Elurroldeen aurrean jakin beharreko informazio eta
 aholkuak

Elurroldeen aurrean jakin beharreko informazio eta aholkuak ________________________________ Sarrera Elurrolde bat sortzeko faktore eta arrazoiak        Lurrazala: Nolako eragina du lurrazalak elurroldeen sorkuntzan?        Elur-geruza. Ezegonkorra al da elur-geruza?        Eguraldia. Nolako eragina du eguraldiak elur-jausien sorkuntzan? Elurrolde-arrisku eskala Elur-jausi baten anatomia. Elur-jausi motak Elurrolde baten aurrean jakin beharreko aholkuak        Irteera egin baino lehen        Arriskua duen toki batera iritsiz gero...        Elurroldeak maldan behera eramanez gero        Zure lagunen bat elur azpian ehortzirik izanez gero        Teknologiak, materialak eta formakuntzak lagun dezakete Gaiarekin erlazionaturiko estekak eta bibliografia

Elur-jausi baten anatomia. Elur-jausi motak.

Elur-jausi baten anatomia.

Elurrolde batek behar duen guztia elurra eta jaisteko aldapa besterik ez da. Ikusi al duzu inoiz autoaren haizetakoan duzun elurra? Tenperatura hotza egiten duenean, elurra kristalari itsasten zaio beherantz labaindu barik. Tenperatura apur bat igotzen denean ordea, elurra labaindu eta haizetakoaren behealdera, oro har zati txikietan, erortzen da... bada hori neurri oso txikiko elur-jausi bat besterik ez dugu. Benetako elurroldeak, noski, askozaz handiagoak dira eta baita beren sorkuntzan parte hartzen duten faktoreak konplexuagoak ere.. Elurrolde batek, hiru zati nagusi ditu:: Abiapuntua. Hauxe hegiaren alderdirik hegazkorrena da, nondik elur ezegonkorra maldan behera erortzen den. Sarritan, hegien goi-parteak eta erlaitzen azpian kokaturiko inguruak, elurroldeen abiapuntu guneak izaten dira. Dena dela, elur-jausiak sortzeko faktoreak betetzen badira, elurrolde bat hegiaren edozein tokitan gerta daitekeela ez dezagun ahaz. Pista. Elurroldea maldan behera hartzen duen kanala da. Mendian bazabiltza, hegietan elurroldeek sortutako txirrista antzeko kanalen bila aritu zaitez. Hauen behealdean, pilatutako elurra eta hondakinak aurkitzen ohi dira: hots, bertatik elurrolde bat erori den seinale zalantza ezina hain zuzen. Amaiera gunea. Hauxe da mendiak botatako hondakinak eta elurra metatzen diren gunea. Kontuz ibili behar dugu, izan ere, sarritan mendi-zintzurrak eta sakonak goitik datozen elurroldeen amaiera guneak izaten dira-eta: tokiok mendizalearentzako tranpa hilgarriak dira.

Elur-jausi motak.

Ondoren, mendian sarrien gertatzen diren elur-jausi motak deskribatuko ditugu: Elur berriko jausiak. Neurri orokor gisa, elurra egin eta biharamunean elur-jausi arrisku handiagoa egon ohi da. Elur berriko oldeetan, elurra hotza, lehorra eta arina izan ohi da, eta maizenik elurte handien ondoren eta eguraldi hotzarekin gertatu ohi dira. Abiadura handia hartzen dute, eta suntsitzaileak izaten dira oso. Zorionez ez dira normalak gure mendietan. Plakazko jausiak. Haize plaken ondorio dira. Elur-jausi hauek eragiten dituzte istripu gehienak. Azaleko elur geruza, trinkotua egon arren, azpiko geruzarekin guztiz bat egin gabe edo lotu gabe egotearen ondorioz, askatu egiten da geruza hori, batzuetan elurraren zama hutsagatik, baina gehienetan eskiatzaile edo ibiltarien eraginagatik. Elur hezeko edo fusioko jausiak. Azaleko geruzak hezetzean eta azpiko geruzetatik libratzean sortzen da, euriteengatik edo tenperatura altuengatik. Hego isurietan eta udaberri aldera izaten dira ohikoen. Abiadura txikiagoa izaten dute, baina suntsitzaileak dira orobat. Besteak. Gailurraldeetako erlaitzak bertan behera jausi daitezke, edo hormaguneetako serac-ak ere bai. Ez dira besteak bezain ohikoak.