2002 年 12 月 31 日 星期二 【晴】

　　響屋企呆左一日，等唔到義工組ＢＢＱ班攪手既電話，於是我打電話俾ANNIE，不過佢都唔知道，佢又打電話俾班攪手去問佢地，點知佢既答覆係：班攪手去左睇SHOW 囉……真係好無奈……所以我就加入左邦邦既邊爐團。我同牛牛一齊去邦邦度，我買左Ｄ野飲之後就上左邦邦屋企。上到去，見到阿DICK 同邦邦個女朋友仔∼我地一路打邊爐一路睇＜搞乜鬼奪命集作＞第一同第二集，真係笑足成晚！之後我地就入左邦邦間房度傾計，傾傾下連倒數緊我地都唔知，最後我地都係同個電影一齊嗌，無倒數過……之後我地就一齊出去，邦邦送人返屋企，我就同阿DICK、牛牛一齊搭地鐵。我同牛牛落左旺角，然後同RACHEL 一齊搭的士返土瓜灣。送左牛牛返屋企之後，我就同我老婆仔去左食糖水∼食完糖水我就返左屋企，睇完亞視播既＜絕代雙驕＞電影版，跟住就訓覺啦∼

>>2003年01月02日Thu 22:00:23 (GMT+8)

2002 年 12 月 29 日 星期日 【晴】

　　晨咁早，我就爬起身搭車去筲箕灣幫手過石澳霸爐，不過我就遲到，因為唔知醒嘛。過到去，坐下玩下大隊就黎到，原來得八十幾人囉…我地過去幫手拎野，跟住由JIMMY 仔帶大家玩左兩個GAME 之後就去左燒野食。我四圍去拎人地組Ｄ野黎燒，食到差唔多既時候又周圍拎人地Ｄ粟米黎食，大部份既粟米都係燒黑左大半邊，所以一條粟米可以食既已經係好少，仲要一路行一路俾人分黎食添∼不過就分得好開心！之後玩左陣，影左幾張相就過左海灘玩。執左好多貝殼，好靚∼！之後由媽媽、JIMMY 仔、OLAY 等等帶左幾個GAMES，抽埋獎，然後就影大合照LU∼不過途中有件事發生左，就係有個我覺得好唔似會員既會員（點睇都似爛仔多Ｄ）唔見左部電話，然後走左去報警。好心佢啦，明明係自己玩玩下唔見左部電話又要攪大件事，仲好似想叫人黎全體搜身咁。講真，你自己鍾意攪事既就唔該你返自己學校攪，你係緊張自己部電話既就唔該係自己睇緊Ｄ自己既野，唔好一有起事黎就懷疑人地！我響玩野既時候，見到伍區長同佢同個警察講野，個警察都係同佢講叫佢唔好攪大件事之類既野，到底係而家既人對自己既權利認識多左，定係借用人權黎攪事既人多左呢？上到車，身邊既人差唔多個個都死晒響自己個位度，我又跟住佢地死埋一份∼死到返總部，本來同佢地去玩搖搖板架，不過我攪埋Ｄ野之後牛牛又要趕返屋企，所以我就同佢地一齊搭車返土瓜灣。送左牛牛返屋企，陪囡囡等埋車，再打電話俾LYDIA 姐姐，點知呢個靚女姐姐同我個囡囡一樣咁懶鬼，打俾佢既時候訓緊覺，到半夜先起身玩ＩＣＱ，玩唔夠半個鐘又去左訓覺，仲懶鬼過我∼！（不過成績又好過我勁多喎∼！）

>>2002年12月30日Mon 15:42:57 (GMT+8)

2002 年 12 月 26 日 星期四 【雨】

　　十一點幾，同我媽咪落左街食完野，就即刻去搭車落旺角搵我個囡囡，因為呢日係我既乖囡囡阿LING 既生日！我同阿LING 等左一陣，跟住HEIDI 同獅子仔都相繼黎到，而遲到左好多既關邦就俾我地罰要揹住阿LING 袋禮物。我地響旺角行左陣，食左Ｄ野之後，就去左買飛睇＜貓之報恩＞。睇戲既時候，我地個咀好似無咩點停過，因為我地買左好多野入去食…套戲好好睇，好好笑，男爵都仲係咁有型∼！睇完戲，我地又行左陣，因為獅子仔要補習，所以我地送左佢去搭車，然後我地就去搭地鐵過尖沙咀。去到尖沙咀，梗係第一時間去玩具反斗城啦！我地響裡面玩左好耐，等到媽媽黎左之後，我地又過左去美國冒險樂園玩。我地玩到傻晒之後，換左盒蛋糕仔同一筒迷你Ｍ＆Ｍ，仲有兩張飛淨添！跟住落黎係第三個地點：啟德嘉年華！我地送左媽媽搭車，就即刻去搭５號車過啟德。途經阿LING 屋企既時候，由於夜晚再加落雨既關係，天氣凍得好緊要，於是阿LING 就返左屋企放低Ｄ禮物，換件厚Ｄ既褸落黎再去玩。我地行過去既時候，雨愈落愈大，得關邦一個有帶遮，好彩我同我個HEIDI 囡囡都唔用遮，關邦又著左件有帽既風褸，於是我就拎左把遮去遮我既阿LING 囡囡。我地入到去，第一時間係去左買熱野食！之後又行左陣，因為HEIDI 囡囡要去荃灣接細佬返屋企，所以關邦就陪佢走先，我就同阿LING 行晒成個嘉年華，之後同佢一齊行返屋企。走既時候，我同佢對手都僵晒，成頭成身都濕晒……不過，全日都過得好開心，因為我又可以唔駛理其他人，做返傻傻地既我∼！

>>2002年12月27日Fri 13:31:07 (GMT+8)

2002 年 12 月 25 日 星期三 【晴】

　　十點左右起左身，拿拿聲換衫同老豆＆媽咪落街食早餐，由於老豆今日放假，所以就同媽咪去左行街街。我就返左屋企，再一次開個ＩＣＱ玩左幾個鐘，睇黎我真係好無聊……五點鐘，我落左去紅磡廣場買左廿幾蚊糖請大家食，然後又睇左個氣球魔術師玩左一陣，跟住就去左搭巴士。響巴士上面，竟然撞到我最可愛既哎呀妹妹牛牛，於是我地就一齊過去尖沙咀碼頭旗桿下面，見到占士、JIMMY 仔、阿蕉、濠哥、小婷、媽媽同RACHEL，我地一齊去玩具反斗城行左陣，影左Ｄ相，玩到傻左囉∼跟住就過去意粉屋度食野。我地響意粉堅度玩電話，攪到小婷有電話恐懼，又去猜Ｄ好唔衛生既謎語，笑到收唔到聲，我地係玩到其他人都望住我地囉，真係嘈到拆天！食完野，我地去名店城搵埋安東尼小姐同KATHERINE 之後，就過去大良八記度搵埋今年離左大隊既峰少同傻鴨，我地傾左幾句之後佢地就走左啦。本來諗住年年都可以同埋同一班核心人物一齊玩架，不過而家先知原來核心人物係可以轉換成另一個團體既核心，大家可以響同一個地區玩，但係又可以唔響一齊，睇黎小黑既思想真係有Ｄ過份天真……送左峰少走之後，又陸續有人相繼離開。最後，得返濠哥、ANTONY、KATHERINE、媽媽同我。我地搵埋逆天之後，去左Ｍ記食左Ｄ野，跟住媽媽同濠哥走先，我地三個就一齊行落旺角，因為要送ANTONY 返屋企先嘛，之後我同KATHERINE 一齊返過去土瓜灣，因為佢要搭VAN 仔返荃灣。點知道我地等左半個幾鐘都等唔到VAN 仔，於是KATHERINE 激鬼氣就去左搭的士返屋企，得返我一個，就當然係返屋企啦！返到去，已經四點幾，求其換左件衫就去左訓覺LU ∼

