atawa bahalma tapi jangan sampai ditinggalakan rundanya ujar Garbus.
= Kita maklumi haja Lui ai, nang katuju bamamainan itu adalah kakanakan haja, makanya tugas kita nang tuhalah bagagantian bakuliling kampung sahut Palui.
+ Daripada bamamalaman di gardu mata mangantuk baiknya kakanakan disuruh guring dirumah haja karna isuknya sakulah atawa manggani’i kuitan bagawi di kabun atawa di pahumaan ujar Garbus.
= Kalu bubuhan kakanakan umpat di gardu, itu tamasuk pangawasan kita supaya kada bakaliaran sahut Palui.
+ Nah, kalu itu alasannya aku bisa manarima Lui ai, artinya tamasuk pandidikan maawasi bubuhannya wan malajari batanggung-jawab ka amanan kampung ujar Garbus bakalah.Aku ada usul Lui ai, kaya apa kalu bubuhan angguta siskamling kita ini didaftarakan jadi Hansip, ujar habar bila jadi hansip cagar dapat pakaian saragam, sapatu tupi wan kupelrim ujar Garbus.
= Kalu ada jalannya wan dibulihakan aku katuju banar, kaina kutakunakan mungkin ada nang tahu ujar Palui.
Isuknya Palui tulak ka pambakal wan ka kantur kacamatan, imbah mandapat panjalasan harus bujur-bujur mangabdi, latihan disiplin wan baris-babaris maka ahirnya kampung Palui kawa mambantuk sa regu hansip langkap wan pakaian saragamnya.Palui jadi kumandannya dibantu Garbus, Tulamak, Tuhirang, Tukacut,si Endek wan babarapa warga kampung lainnya.
- Kami himung banar wan bubuhan ikam ini, babaju saragam hijau-hijau kaya tantara, baisukan kamarian babaris, kampung kita makin aman ujar pambakal.
= Salawas bapakaian saragam ini asa makin baharat, makin bapangaruh, bajalan haja harus disiplin, dihurmati warga kampung atawa kakanakannya wan kada katinggalan bubuhan bibinian gadis-gadisnya pina lelek-lelekan bila kita bajalan ujar Palui.
+ Siap kumandan ujar Garbus manyahut.Tamasuk si Zaleha pina makin takisir malihat kumandan sahut Garbus lihum.
= Nah.......tahu rasa si Zaleha.Dahulu pina kada hakun bila dirawa tapi wayah ini hanyar takisir malihat kami sahut Palui.
+ Uuuu.... kumandan ujar Zaleha wayah batamuan Palui, bailang pang karumah kita bapapanderan.Kami asa dandaman wan bubuhan ikam ujarnya.
= Kami supan bailang, maklumlah gawian kami ini kada bagaji wan kada bapangkat sahut Palui.
+ Nang panting kada gaji wan pangkatnya tapi baju tantaranya rasa aman bila bajalanan.Apalagi bila ada acara-acara pasti ada undangan kawa diumpati kamana-mana sahut Zaleha sambil lihum.
= Alhamdulillah......barakat baju hijau saragam maka si Zaleha marikit kaya burung kana pulut ujar Palui dalam hati kahimungan. emhati/aleks KAMUS SI-PALUI