第二十七集
教育界的敗類
每一行都有好人同埋壞人ge。
就算係警察、醫生、律師、議員，都有害群之馬架喎。
所謂「樹大有枯枝，族大有乞兒」，教育界有敗類，好奇咩？
當然，好多人一諗就諗到係老師，但係其實敗類唔一定係老師架播，可以係校長啦、校監啦、教育署高官啦、
…(喂！校工算唔算呀？都係教育界喎！)大家睇報紙，都見過唔少本地警員犯法ge新聞，好似：非禮呀、貪污呀、打劫呀、開外圍呀、甚至殺人都有添。
好離譜咩？
孟加拉仲犀利呀！有八成半警員犯過法喎！(唔係我亂作架，唔信就睇下五月廿八日東方日報A34版啦！)
所以，咪咁天真，以為警察、老師、醫生、律師就實係好人呀！
教育界有無敗類呢？
當然有啦！
觀功有無？
喂！我話無你信唔信丫？
邊個？
唔使旨意我會爆料！
唔係話怕俾人告，又唔係話怕人尋仇，更加唔係怕個網頁俾人封殺；主要係
…有時好難界定點為之係敗類ge！
尤其是好難知道佢地係無心之失定係專登咁做。
舉個例：上左堂老師都未出現。
呢種情形好常見唧。
有時，可能係俾豬扒家長死纏住唔放；
有時，可能係人有三急，去左解決；
有時，可能係病到懵左，唔記得去上堂；
有時，可能係車左校長去參觀開放日，係街度仲未返
…仲有，唔可因為一件事就去斷定人地係敗類，人誰無過丫！
有D人，私德有虧，但係教書就好落力，幫學校做左好多野，咁點計先？
何謂私德有虧？
比如話：叫雞唔俾錢、爛賭、打老豆/老婆、爆人陰私(呃！呢個咪好似
…網主你自己？殊！咪咁大聲呀！)、沉迷女色、借錢唔還、妖言惑眾(又係你？)、唔俾人打網球(喂！因住阿太發火喎)等…又有D仁兄/仁姐，私生活好正常，但教書一塌胡塗，學生唔知佢嗡乜，佢又唔肯改進一下，悶到D學生就黎死，咁又點先？
有時衰就係衰架喇，不過，到底要衰到乜野程度，至稱得上係「敗類」呢？
真係無標準架喎！
爆人地一次秘聞，封得做敗類未呢？
爆夠廿七次呢？
(觀功秘聞錄到而家有幾多集呀？)
就算俾人拉去坐監，都未必一定係敗類架喎！
唔俾係冤獄嫁咩？
又或者係情有可原哩！
記唔記得：有個小學訓導主任打學生，校方同一D家長都話佢出發點係好，支持佢繼續教書呀！
有D行為，無犯到法，但係有違職業操守，咁又點？
好似果個醫生，做手術果陣打手機，不但唔使坐監，仲有人幫住佢添！
講左咁耐，有乜野結論？
好簡單！
你鍾意果個人，佢做幾單衰野，你都可以原諒佢。
你憎果個人，無做錯野，你都可以鬧佢一餐懵。
(喂！算啦！人地都走左咁耐咯，咪成日針對人地老人家啦！不如數臭D陰險小人仲好啦！)
咁又係，有D人Be Le Ba La咁鬧人，但其實只係直腸直肚；有D人表面正人君子，實則笑裡藏刀、奸狡陰濕、殺人不見血，所以有人中左暗箭都唔知乜事。不過唔緊要，呢亭賤人，自會有天收佢，睇下佢後尾個兩年點折墮啦！
我講緊邊個，大家估下啦！
(好難估架！我初初都唔信架！你發電郵俾我，我先至會話你知！)