>>2002年12月27日Fri 13:31:55 (GMT+8)

2002 年 12 月 24 日 星期二 【晴】

　　意想不到咁八點幾已經起左身，同媽咪去食完早餐之後，我就返左屋企上網打左陣機，十點零鐘就開始轉去開ＩＣＱ。一開個ＩＣＱ，好多人ADD 我，因為去CAMP 班朋友仔原來一返到屋企就已經即刻ADD 晒Ｄ人，係我咁慢……不停咁打字，過左好似好充實但係又好似好無聊既幾個鐘之後，我就換衫過中環搵我老婆，因為佢同佢班朋友仔打算過蘭桂坊玩，於是我地無無聊聊咁去左蘭桂坊，之後又過左時代廣場打機，最後真係有少少受唔住一Ｄ無需要承受既虛假，於是同RACHEL 一齊返左白田，響 7-11 食左Ｄ野，過左一個氣氛好過倒數既夜晚。跟住我就搭巴士返屋企，上到車我訓著左，而我起身既一刻，我係扔到條頸架…

>>2002年12月27日Fri 13:29:56 (GMT+8)

2002 年 12 月 23 日 星期一 【晴】

　　去完三日CAMP 之後，我就即刻返左學校睇下自己團班友仔同YU50 既聖誕PARTY 攪成點，仲同佢地開埋Ｅ先返屋企。返到屋企，倦得好緊要，所以食完飯之後就即刻沖涼訓覺LU∼

　　星期六一朝早我就起左身，換晒衫之後就即刻拎行李去又一城KFC，因為我約左峰少一齊去食早餐，而我就好少有咁一早就到左∼！食左個早餐，俾左個MORNING CALL 囡囡之後，我地就過左去理想酒店門口集合。好奇怪咁唔知點解要FALL IN，真係搵野黎攪。等左差唔多成個鐘之後，終於上車入烏溪沙青年新村。入到去，又再等多兩個鐘先開始入營典禮。之後就係分組時間，我就入左紅、黃、綠、藍、紫、黑六個社裡面既藍社，而我就係藍社第六組既一份子啦！跟住我地分晒風褸同一個連摺凳既背囊之後又分房。我同峰少、梁曦、關曦同房囉！真係完全FREE 呀！分完房之後，又要以極速換好晒衫去到第一個活動地點，點知趕到去之後班NON- U G 又未到，總之第一日既特色就係不停咁等同好多野分啦∼！我地班紅記仔女係最早到既，咁就當然要係咁宜俾人讚下啦，雖然我地唔恨∼（真係好假添）玩完一個叫做「音樂步操大匯演」既悶悶遊戲之後，就係我最鍾意既晚餐時間啦∼！食完飯，去左玩海事青年團攪既遊戲。我地一個社又分左六組去唔同既地方度玩。我地第六組響玩既時候由於隊長帶領唔到班隊員合作一齊去玩，所以由睇唔過眼既我同桃姐一齊出黎幫手帶呢個遊戲，好彩都無失禮大家，合作得好成功。之後又玩左個懞眼既遊戲「軍營特色」，唔知做過Ｄ咩，之後就返房沖涼換衫攪事啦！做左掌匙人既我，一早就返左房度為大家打開方便之門，俾大家返房方便。一班麻甩響一個好有麻甩味道既房裡面輪完沖涼同傾左陣之後，就上左205 號女仔房攪事啦！我比較早上去，鋤左陣DEE 之後，就成班人一齊玩非洲話事啤。我地九個人玩得勁爆笑囉！個個Ｄ懲罰都由Ｄ好簡單既野去到好痴線，分別係錫隔離條友、飲晒一煲水、落街跑圈、去101 同201 踢竇兼影相……真係癲晒。之後又玩七級豬，雖然比較悶，但係都力保不失，由始至終都係一個人。做人既好處，當然係可以發板罰隻七級豬啦！但係今次呢隻七級豬實在係唔好玩，所以結論係：白玩！三點幾鐘，完成晒第一日既所有節目，乖乖地返房訓覺。

　　星期日係我地個CAMP 既OPEN DAY，我地一早食完早餐，就去玩兩個分組遊戲。當玩童軍扎高射砲射水彈既遊戲既時候，本來都玩得好開心，不過有個工作人員用Ｄ命令式口吻同擺款黎對我地，我地條氣梗係唔順啦，因為我地係去玩架嘛！所以我臨走就大大聲明串左佢一句，之後就拉大隊走。誠誠隊長係咁叫我唔好嬲，其實我都已經無嬲，不過人人都覺得呢野大快人心囉！去食完午餐之後，我就被安排做下晝開幕禮紅十字會步操隊伍既RIGHT MARKER。響歷時十五分鐘既嘉賓演講之後，我俾人讚我企得好直呀∼！之後接近成千人做左個「眾志成繩心連心」，聽聞錄影左之後一月會響城巴度播，到時我一定會搵日專登搭足來回兩程城巴黎睇。開幕禮之後就係攤位時間，我地本來諗住睇下就返房訓陣架啦，點知玩玩下，又同Ｄ新舊朋友影下相，咁就玩到夠鐘集合啦…六點零鐘，食埋份晚餐，我地藍社就去左飯堂出面集隊唱下歌仔同嗌下口號。點知響小食亭班綠社既人又嗌口號喎，攪到社長要我地同佢地鬥嗌。而我呢個攪事份子就用左少許時間將綠社既口號改左，仲響第六組既前方流傳。最犀利既，都係五粒星好快就記得我個款式既口號，唔知佢地背書又有無咁叻呢？！之後我地我地就去左營火晚會既準備會度學左幾首歌仔，然後就落去大草地足球場正式黎料！呢晚真係可謂情緒高漲，個個都唱歌、大嗌，真係仲正過去睇演唱會。不過最正既，始終都係「伍博士」！我真係覺得佢帶領氣氛既技巧好高，而且具有一種好獨特既魅力！我地個個都好鍾意佢，真係好正！唱完歌仲有聖誕老人派禮物，我俾份禮物掟中個背脊，不過好彩都拎得到份禮物，唔係就痛得唔抵啦！完左CAMP FIRE，即刻返房打算沖涼，點知清清又自投羅網走黎我地男仔房俾我地玩，蠢蠢地咁笑到我地肚痛！本來諗住呢晚玩耍盲雞，但係最初就無野懞眼，後來係關曦唔肯拎我條呔上去，結果個個都呆響間房度無野玩，最後就各自返房。由於峰少眼波既關係，我就留左響203 號房度睇醫學節目。睇睇下，ANTONY、KATHERINE同阿蟬響房度走左出黎，於是我地就玩啤牌。玩左一陣，阿蟬累到呆左、KATHERINE 又響梳化度訓左，而我教左ANTONY 玩幾個小遊戲之後就返左房訓LU ∼

　　星期一，一朝早食完早餐之後玩左一個POINT GAME，之後就要執野，同好多識同唔識既人影相，又同交安、女童軍交換左Ｄ章，真係好開心！無幾耐，隨住閉幕典禮既完成，呢次既CAMP 終於都完滿結束。不過美中不足既地方，係我唔知點解我地紅記係有車入無車出架…於是我同ANTONY、KATHERINE同阿蟬一齊去搭巴士落旺角，落到旺角我就即刻搭VAN 仔返學校啦∼！

