Ulun Urang Bukit
( gasan kulaanku di nang bagana di higa kulam )

cangol
bukit merah, krian.
 

  I

ulun urang bukit
ngaran ulun imos,
nang kakanakan manyaru ulun uwak
dangsanak ulun manyaru ulun julak
uma awan abah ulun mahiyau ulun utuh
tagal napa saja sambatannya sunyaan tu urang nang sama
ulun pang.............

ulun urang bukit
uma ulun baranak ka ulun tiga tahun imbah japun manyarang malaya
wayahitu kaluarga ulun singkip banar
halui anjau-anjau kada basalawar
badimapa handak basalawar
amun uma awan abah gin kada mayu batapih

handak makan gin ngalih
handak ka hutan bagawi takutan ka kuminis
handak ka huma takutan tahaga japun
napa kada kaganangankah ka busu acil
ka wayahini u’ungulan imbah ditumpiling japun

di batis bukit ngitulah ulun hidup
di higa kulam ngitulah ulun ganal
tumatan halui
bukah di batas bandang
mangapungi sasiur
atau ka tagah manangkap kabibitak
amun kahumapan
bacabur ka banyu, bakunyung kaya mambarang
sakali banyalam lawas hanyar mancangul
kabila awak galitiran hanyar bulik ka rumah
ulun bujur-bujur urang bukit...

ulun anak banjar nang taguh
mun batis dicucuk butuh halalang batis kada tumbus
mun mahayau padang banta
batis kada suah bakuring
kada kaya kakanak wayahini
tajajak duri gin batis bananah baminggu-minggu
 

ka huma, ka hutan, ka batang, ka bukit
bilang wadah hayauan
sabarataan di batis bukit ngitu banjar
alai, kalua, amuntai, kandangan, lampihung
sunyaan di higa kulam ngitu kulaan
amun ada malayu gin
umpat mangaku banjar
kada kaya kakanak wayahini
nang banjar tutuk gin supan mangaku banjar

ulun ganal di batis bukit ngitu
makanan ulun iwak haruan bagarit, wadi sapat,
tuup bujuk, mandai kulit tiwadak
ulun ganal di higa kulam ngitu
hari-hari ka kabun manggani’i uma abah manurih
mun hujan ulun ka hutan bacari rutan
atawa ka banyu
malunta, marawai. mangalau, mambanjur
haruan, papuyu, kapar, bujuk, baung, lais, puyau, sanggiringan
tampirai, timpang, rawai
jadi dunia hidup ulun
ngitu pang dunia ulun
ulun bujur-bujur urang bukit

di batis bukit ngitulah jua
ulun kawin awan bainah, anak angah asmuni
di situ kasih ulun tiis
di situ cinta ulun lanah
kambuhan alai awan kalua
tacangul sambilan ikung anak

anak ulun nang panuhanya, bariah
bungas urangnya
kada sawat talah darjah tiga, ampih sakulah
napa aur garing haja
hanyar umur lima balas tahun
ulun kawinakan
cah, babini paraya sakulah tinggi-tinggi
kaina ka atang jua’ai inya

anak kadua saniah, babini jua
inya sawat talah darjah anam
kada pati bungas, tahirang saikit
tu gin baluman kambang awaknya
ulun kawinakan
ulun bahari kawin awan bainah gin
umurnya hanyar ampat balas tahun
lapan tahun taanum tumatan ulun
 

nang katiga, ahim
tuntung darjah anam balalu ampih
ulun bawa’i ka hutan ka huma
tagal ahim kada tugul
kada lawas tarus inya madam ka kuala lumpur
baugah-ugah bagawi
hanyar wayahini, ujar urang bagus gawiannya
ganal pangkatnya
napa sambat urang ‘security guide’
kada tahu’ai ulun nyambati
taga ditiring gambarnya, baisi tiga paku parak gulu baju...
 

anak kaampat mansur, ulun hiyau acoi
tamacal tumatan nang lain
wayah halui karap mamungkang hayam urang
mun hampalam urang, batnya jua’ai
halui lagi sudah bisa baruku’
umur lapan balas tarus jadi askar
inya kada ada di banua, aman saikit
napa aur handak basuduk haja, pangalahian..
mun ditangati gin kada ma’asi dipadahi
maraha..kaluku sasain ganal bisa inya bapikir….

