响好耐好耐之前，本來係設立咗副校長呢個職級嘅。
「吓！乜唔係不溜都有嘅咩？」
嗰陣佢地叫S.M.！(唔好心邪，係SENIOR MASTER呀！)人工仲好高添！
後尾唔知點解要取消喎！(Sorry！本人無知，當中係有道理嘅，可惜我一介校工，鬼識咁多咩！) 「喂！d人都話你文筆差，又成日叉開話題，又乜又物….你真係死不悔改！」(係咁㗎啦！我讀得書少！若果唔係，我坐咗教育署長個位啦！仲使做校工？)
原本做開S.M.嗰d副校，全部降為教育主任(E.O.)。嘩！降職呀？
係呀！E.O.係低級過S.M.㗎，人工低d㗎！ 當時d副校梗係好唔開心啦！有d仲喊住話俾人"打柴"喎！ 「唔係嗎？有d係男人老狗嚟㗎噃，真係喊到乙乙聲？」(唔知喎！呢d係我聽番嚟㗎咋！有無眼淚就唔知咯！)
不過，好彩佢地d人工無減到，只係個名銜就改咗唧。 新入職嗰d人咪仲慘，無左S.M.嘅職位，升到E.O.就要等升校長！ 原本係S.M.嗰d副校，當然係繼續做啦，但新嘅副校，又點樣喺d E.O.之中選出嚟呢？ 原來教署叫d校長，自行選定校內年資較長(senior)、又願意坐呢個位嘅教育主任，嚟做副校喎。 無咗S.M.個職級，人工當然無得加啦，但又要人地做埋副校d野，搵笨咩？ 所以，好多教育主任都唔肯做，因為無jack so！不過，如果想第日升校長，咁就要捱吓囉喂！「雖然係無人工加都要捱，咁都唔係好血淚之馬！」
(仲未講完呀！)
於是乎有啲 senior嘅教育主任唔肯做，有d較年青的教育主任又肯做喎。本來都相安無事嘅，點知後尾經過檢討，認為副校長實在係好重要，應該確立番佢嘅地位，於是乎又有番囉噃！
「玩咩！一陣又取消…一陣又有番！」今次大鑊啦！
做開副校個d人，忽然間一下子變返做普通老師，由副校長室搬返出嚟。而另一位老師，,可能年紀稍大，一下子變做副校長！ 呢下已經好難頂啦！都幾難面對d同事㗎！最弊係…對學生嚟講，唔明白咁多變故㗎馬，好易誤解以為你做得唔好，燉冬菇，由副校降返做普通老師，唱都唱到你面黃啦！
你地話嘞，佢地係咪有血有淚丫？
經過多年來嘅調整，而家問題已經解決咗嘞，但副校嘅工作一d都唔輕鬆噃。佢地夾响校長同埋同事中間，有時做野真係身不由己㗎。
而家d老師，唔係好似以前咁容易接受指令，遇到唔合理嘅事，係會力爭到底。 如果運用權力去壓佢地，可能會付出好大嘅代價。而家d副校係幾受氣㗎！ 仲有，要做嘅事務實在多不勝數：開放日、畢業典禮、寫下屬報告、校內考試、公開考試、諮詢議會、家教會、舊生會、…..最難搞嘅係….對外嘅事故！乜野事故呀？
見家長？見記者？見警方調查員？接投訴？見教署官員？
應付地下網頁….秘聞錄？！Sorry！菩提本無樹，明鏡亦非臺！呢單野就自己攞嚟嘅唧！
第二十一集完