>>2002年12月30日Mon 01:12:56 (GMT+8)

2002 年 12 月 20 日 星期五 【雨】

　　一年一度既學校社際歌唱比賽，今年由我、家霖、家曦同阿湧四個做司儀∼！我地四個人既配搭當然係驚天地泣鬼神啦∼！一開場Ｄ人已經ＶＩＷＡ鬼叫，我地呢次做司儀都算係成功啦！我係第八個唱，其實我唔係咁想唱呢首歌，不過大局已定，無得改歌先至逼住要唱…雖然我只係報左一個名，但係比賽既時候就上台唱左三首歌，因為我仲同家霖＆鮑魚做埋和音嘛∼好開心今年鮑魚肯返黎做嘉賓，因為我都好耐，應該都有一年無試過同佢同台表演啦！好光榮架！比賽完左之後，我地班主任雞蛋走黎恭喜我地，當佢問我地班嬴左咩獎既時候，我地只係答佢呢個係我地６Ａ班既歌唱比賽，因為我地班囊括晒冠、亞、季軍同最佳台風四個大獎，小弟我蒙幸獲得個最佳台風獎，都叫做有面見江東父老！之後下半場就係低FROM 小朋友上禮堂睇SHOW 既時間，我地做多一轉司儀，唱埋歌之後就走得啦∼跟住我就同阿峰、嘉麟、HEIDI、獅子仔、COVER 一齊去左唱Ｋ，唱唱下忽然多左幾個唔識既人黎插左幾首歌唱，無耐先知係COVER Ｄ朋友。四點半左右，我地同囡囡、獅子仔一齊返左五記，因為佢地要當值。我返左屋企訓左陣，七點幾就上返去五記接囡囡一齊去食野，仲同佢去左Ｍ記食雪糕添∼！之後我就送左囡囡去搭車LU∼

>>2002年12月24日Tue 15:16:38 (GMT+8)

2002 年 12 月 19 日 星期四 【晴】

　　由於之前星期一至星期三呢幾日裡面，除左我突然間好似上左身咁響康樂棋桌上嬴左冠軍級人馬BYRAN 兩場，同埋做左最新既HIT 數王之外，都無咩特別事發生，所以我就無寫到個DIARY∼！
　　呢日放左學之後，我即刻帶住LOCKER 度極其沉重既書返屋企。返到去，沖左個涼之後，就過左去五記俾埋份禮物COVER，跟住就上左總部，因為我地約好左去睇＜無間道＞。我同峰少、傻鴨、牛牛、提子糖一齊飛的去澳海城買左飛先，之後媽媽同佢個新抱（即係我最掛住既老婆仔）同阿哥（烈風）過埋黎，我地去左食野先，跟住就過去戲院。套戲真係好正，不過可能因為坐第一行既關係，所以條頸有Ｄ梗…睇完戲，我地就去左搭車。由於我既哎呀妹妹唔舒服既關係，所以我就送左佢返屋企啦∼

ＰＳ：傻鴨，本＜英雄＞漫畫版好正呀！我好期待去睇＜英雄＞套片呀∼！！！

>>2002年12月21日Sat 09:55:48 (GMT+8)

2002 年 12 月 15 日 星期日 【晴】

　　星期日，都係六點幾起身，沖涼洗頭之後就趕去搭巴士、轉火車去大埔，因為呢日係香港紅十字會一年一度既最佳服務主題計劃頒獎禮啦∼！一去到，立即就開始發癲囉，因為我實在太耐無接觸過呢類大型既舞台啦！我同阿曦入到去，即刻拎住個大獎盃影相，然後又響休息室度同 POLLY、阿 JAY 玩左一陣，然後就開始採排。一直攪到十二點幾，我地就食 lunch。我拎左盒福建炒飯，其他人就食乾炒牛河同廈門炒米。但係咁於我地食晏既時候響休息室度係咁講笑，又幫Ｄ飯盒改名，結果 POLLY 多左個代號：「米粉」。到左正式開始之前，我上左觀眾席同媽媽＆兩個囡囡傾計，好開心呀佢地黎睇我，細囡囡仲專登一朝早出 CAMP 過黎添呀！好感動……一開始，雖然遲左少少，但係都算幾順利。響兩個嘉賓做分享既時候，我地四個司儀響後台可以話係玩到痴晒線！之後由於流程失準既關係，全個run down 遲左近四十完，而我同POLLY 都忙於CUT 橋，所以尾段比較做得唔好……攪埋少少手尾，我同POLLY 就拿拿臨跟住TRACY 跑去搭車，原來紅記真係可以BOOK 到巴士接送咁威架！上到車，同媽媽傾計傾到返到去總部。之後我就同媽媽、兩個囡囡、阿峰、PETER仔一齊去黃埔吉野家食晚餐，仲同兩個囡囡去左美國冒險樂園度食棉花糖∼最後我同阿峰、HEIDI 過左碼頭搭3B 返屋企LU∼！

ＰＳ：同POLLY、曦曦 & 阿JAY 合作真係好開心！仲有阿靖，真係好爆笑！希望遲Ｄ會再見到大家，同大家再玩過啦！

>>2002年12月21日Sat 09:39:40 (GMT+8)

2002 年 12 月 14 日 星期六 【晴】

　　今日要去捐血大使既首次簡介會，但係我遲左起身，結果用左 $40 食左個 $10 既早餐，因為我要飛的上京士柏血庫囉，好彩都趕得切∼！行下聽下傾下講下寫下，攪掂晒Ｄ野之後已經一點幾，本來打算去唱Ｋ練歌但係結果都係無去到。取而代之既，係同獅子仔去左行街街買聖誕禮物。我地行左去旺角、佐敦同沙田，我就買左好多野，洗左好多錢，四圍行0個陣好鬼開心，不過都仲未買得齊，可能星期一我會再去第二度買過。六點左右，我地就去左搭車，因為我要去樂富同 POLLY 夾司儀稿。我地響Ｍ記度好左份稿，影印埋之後都就快八點。於是我就拿拿臨趕去黃埔搵峰少問佢借埋Ｄ野之後，就即刻飛返婆婆屋企度做節。雖然今次又係得我一個遲到，但係我知佢地唔會怪我既，因為我係最識同長輩講野既其中一份子嘛∼！

>>2002年12月15日Sun 01:03:03 (GMT+8)

2002 年 12 月 13 日 星期五 【晴】

　　如常咁返學放學傾辯論，之後又再過去五記度教操∼好開心，因為五記班小朋友好得意，佢地真係各有特色，但係都幾聽教聽話！雖然過到去既時候大囡囡已經走左，家琪同細囡囡又集合晒準備去CAMP，叡叡佢地又要上ＹＨＣ，但係有小窗、笑笑、澂程、WENDY、芷菱等等可愛既女仔陪我一齊教，所以絕對係唔會悶架∼而且我仲一次過教左佢地 FALL IN 同 MARK TIME 添喎∼今次我 5:30 就放左佢地走，因為我同牛牛約好左去食糖水，不過臨走既時候同小窗傾計同畫公仔，最後我地六點鐘先走。之後我落左旺角，同牛牛、峰少、媽媽、濠哥、傻鴨同阿 KEN 一齊去食糖水，然後去左行街街，七點幾，我同牛牛去整完眼鏡之後就搭車返屋企 LU ∼

>>2002年12月15日Sun 00:42:45 (GMT+8)

