Yu kil ai wans yu kiaahn kil ai agen
fi riili kil mi yu ha fi kil yuself
far mi a paat a yu
mi de iina yu ahn yu nuo i tu
daa we yu fier muos de pahn yu
no front a yu, no bak a yu
insaid a yu
niera dan yu han ahn fut
cluosa dan yu uona bret
yu bon mi out
yu ron mi dong
tab mi op ahn slit mi chruot
ahn stil mi de wid yu
a man ahn uman mek mi baan
so i wi alwiez go
yu kil ai ded
yu kiaahn rob mi out
yu mek aneda wan
yu siem wan
siem wie
laif tu laif evalaastin
i am eternal
batiman
wat a haad man fi ded
chi chi man, sadamait
pusi buai, eniting
yu wahn caal mi
mi ansa tu all a dem
duohn tap caal mi niem
i fi eba pahn yu tong
iina yu haat
pahn yu main
haanda yu, hina yu
enda yu
frahn tek kia a yu bizniz
yu kil mi badi
yu kiaahn kil mi spirit
baan agen iina ebri iej
ebri taim, ebri plies
mi jos com bak
siem wie
batiman
fi eba
Lo, I am with you even to the end of the world.