Hari ini manggangan tungkul
     Mungkin isuknya manggangan sarai
     Hari ini kita takumpul
     Mungkin isuknya kita bacarai

     SUNNAH TINGGALAN ANBIA
     ILAHI SANDARAN BATAWAKAL
     SAJA KAYA ITU ADAT DUNIA
     NANG BAHARU KADA KAKAL

     Tabang bamban ku ricih-ricih
     Limbah ku ricih ku babat pulang
     Hati dandam bamula ampih
     Bawa badapat ba umpat pulang

     TAPAS KAIN HIGA PERIGI
     DADAYAN PINGGIR BANDANG
     PIAN RIGI AKU TAMBAH LAGI
     TUMAT BAISUKAN KU HADANG

     Apik-apik manyusun sirih
     Ada tasusun mangga hampirin
     Apik-apik ikam mamilih
     Ada tapilih diriku miskin

     URANG BARANTUK DI TUNGKARAN
     BATANG PARING DIULAH TITI
     MISKIN KAYA KADA JADI UKURAN
     BAIMAN BAIK PEKERTI PILIHAN HATI
 
 
 

     Tahu haja garubak lalu
     Kanapa pian kada ka pinggir
     Tahu haja diriku balu
     Kanapa pian kada ba pikir

     GURABAK LALU SAPI KA PINGGIR
     ITIK TUMBAR HAYAM LARI
     BUKAN ULUN KADA BA FIKIR
     CUMA MAHADANG 4 BULAN 10 HARI

     Hanyar-hanyarnya lading ku sintak
     Sikap mancancang batang kastela
     Hanyar-hanyarnya hatiku rusak
     Rusak mamandang nang galak mata
 

     MARICIH BAMBAN JANGAN DI PARIT
     TAKUTAN LARUT KA SUMUR
     RUSAK HATI JANGAN DIHARIT
     TAKUTAN GARING MAMBAWA UMUR
 
 

     Ujar pang habar banyak ba iwak
     Sa ikung-ikung kada ma wadi
     Ujarlah habar kaka banyak nang handak
     Saikung-ikung kadada nang jadi

     PANJANG RUMPUT PADANG JUMAMPAI
     PA IKAT LAKI DADAYAN KAIN
     LAMUN JUDUH KU BALUMAN SAMPAI
     HAKIKAT HATI KADA KA LAIN

     Amun Kapuas jalan ka Anjir
     Tapihku carik, jalujurakan
     Asa puas mandangar sindir
     Hatiku sarik, jurak-jurakan

     KAUT BANIH BUAT KA GUNI
     HAMPA BARAT BUANG KA LIBAK
     WANI MALUNTA WANI MANAJUNI
     WANI MANGUYA WANI DIHAPAK
 

     Lamun minyak gas nang minyak lamak
     Tambahan pulang si minyak binsin
     Salagi bungas, salagi mamak
     Tambahan pulang nang pipi licin

     MULIK BERLIAN DIIKAT CINCIN
     LAWAS DI TANGAN INYA GALIR
     BUNGAS, LANGKAR SI PIPI LICIN
     ITU HANYA HIASAN ZAHIR

     Ampar tikar didalam jukung
     Siapa jua marabahinya
     Rambut pang ikal mamak di ujung
     Siapa jua nang manampahinya

     PUTUS TALI ANYAM BELATI
     MARICIH RUTAN TATUSUK DURI
     SESUAI DI MATA RASUK DI HATI
     AMBIL CINCIN SARUNG KA JARI