2002 年 12 月 12 日 星期四 【晴】

　　直到放左學，我既心情依然係悶悶不樂。傾完辯論比賽Ｄ野，關邦打電話俾我叫我過五記幫手教操，於是我就過左去。仲未去到五記門口，就已經見到細囡囡同笑笑響平台度傾緊計。入到見，見到阿DICK、關邦、叡叡、大囡囡、小窗……好多好多人。當然，仲有一班未見過既新面孔。因為關邦已經叫到無氣，所以換左我落場教佢地，一直教到六點零鐘，我地就放人，然後一大班人一齊返土瓜灣。講起又有Ｄ奇怪，我覺得自己教完操，大家一齊走既時候好開心，而困擾左我幾日既低落心情忽然間消失得無影無蹤。返到屋企，家姐返左黎，我地一家人響屋企飲完湯之後就落街一齊食飯。食到一半我就走左先，因為星期五無啦啦要測地理論文呀……

>>2002年12月15日Sun 00:25:32 (GMT+8)

2002 年 12 月 11 日 星期三 【雨】

　　放學前兩堂係ＲＳＴ。明明我地一組要出黎做講座，但係事前又無分工，個個都叫我出去講，我想問佢地拎份稿黎睇下又推黎推去，問佢地有咩要攪又話咩都攪掂晒。結果呢？睇又未睇，揀都無揀就即場要我照稿讀。要我即睇即讀都算啦，等我讀左幾頁之後，想轉一下俾第二個人試下接住繼續講埋淨返最後一頁，結果無人肯讀，仲一跳就跳左落下一PART。玩遊戲，得個玩字，背後意義係咩根本就同之前講落既一Ｄ關係都無，完全臨場爆肚。個個都玩玩下，一班人堆晒響後面就當自己做緊野。我企響個講台度，對住一份無睇過既稿讀到食晒螺絲咁，完全覺得自己係俾人叫出黎出醜。今次ＲＳＴ，根本就無意義可言！心情急劇低落，但係放左學之後TRACY 黎訪團，我如常係扮無事咁同UO 同埋班COM 開會。開完會，同TRACY 過左培正一陣，然後一齊上總部，因為我要搵 IDY。上到去，IDY 唔響度，但係哎呀妹妹就上左去。於是等埋哎呀妹妹攪埋Ｄ野之後，就一齊搭車走。八點幾，落左中心做功課，但係就只係做左好少，因為全程我都唔知自己響度做咩，成個人呆左咁。十點鐘，中心夠鐘閂門。出到去，落緊雨，我無帶遮。行返屋企，雨滴落個頭度，好凍。返到屋企，Ｄ功課未做晒，個頭有Ｄ痛，但係已經無心情再去做埋Ｄ功課。可以既話，最好就唔返學，唔出街，唔落床，好似死人咁訓響張床度，反正我就算死左都唔會有人知……

>>2002年12月11日Wed 23:20:52 (GMT+8)

2002 年 12 月 10 日 星期二 【晴】

　　尋日朝頭早，我如常陪獅子仔一齊行返學，本來阿麟都黎既，但係佢唔知醒所以黎唔到。我仲撞到囡囡，但係我硬係覺得佢好似唔係咁夠暖咁。一返到學校，睇到音樂學會塊壁報板，我竟然入到歌唱比賽初賽，但係唔俾轉歌。初賽首歌根本唱唔起既，睇黎今次都係陪跑架啦……LUNCH，我SEND 左個MESSAGE 俾囡囡，阿峰又打電話俾佢，因為我地月會，LUNCH放晏左，可以一齊去食野，結果我地就過左巴街運動場度食野。一上到去，就見到我兩個囡囡、獅子仔同COVER。我地玩左陣，食左個麵，跟住就飛奔返學校，好彩無遲到！放左學，我上左總部幫我ＵＯ買風褸。上到去，見到峰少、牛牛、POLLY、傻鴨、阿KEN、OLAY、JIMMY仔……好多好多人。本來上到去大家有傾有講咁都幾開心，但係唔知點解，過左一段時間之後，我忽然覺得自己既存在好似好無意義咁。我一個人企響度，望住四周圍Ｄ人圍埋一個個圈，唯獨是我一個單獨咁企左響中間。我試過走去COUNTER度睇下佢地做乜，但係我留意到講既野連一個人都無聽到……我開始質疑我既存在價值。由我返到屋企，到我訓覺、起身，返學、放學，我都仲未知到底我既存在價值響邊度。所以我今日無上到去總部，因為我唔知道我上到去仲可以做Ｄ咩。以前上到去，一樣都係無咩意義，只不過因為有一種感覺，一種我係存在響度既感覺，令到我咁鍾意留響總部，但係而家我連自己都唔知到底上到去傻左咁為左咩。睇黎我都係時候留返響屋企度自閉返一輪，諗下到底我為咩而生存……

ＰＳ：提子糖，我下星期四會上總部搵你。

>>2002年12月10日Tue 23:02:30 (GMT+8)

2002 年 12 月 08 日 星期日 【雨】

　　凍到震呀∼！今日約左阿KEN、囡囡同傻鴨去聖母書院度，因為今日係聖母書院既五十週年開放日，我應承左蠶寶寶去搵佢，順便去玩。我地俾左好多錢去玩攤位，結果嬴左對噴水劍同好多魚蛋、煎釀三寶、糖水，仲玩左好多野添∼！傻鴨仲犀利，佢用佢既三吋不爛之舌同個女童軍講價，結果用左＄４５買左個佢地話值＄４５０既大鴨鴨公仔，仲引黎途人同好多女仔既目光，今次最威都係佢啦∼！雖然今日好大風，仲係咁落雨，但係都玩得好開心！四點幾，我地過左去鑽石山荷里活廣場度食 TEA 同行街街，但係傻鴨就拎返佢隻大鴨鴨返屋企先。我地行左一陣之後，阿KEN 又要落旺角度買錶，我就同囡囡去左美國冒險樂園兜左個圈，仲買左個好大既棉花糖食添∼之後我陪囡囡行返慈雲山，佢陪我等埋架3B，然後佢就行返屋企，而我就返屋企度打邊爐啦喂∼！

>>2002年12月08日Sun 22:05:07 (GMT+8)

2002 年 12 月 07 日 星期六 【晴】

　　晨咁早，我就同班同學（BYRAN、子豪、豬豬、病菜）一齊入左去赤柱聖士提反灣度霸爐。我去到仲捉左好多蟹同三條魚仔添呀∼！（徒手捉喎∼）十二點零鐘，我自己出返太子，出到去一點幾，買左Ｄ糖同買左個車仔麵之後我就去左伊中度聽青年大露營既簡介會。過到去，雖然遲左Ｄ，但係都未開始。我同峰少被逼分開左兩組，好唔抵咁俾佢入左黑組，我就入左藍組。個簡介會差唔多四點先完，而我碗麵結果都係要等到四點先有得食……之後我同峰少去左行旺角。我地去左信和，但係都仲未出新 HE-MAN 漫畫……之後峰少要返屋企做功課，我就繼續行。結果我買左把＜天煞狂刀＞漫畫裡面既「小黑」∼！正到絕呀∼！然後仲要俾我響皆旺度搵到套女既衫，我搵左成兩個月啦，佢終於返貨啦∼！今日真係好開心好開心∼！哈哈哈哈∼∼∼∼

>>2002年12月08日Sun 21:24:20 (GMT+8)