nang kalima sariah
bungas kaya kakak nang panuhanya
kada sawat darjah anam, ulun ampihi
napa aur handak balaki haja
suah tahaga urang inya rahat baragapan awan lalaki
pugaan ulun kada pati pacaya jua
sakalinya kabila ulun indap, saja banaran
mandam ulun maitihi
asa manginging talinga, garigitan banar ulun
handak dimamayi gin ngalih
cah, kawinakan ranai
anak ulun nangini paling anum balaki

nang kaanam, enoi
urangnya kada banyak surah, di rumah inya ranai haja
ulun sakulahakan sakulah agama di samanggol
ancaman mun  ganal kaina, hingkat jadi ustaz
tagal kabila inya ditangkapi pulis bajudi
tarus ampih sakulah
wayahini inya pang nang manggani’i ulun bagawi
 
 
 

ulun kada pati manyangka jua
wayah bainah batianan anak katujuh
parut bini ulun ganal bangat
sakalinya dua ikung nang malacung kaluar
kadua-duanya babini
saikung ulun ngarani rabi’ah, saikung rapi’ah
nangini kada tahu’ai kaya apa kaina ganal
dua baading ngitu hanyar darjah tiga

nang paanumnya lalaki, ngarannya ijab
bahidung mitak, badahi lumpak
hanyar bisa bakakat
taga macalnya kaya acoi jua
napa mun halui lagi
saawakan  hudah bakunat
 

walau anak ulun mariap, ulun tatap bahagia
anak ulun kada suah lapar
anak ulun kada suah kada batalasan
jauh bizanya tumatan hidup ulun bahari
di higa kulam ngini sunyaannya hingkat diganalakan

ulun bujur-bujur bahagia
bainah gin bahagia
enoi gin umpat bahagia
kaluarga ulun, kaluarga urang bukit nang bahagia
napanya kada bahagia...
ca, itihi parut bainah pa ganal lagi...
 
 

  II

bulan tadudi
ulun tulak ka rumah ahim di kuala lumpur
banaran jar urang, bangunan di kuala lumpur tinggi-tinggi
halingang-halingang ulun manjanguk kaluar
sakitan gulu ulun
umai, ganalnya pang kuala lumpur
patut anak ahim kada pati hakun balalawas di banua
ujarnya di batis bukit kada rami
di higa kulam ancap lingu
kadada hiburan, diam gin di padang tagah
tu pang nang ahim kada pati hakun bulik.….
 
 
 

lingu ulun mahadangi kada sampai-sampai
hanyar kabila mantukah nang mambawai ulun
masuk ka wadah ahim bagana
asa marista maitihi rumah papan nang japuk
kipit, rapat-rapat batatai awan nang lainnya
asa ngalih handak bahinak
umai haluinya rumah ahim
cah, ganal lagi rumah ulun di batis bukit...

dua hari ulun baganak di rumah ahim
urang disubalah rumah gin kada marawa
hanyar ulun takurihing, tarus mangancing lawang
takutan ka ulun saku’
kaitukah nyamannya bagana di kuala lumpur
bujur-bujur mangalihi
ngalih handak guring, ngalih handak mandi, ngalih handak bahirak
kada kaya rumah ulun di higa kulam
mun handak bakamih di mana-mana gin hingkat
kada sawat ka batang bukah haja ka tagah
di banua walau ulun singkip
di higa kulam ngitu syurga kami barataan
 

  III

patang halam...
di batis bukit ngitu
di higa kulam ngitu
wayah mahirup banyu kupi
bainah tangah mamiciki awak ulun
tumatan radiu nang tasangkut di tawing, bailun;
 

pukul 4.30 petang
inilah buletin radio malaysia negeri wxyz
kerajaan negeri akan membangunkan lembah zwzwz  menjadi bandar perindustrian lengkap dengan segala kemudahan infrastruktur,
demikian dinyatakan oleh bla bla bla semasa majlis pecahtanah projek perumahan syarikat bla bla bla, pemaju dan pemegang konsesi projek berkenaan. menurut beliau dengan wujudnya bandar perindustrian tersebut akan memberi peluang pekerjaan dan sekaligus menaikkan taraf hidup penduduk setempat

umai bujurkah
banarankah
batis bukit nang ulun bagana ngini
pacang maju kaya kuala lumpur
atawa sahibar manyugihakan urang lain...
 