2002 年 12 月 06 日 星期五 【晴】

　　今日一放學我就落左音樂室度攪歌唱比賽初賽Ｄ野，終於輪到我比賽既一日，但係我因為無碟既關係所以改左唱＜孤獨探戈＞。本來好好地咁唱應該都入到圍既，但係到我唱既時候先知道原來班友仔就唔識較大Ｄ音樂架囉，攪到我好似專登嗌出黎咁，而家都唔知入唔入到圍 LU……唱完，我就去左搭車上HEAD。上到見到牛牛、媽媽、阿婷、COVER、HEIDI 囡囡……玩左一陣之後，我地就順應牛牛既意願去左幫手佈置總部，一攪就攪到六點幾。原本今日係打算同囡囡去黃埔食雪糕架囉……不過，我過到去都有買到雪糕俾囡囡∼不過囡囡食完雪糕就去左同佢既媽媽&FRIENDS食自助餐LU ∼我仲買左張卡卡拎左上哥哥屋企，響我地打完麻雀、食完 PIZZA 之後，等囡囡食完自助餐上黎，就一齊響張卡卡上面簽名∼然後就交由濠哥負責幫我地交俾親愛又偉大既伍英時先生！攪掂晒都已經十一點幾，係時候要返屋企架啦∼我同囡囡一齊搭3B 返去，返到屋企既時候因為眼訓，所以無乜點整過手頭上Ｄ野就去左覺覺豬LU ∼

>>2002年12月08日Sun 09:49:06 (GMT+8)

2002 年 12 月 03 日 星期二 【晴】

　　突然間變熱既天氣，真係令人受唔住∼！由於尋晚太夜訓，所以今朝早唔知醒，好彩好阿妹獅子仔打電話俾我，唔係既話可能我返學校會遲到。但係結果我都係遲，不過係遲左同我個好阿妹＆兩個乖囡囡食早餐……返到學校，好少有咁所有堂都無釣過魚！全日最開心竟然係上英文堂既時候，因為一開始既時候阿淳好似發緊夢未訓醒咁行返埋位，結果 MISS MOH 教左我地一個新既英文：SLEEP WALKING，夢遊。跟住我地偉大既 MOH 姐攪左個討論，題目係有八個人響熱氣球度，但係個熱氣球有問題，要掟Ｄ人落去黎維持個熱氣球能夠繼續前進。而家我地每組代表一個人，去說服其他人唔好掟自己落去。結果我地有八個角色出左黎：FOOTBALL PLAYER、MS MOH、COUNTRY BOY、G.BUSH、A.LEUNG、JESUS CHRIST、？同MS MOH II！最攪野係我地組（第三組）之前都係扮 MOH 姐既，但係家霖一出去既時候又攪事，結果先變左做COUNTRY BOY！而阿肥咀講緊既時候，家霖又話佢SLEEP TALKING，笑到我地死咁濟！放學前兩堂係辯論比賽，雖然我唔想出賽，但係最後都嬴左，仲要好少有咁做副辯都拎到最佳辯論員……有Ｄ開心，不過都係覺得怪怪的……

　　放左學，班會員過左聖三一訪團，而我就上左總部同POLLY一齊搵IDY傾下星期日做司儀Ｄ野。POLLY同以前一樣咁好玩∼！今日都好好玩，隻舞好難攪……五點左右，我上返去聖三一繼續同佢地玩，真係玩得好開心！我見到媽媽、哥哥、烈風、傻鴨、叡叡、苦榮、哎呀妹妹牛牛、JIMMY仔、邦邦、阿蕉……好多好多朋友仔！雖然無咩時間識到Ｄ新既朋友仔，但係開完Ｅ之後都玩左唔少人∼！（嘻嘻）好開心好開心，因為見到好多朋友仔，而且仲可以一齊玩添呀！之後仲同哎呀妹妹、邦邦、叡叡、傻鴨、阿婷一齊搭車返屋企添呀∼！

>>2002年12月04日Wed 00:16:20 (GMT+8)

2002 年 12 月 01 日 星期日 【雨】

　　今日一起身，換左件衫就過左愛民村幫手攪ＪＰＣ個攤位。由於家霖過左去澳門跑馬拉松既關係，所以今日既攤位由我同家曦負責。我地攪得七七八八既時候，叡叡打電話話我知佢地班ＤＩ已經放左，於是就上左黎愛民搵我。佢地上到黎，我攪埋手頭上少少野，然後就去左美心同媽媽、HEIDI 囡囡、濠哥、叡叡、阿 DICK 一齊食 LUNCH。食完野，我又趕返去攪攤位，濠哥同媽媽就去左金鐘。兩點幾，我代表ＪＰＣ上台拎左個攤位設計冠軍杯同錦旗之後，就開始忙住攪攤位。其間笑笑同小小就咁行過，要我叫佢地先應，好唔開心囉！不過囡囡、CHERRY、COVER 同佢家姐都有黎探我，所以我好快又開心返∼！四點九左右，終於攪掂晒Ｄ野。我地收拾好場地同分配好物資之後就各自返屋企 LU。返到屋企，休息左一陣，跟住落街食飯，再過左婆婆度拎蘿白糕，然後就返黎做中文閱讀報告做到四點……（仲有兩篇西史論文同辯論比賽份稿未死出黎呀……）

>>2002年12月02日Mon 04:14:30 (GMT+8)

2002 年 11 月 30 日 星期六 【雨】

　　本來諗住八點起身做功課，點知唔記得左教鬧鐘，結果成十二點先起身…沖完涼刷埋牙之後，煮左個麵食。食飽飽，換埋衫，就落左海悅同 HEIDI 囡囡一齊搭巴士上愛民。上到去，我地響７－１１食左Ｄ燒賣，之後就上左京士柏，因為囡囡要上ＤＩ，而且今日係５２步操考試既大日子∼！不過由於我要返學校傾辯論比賽既野，所以成四點先可以返過去。返到上京士柏，好多人都已經走左 LU，不過我知道５２全部都合格晒，連我都好開心！跟住我就同峰少、媽媽、濠哥、囡囡、叡叡、阿 DICK 同 JIMMY 仔去左黃埔既 PIZZA HAT度食TEA。食到六點左右，我又同囡囡、媽媽、叡叡、阿DICK一齊過左去美國冒險樂園度玩！玩左一陣，阿DICK 就走左，而我地四個就去左影貼紙相！然後我地就去碼頭度等車車∼我地玩左好耐先至有車開，於是我地就同可愛既媽媽道別，搭車車返屋企 LU……

>>2002年11月30日Sat 23:29:39 (GMT+8)

2002 年 11 月 29 日 星期五 【雨】

　　一大清早起身拎左影印之後，就陪獅子仔妹妹行返學∼佢送左張大頭狗貼紙俾我，好得意呀∼！跟住我返左屋企換Ｕ，去今日學校攪既彌撒。響分配好大家站崗既位置之後，大約１０：４５我就召集返佢地入去坐。十二點左右就已經禮成走得，於是我就同阿峰、家麟等等一行五人落左旺角行左陣，跟住就上左巴富街球場度搵囡囡、妹妹同阿儀玩∼！然後我地一行五人又走返落土瓜灣度食 LUNCH，食完 LUNCH 我就返左屋企訓左一陣。訓醒，就即刻飛上總部，因為今日係師父同三位師姐著畢業袍既大日子呀∼！一上到去，離遠就見到傻鴨。入到去裡面，峰少、師父、IRIS、FANNY、QUNNIE、師母……好多好多人響度！仲有 LION、之姐、紙巾都上左黎。我同師父、師姐影左幾張正經既合照之後，就開始同師父玩左好多好攪野既 POST∼！響大家玩得好開心既時候，我就攪埋Ｄ手尾，跟住就拜別咁多位朋友仔，去左搭 VAN 仔落旺角搵我兩個囡囡，同佢地去行街街∼！我地行左好多地方，睇左好多野，然後我就發現左Ｄ野啦，就係原來我地三父女都好鍾意食糖同淋雨架∼！雖然我最大既目的係去信和買＜HE-MAN＞漫畫，但係老闆娘話未出，要等下個星期。於是我地就去左行潮特同兆萬∼行到七點幾，HEIDI 囡囡因為要返屋企睇住細佬所以就走先，而我就同阿 LING 囡囡繼續行街街，睇下我最愛既玩具同去買禮物俾我家姐，我仲買左副超俾自己添∼！八點零鐘，我同大囡一齊行返屋企，一路行一路傾計，好開心∼送左囡囡返屋企之後，我就自己返屋企同老豆、媽咪打邊爐，不過我就無咩胃口，食左好少野，但係就陪佢地睇晒成套＜鬼味人間＞∼！！

ＰＳ：囡囡呀，我覺得真係今次真係有少少瘀囉∼！

>>2002年11月30日Sat 00:31:01 (GMT+8)

2002 年 11 月 28 日 星期四 【陰】

　　哈哈∼∼好耐無試過過一個可以咁身心舒暢既一日啦∼！一大清早我就同阿湧、家霖、病蔡由培正一齊去中環集合，全班再由中環去赤柱。去到赤柱，雖然大風落雨無瓦遮頭，但係我地照樣鋪齊架生打邊爐∼！不過，大家都知道我地係無可能乖乖地坐響度打邊爐架啦，所以我地進行左一項好玩既集體活動：掟人落海！基於呢項活動涉及到攪事、玩野、謀略、體力同勇氣五項元素，所以由家霖、家曦同我三個負責帶頭生事∼！我地掟左好多人落海，不過大家都無嬲，仲玩得好開心，唯獨ＩＴ人除外，掂一掂都發我地脾氣，而佢既下場將會係俾我地班既同學永遠集體杯葛！剛剛開始玩既時候，叡叡同專登過黎搵我，不過我因為要掟人落海所以有Ｄ忽略左佢地咁，真係好唔好意思……１１：４５左右七位老師向大家宣佈今日既活動取消（我都唔記得左係咩原因啦！），大家可以返屋企，但係我地同玩到兩點幾先離開舂磡角。之後我同家霖、家曦、豬豬、阿湧、周仔去左行赤柱市場∼真係有好多野睇，好得意∼！行完街街，我跟住阿湧返愛民村，因為我要接我可愛既囡囡落堂嘛∼送左囡囡返馬頭圍之後，我又返屋企拎埋支旗俾阿PAT，咁我既任務就完全完成晒，可以專心咁睇我既林子祥演唱會ＤＶＤ∼！功課？聽日先做 lu∼
　　其實仲有好多野可以寫既，不過我驚成篇論文咁長，大家會睇得好辛苦，所以我唯有撮寫啦∼！

ＰＳ：我會去睇囡囡你個日記板板架∼！

>>2002年11月28日Thu 23:46:05 (GMT+8)

2002 年 11 月 27 日 星期三 【晴】

　　難得最近又有可以傻下傻下但係又過得好開心既一日∼！如果問我上堂有咩趣事既話，可以話無咩發生，小測就更加無趣添∼不過響兩堂中史吉堂我地就繼續進行「活力盃」既賽事！尋日，作為康樂棋新手既我好好彩咁打贏世傑入左決賽，但係今日結果都係輸左俾家曦。之後我地又開辦「大家好午膳盃」，仲另外開設「最高 HIT 數榜」，結果兩個殊榮都落入左 BYRAN 手上，佢仲創下左連入六子既不敗紀錄添∼！上多三堂跟住放學，我地去左愛民村買聽日旅行既糧餉∼！行左一陣，哥哥打電話俾我話我知今日 TRACY 太后上總部照畢業相，我梗係第一時間衝上去啦∼！上到去第一個見到既畢業生竟然係濠鬼囉∼！濠鬼好好呀，佢借左件畢業袍俾我、峰少同桃姐著黎同佢影相，我終於可以著件畢業袍影相啦∼之後我地又同 TRACY 影相相，突然間又多左一大班人上左去，我見到 COVER、JIMMY仔、牛牛、OLAY、LION、紙巾、小志強……總之就好多好多人啦！我地玩得好開心，仲影相影到 JIMMY仔部相機無電添呀∼！！

　Ｐ　Ｓ　：獅子仔果然犀利，發現左我上次食飯打多左嘉麟個名落去∼
另一個ＰＳ：濠哥，我都係當日先知要開Ｅ架咋…
再一個ＰＳ：好呀，我地聖誕節會搵埋你去玩架∼∼

>>2002年11月27日Wed 23:57:44 (GMT+8)

2002 年 11 月 25 日 星期一 【晴】

　　返學既野，千篇一律，不提也罷…都係提放左學之後既事啦∼！今日我上總部，一打開度門就見到我既璟璟媽媽同阿 LING 囡囡∼之後牛牛哎呀妹妹都入埋黎，好開心！我同佢地玩左一陣，然後PETER 仔同黎子浩都上埋黎∼！我地傾下計，等到囡囡班ＤＩ落左堂之後，我地就搭巴士返土瓜灣∼！日子就係咁樣樣無聊但係又開心咁過左∼∼

　　今日收到個好（開心既）消息，就係 IDY 話紅記班高層覺得我舊年響服務計劃頒獎典禮做司儀做得好，所以今年點名要我做多次∼！極度開心呢∼！不過十二月十五日就係正式架啦，所以我要更加盡力，做到最好∼！！希望都可以算係報答 IDY 既提攜同司徒先生既愛戴啦！！

　　講完開心野又到講下Ｄ激氣野！夜晚響我剛剛食完晚餐無幾耐，麥生打電話俾我。本來我都係以為佢淨係想問Ｄ學校Ｄ野，點知佢一黎就插我點解幫阿峰問 TRACY 爭取個 PASS 返黎！我地當日有三位會員因為制服問題而 FAIL 左。其中有兩個明知係掙唔返，所以我都無去掙到，淨係去博下去掙埋阿峰個位。點知佢竟然因為咁而咬住我唔放，仲摷返舊年Ｄ野黎講，我本身因為天氣轉加上多野做攪壞左個身子，已經唔舒服架啦，佢仲要講極都唔理解我既意思同立場，固執到死，激到我俾我老豆同媽咪望住。佢地都好耐無見過我同人講野講到皺眉頭個樣啦……講講下，佢又話聽日返學校再同我講。我完全覺得佢既語氣同態度已經唔再當我係一個ＨＳＬ囉，而家我似佢既馬多過似佢既上層囉！舊年我仲係一個會員既時候佢都仲識得尊重我，而家？！……都係唔講啦，愈打愈咳得犀利……

>>2002年11月26日Tue 00:17:25 (GMT+8)

2002 年 11 月 24 日 星期日 【晴】

　　由於遲左去旺角大球場，所以經紅記高層多次既調職，最後我做左工作人員……雖然係咁，但係我都好開心，因為我既妹妹同兩個囡囡都有黎，而且仲見到好多好耐無見既朋友仔添∼！我同傻鴨、小志強同 TRACY 仲去左四維問其他制服一齊影相∼∼個個制服團隊既表演都好好睇，最後仲有好靚既小型煙花睇添呀∼！完左之後，我就同獅子仔、HEIDI、阿LING、MICHELLE、阿峰同嘉麟落左九龍城既牛肉館食晚餐∼我介紹左大家食牛肉包，好彩佢地都覺得好食！食飽飽，我地首先送左我既細囡囡去搭巴士先，跟住就一齊返土瓜灣，遂個遂個送佢地返屋企∼最後，雖然得我自己行返屋企，但係都好開心∼！