 

ulun itihi wayahini
nang datangan ka higa kulam ngini
ka wadah nang diulah hutel ngintu
barataan urang luar
kadada asri, ijum, jumri, tuhirang, tuhalus, diyang atawa galuh
kada ada nang babiskar kaya ulun, kada ada nang bamutur kaya iram
sabarataan bamantukah ganal
sunyaan urang sugih
nang datangan kada banjar kada
nang barami-rami ngitu kada bangsaku kada
nang bagawi di hutel tu gin kadanya kulaan di higa kulam ngitu
urang luar barataan .......
urang lain barataan.......
mun ada banjar gin, saikung badua
tu gin sahibar gawian manyapu ratik
bujurkah projek ngini manyugihakan banjar di batis bukit ngini?

majukah  ulun kaina..
majukah  banjarku kaina.........
atawa kaya ahim jua
tapiasat di higa kuta kuala lumpur
 
 
 
 

AcatLiat
     Ulun Urang Bandang
     Tue Oct 2 19:30:59 2001
 

     Ulun Urang Bandang
     Ulun awak hirang haja
     Hirang karna tuhuk babandang
     Pakaian wan harta gen kurang
     Hanya yang ada cuma bandang
     Ulun urang bandang......

     Ulun kada maniwas
     Ulun kada marista
     Ulun saikit gen kada rasa kaciwa
     Walau ulun bagana jauh di pinjung daerah
     Walau ulun dari halui hingga tuhaan
     Ulun magun taat manggawii bandang
     Ulun urang bandang.......

     Bandang adalah sagalanya
     Bandang bagi ulun bujur baharga
     Karna bandang hidup kami sakaluarga bahagia
     Dangan bandang inilah kami mancari rajaki
     Dangan bandang inilah ulun tarasa sagalanya
     Ulun urang bandang

     Ulun bangga karna ulun urang bandang
     Karna dari bandanglah datangnya padi
     Dari padilah datang baras.....
     Dari baraslah datang nasi
     Nasi yang disuap uleh saluruh manusia
     Ulun urang bandang!!
     Ulun urang bandang!!
     Ulun handak turun ka bandang....
 
 

Diang_Lara
Anak anak Afganistan...
Tue Oct 16 09:34:32 2001
 

Anak anak Afganistan...
Tangismu..
Derita mu..
Sakitmu...
Darahmu mu ...
yang mengalir membasahi bumi Afganistan...
mengundang simpati...
mengundang pilu..
mengundang airmata...

Aku tak terdaya membalut luka lukamu...
Aku tak terdaya menyapu airmata deritamu..
Aku tak terdaya menyentuh tanagn tanda simpatiku..

Dari jauh ...
Aku hanya mampu Berdoa..
Berbisik..Merayu...Meminta...
Kehadrat Allah s.a.t....
Agar kamu semua
di Lindungi..
dikasihani...
diberi ketabahan..
Demi untuk mempertahankan Agama , maruah dan Harga diri Negara mu.

Sekian coretan hati
Diyang dari AB
 

Antasari
Kasih tak sampai
Mon Oct 15 01:53:29 2001
 

KASIH TAK SAMPAI

Dahulu
kau yang meminta
putuskan kasih kita
ketika hatiku hanya untukmu.

Betapi pedih
betapa sakit
hati yang luka
kutanggung sendiri.

Demi harga diri
kurelakan perpisahan ini
kerana tiada gunanya
mengemis kasih
pada yang tak sudi.

Kini kita berpisah
mengikut jalan sendiri
jika sesekali aku mengenangmu
bukan untuk menyambung kasih
tapi hanya kerana dulu
kau pernah bertakhta di hatiku.

Kajang, 14 Oktober 2001
(Versi awal telah dikirim ke laman Gedong Puisi (Indonesia)
 
 

Antasari
Hagan umanya(Sajak)
Wed Oct 31 01:58:47 2001
 

HAGAN UMANYA
 
 
 

Amun ada bibini
selain umaku
nang patut kusayangi seikhlas hati
siapalah lagi
amun kada umanya.

Lebih tiga dekad kami bersama
mengharung ombak dan badai penghidupan
pahit dan manis sama dirasa,
inilah kehidupan yang sabujurnya
bukan lagi khayalan kaya zaman bacinta.

Mimang kehidupan di alam nyata
kada sentiasa manis dan indah
tapi umanya tabah
menghdapi dugaan
dan kesusahan yang melanda.

Tapi karna ada umanya
aku juga tabah
merangkak dari bawah
hagan meninggikan status diri
kaya wayahini.

Kini menjelang 'jubli emas'
empat dekad perkahwinan kami
kuucapkan sayang seikhlas hati
hagan umanya nang banyak berbakti
kepada anak-anak dan suami.
 

Kajang,
30 Oktober 2001