ＰＳ：囡囡，只要我手上面個紅色錶殼仲響度，我都會記得十一月廿四日 7:15 p.m. 呢一刻∼！

>>2002年11月25日Mon 23:28:47 (GMT+8)

2002 年 11 月 21 日 星期四 【晴】

　　如我所言，我尋晚成晚都無訓過，一直整野同寫野攪到朝早。五點零六點左右，我響ＩＣＱ度竟然見到一個令我震撼既名，仲要係罕有既 ONLINE MODE 添！呢位就係（可能係全協恩）最靚、最可愛、最親切既「水姑姑」LYDIA 姐姐啦∼！我好耐無同佢傾過計啦，所以今朝一見到佢我就覺得好開心，因為佢俾我既感覺真係好似我既屋企人咁，所以我好多時都會好掛住佢∼！（但係我又諗唔到咩原因喎！唔好再追問我啦∼！）我地傾左一個鐘左右，跟住我就沖涼換衫，然後出門口同我既好妹妹一齊行返學∼

　　返到學校，我仲精神過平日∼！不過聽完兩個悶人既催眠曲之後，我被逼響一堂吉堂同小息昏迷……LUNCH 之後，我地去左「IN 的家」參觀。真係好正囉，因為有陳啟泰把聲∼（呵呵呵呵∼）參觀完之後，我地沿途扮Ｇ４護送雞蛋去地鐵站（三十幾人既Ｇ４，你見過未丫？）。跟住我就趕返黎同８７開Ｅ（最後一次活動會議 LU…），然後就去左買可樂，返屋企覺覺豬∼不過我愈黎愈覺得我生活響好多人既監視之下，如果唔係既話，點會次次我訓親覺都咁多人打電話俾我，平日又唔打黎搵我架？！

>>2002年11月21日Thu 23:08:05 (GMT+8)

2002 年 11 月 20 日 星期三 【晴】

　　三點幾，剛剛做完功課，而家訓得果兩個鐘又不倫不類咁，所以我已經唔打算訓，一於等到天光然後返學啦！今日係學校人民及社會科學週既攤位日，得家霖、家曦、阿湧同我四個做攤位，連果班所謂既公民教育組成員都唔做野，個個見何博士好洽就唔幫佢手，連少少反應都唔俾，真係世態炎涼……放左學，由於唔想同陳仔爭場既關係，我同班要考ＤＣ既師弟去左何文田某個公園度練操。練到大約５：１５就放晒佢地走，然後就滿懷希望咁上去，中途我仲叫左阿峰幫我去買雲尼拉味可口可樂上去，諗住請媽媽、哥哥、牛牛同我兩個囡囡飲。點知，上到去，無左兩個囡囡既蹤影，可樂又賣晒，好唔開心……雖然有同媽媽、哥哥、牛牛、苦榮、JIMMY、哥斯拉……佢地玩同影相，但係都仲係唔係咁開心，好似俾人掉低左唔理咁……

　　返到屋企，睇完齊天大聖之後因為太倦，所以訓左一陣，然後就開始做班老師夾埋黎俾我地既功課……雞蛋呀雞蛋，我愈黎愈覺得你係想逼我地唔修你果科架，成日要等其他老師俾功課既時候先至要我地做論文，你話你唔係玩野仲會係咩丫！我又開始有Ｄ厭世啦……唉……既然而家都唔想訓，仲有兩個半鐘先夠鐘起身沖涼，都係睇下有Ｄ咩野可以做，搵Ｄ野黎做下啦……

>>2002年11月21日Thu 03:50:47 (GMT+8)

2002 年 11 月 19 日 星期二 【晴】

　　尋晚真係非常非常開心，因為自又叻又靚又可愛既 HEIDI 囡囡之後，我又多左個囡囡啦∼！佢係邊個？之唔係都咁叻咁可愛既阿 LING 囉∼！以後我地「盤璟家族」（盤纏響璟璟媽媽身邊既龐大家族）又多左個新成員啦∼∼

　　今朝同獅子仔妹妹行返學校，雖然行行下落雨，不過我地沿途都有講有笑，好開心∼！返到學校，上左一堂地理之後，就落左禮堂做左四堂問答比賽既司儀∼（間接走左兩堂 ^^ ）上多兩堂聽中國共產黨發展史既故事堂ＧＰＡ（個個乖乖既小朋友都差唔多訓晒）同埋最開心既西史就放學啦∼！本來打算放學就同佢地練操，但係「萬煩既根源」雞蛋捉左我去攪辯論比賽Ｄ野，攪到我成五點幾先有得走……不過都好彩，可以見到璟璟媽媽∼∼∼∼∼我地買完聽日攤位用既材料之後就同媽媽一齊搭巴士返屋企∼！我地聽日仲會上 HEAD 玩添呀∼！聽日 HEIDI 同阿 LING 都會上 HEAD 一齊玩架∼！嘩∼咁聽日咪三代同堂囉∼！呵呵呵呵呵呵∼∼∼∼∼

>>2002年11月19日Tue 22:51:47 (GMT+8)

2002 年 11 月 16 日 星期六 【晴】

　　心情放緩既一日！今日訓到好晏，起身梳洗好之後就同我老婆去左尖沙咀行街街∼都好耐無陪我老婆出過去啦，一見到佢，我就已經好開心！我地響海運行左好幾間鋪，之後又去左七仔買野飲，七點左右我地就各自返屋企……還返個中國紅十字會會章俾剛爺之後，九點左右我就落左街同媽咪食飯。食完飯，我地兩母子就住「幫助」同「關心」呢四個字傾左好耐計，聽左好多我覺得好正確既思想同道理，仲有我老豆而家既諗法同後生既事。原來我一直都覺得諗法同處事手法同我有Ｄ唔同既老豆，後生既時候竟然同我係咁相似……唔知幾時開始我同我老豆之間好似有左道屏障咁，睇黎我應該同我老豆重新建立返一個好關係……一直到十二點三，我地先埋單返屋企。今日，係感受好重，好多，但係個心好舒服既一日。

>>2002年11月17日Sun 01:54:43 (GMT+8)

2002 年 11 月 15 日 星期五 【晴】

　　相信係重感冒既第二日，我已經出現頭痛、頭暈、昏睡、喉嚨痛、聲沙……等等既症狀，一支枇杷膏，仲有一啖就會俾我全部飲晒∼！放左學，我地就同８７一行十幾人去左唱Ｋ，我妹妹獅子仔一早就已經到左，果然係一個準時既叻女！成班人都唱得好開心，但係一個喉沙既人可以唱得Ｄ咩丫……５：００，我落吉野家買左個飯之後就返左學校攪埋班友仔站崗Ｄ野（我仲指揮埋班童軍∼），６：４０我就叫晒佢地返入黎練左一陣間操。跟住我同嘉樂仔、阿峰、唐生、嘉麟、HEIDI 同笑笑去左睇＜七夜冤靈＞，真係嚇到我呆左，唔係因為情節恐怖，而係我好難相信夢工場拍既片竟然仲差過日本片……一Ｄ驚嚇既地方都無囉！相比之下＜鬼船＞仲好睇，都唔明點解影評會比三粒星＜鬼船＞但係比四粒星＜七夜冤靈＞囉！睇完戲，我地去左食雲吞麵，然後唐生走先，我地就一齊行返土瓜灣∼沿途我地有講有笑，玩得好開心∼！返到屋企，原來已經１１：４５LU……

>>2002年11月16日Sat 00:39:47 (GMT+8)

2002 年 11 月 12 日 星期二 【晴】

　　ＣＲＡＺＹ　ＤＡＹ∼！經過之前一晚既辛勞之後，一朝早六點鐘未訓醒我都落左床去梳洗，準備去做一項偉大而神聖既任務：霸爐！七點半，落到去巴士站會合左笑笑、小小、獅子仔同COVER 之後，我地就一齊搭車去中環，再轉車去赤柱既聖士提反灣！我地去到目的地，第一時間就走左去洗手間（車程長嘛）……然後我地玩左一陣水，不過已經足以令到獅子仔對褲腳濕晒。無幾耐大隊黎到，佢地放低晒行李就開始玩集體遊戲。雖然氣氛唔係幾好，不過都算係唔錯架啦！玩完集體遊戲之後就到左火燒孫中山……唔係，應該係燒野食既時間！
　　燒完野食之後，戲玉就黎啦！我指既，當然係水戰啦！由起初得幾支水槍，淨係得１１７玩，到後來十幾支水槍兩團一齊玩，真係好開心！班恐怖份子仲拎埋Ｄ６公升水樽黎裝水倒頭淋，真係玩到傻晒，而且都確定到所有人都濕過身∼最犀利都係阿LING 同COVER ，因為阿LING 俾人淋到成身都濕透晒，而COVER 就俾我推左去花洒度「大清洗」！笑笑同小小就最無辜，明明無水槍但係就唔知點解成為左眾人既目標……由於全部人玩手槍玩得太開心既關係，結果我無阻止到佢地，而本來打算玩既遊戲都取消左，淨係勞煩左張瑞幫我地影大合照。上到遊戲巴回程既時候，大家竟然精神到通車走黎走去影相，得好少人真係需要小睡，真係好難得∼！

　　返到五記，個個鳥獸散，而我、嘉樂、莊峰、嘉麟、獅子仔、HEIDI、COVER、賴小姐就一齊落左去黃埔既美國冒險樂園度玩，媽媽同哥哥（希望大家知道我指既係峰少！！）仲專程黎陪我地玩左一陣∼！就快八點，我地四個１１７既就一齊去左食晚餐，傾左好耐計，好開心∼！然後十點左右就搭車各自歸家！返到屋企，訓左一陣，然後就趕功課趕到而家（兩點幾）……

　　今日最開心大事：我多左個妹妹啦！獅子仔由今日開始加入小黑家族，以後大家要多多關照下佢呀！仲有，邊個紅記仔女敢蝦我妹妹既話，我實唔放過佢架！！

>>2002年11月13日Wed 02:58:50 (GMT+8)

2002 年 11 月 10 日 星期日 【晴】

　　有條叫做小黑既傻仔，由於尋晚成四點先訓，所以昏迷到一點先起身，但係都趕得切去同８７既幹事開會，因為我地約左三點鐘新世紀度開會傾埋星期二去旅行既野。我地由三點幾開始搵地方傾，到四點幾先正式開始傾，傾到唔夠五點就傾完晒。

　　開完會，個個鳥獸散，我同莊峰、HEIDI、笑笑食左Ｄ野，然後就一齊去零食物語買野食，跟住就去左嘉禾睇＜鬼船＞∼！其實套戲個故事幾好架，不過就唔應該標榜係一套恐怖片囉，因為套戲都唔恐怖既∼　睇完戲，我地四個響新世紀行左陣，影左幾張好耐無影過既貼紙相，然後就送笑笑去搭車。剩返我地三個人就去左行玩具鋪、食魚蛋、買野飲，跟住就到送HEIDI 搭車。而我同莊峰響皆旺行左陣，就一齊行返屋企。沿途我地傾左好多野，好開心，其實我唔想停架，但係愈行就離我屋企愈遠，最後唯有分道揚鑣啦……返到屋企已經成十一點幾，一望台面發現原來我仲未做地理份功課，睇黎我今晚都有排唔駛訓啦……

ＰＳ：哥哥唔好意思呀，我都係上載左先發現，因為我本來係想寫左你之後再寫濠哥架，但係就倪匡左囉……
記後有言：笑笑，下次唔好發呆呀∼！事關發呆係會傳染架∼！

>>2002年11月10日Sun 23:53:26 (GMT+8)

2002 年 11 月 09 日 星期六 【晴】

　　一訓醒，攪掂晒自己既野之後已經十一點鐘。然後我就開始覺得自己對ADA 唔住，因為我上唔到HEAD 搵佢……點解我唔上得，因為我要去做老人探訪嘛！今日真係學唔到Ｄ咩，但係就有種感覺，因為我今日同一個啞左既伯伯傾計。雖然伯伯佢好友善，又成日同我地笑，好樂觀。我終於明白，無辦法同人溝通係幾咁辛苦既一件事……今日開會，見到好多新面孔，令我醒覺到我真係好耐無理過義工組既野，我好似好對唔住呢班同我一齊長大既義工咁……

　　聽日同８７開會，我諗又會好開心，因為８７既朋友仔全部都好好人架∼！

>>2002年11月10日Sun 01:16:13 (GMT+8)

2002 年 11 月 08 日 星期五 【晴】

　　痴線架！今日lunch 先知道原來我地個社board 放學就要評分！都話我地學校痴線架啦，朝朝都淨係講各學會既壁報星期五評分，又唔講埋社壁報都評分，仲要無人通知我地呢Ｄ主席級既人馬，攪到我地幾個社地拿手唔成勢……好彩，我地有「神來之筆」既阿湧同「創意研發小組」既家曦幫手用最後三堂時間準備Ｄ野，仲要多謝家霖幫我擋左MISS KAN 兩堂，當然仲有教授幫我地剪字……雖然我地差唔多成七點先攪掂，但係以咁少時間黎做而言，我地可以話係近乎完美啦∼！（雖然全程俾校工阿叔哦左我地好耐，但係佢都好好人，無強行逼我地走。）

　　做完塊壁報，我第一時間飛奔落巴士站搭車上愛民商場！上去做乜？梗係同叡叡＆關邦補祝加預祝生日啦！一上到去酒樓，真係嘩左一聲，事關佢地有成十幾人，要分兩台。好開心見到我老婆、媽媽、濠哥、濠妹、迪路、JIMMY……一大班朋友仔響上面，雖然因為牛牛同LION 黎唔到而覺得有Ｄ失望，但係全晚都好開心！我就因為平日既工作壓力真係愈積愈重，所以我就發晒癲咁玩，個人都舒服左好多好多∼我地除左打邊爐之外，仲好大聲咁唱生日歌，食個靚靚既芒果栗子蛋糕，傻晒咁影相，真係好開心好開心！希望遲下我生日既時候，都可以有咁多人一齊玩，可以好似呢次咁開心∼！！

>>2002年11月10日Sun 00:42:40 (GMT+8)

2002 年 11 月 07 日 星期四 【晴】

　　我真係好唔明白，點解五分鐘可以講得晒既野，要浪費我一堂空堂？！愈黎愈覺得雞蛋周麻煩，雖然佢上堂真係好鍾意突發性爆笑，好似今日咁又將我膀頭上既睡魔趕走左。一條關於太陽高度角既問題：「點解正午十二太陽既高度角咁大但係就唔及兩三點鐘咁熱呢？」一玩，就玩晒全班同學咁濟……爆笑到成個人都精神晒∼！

　　終於都嘗試到，一個星期開七日會啦！分別有星期二同８７開ＦＳ啦，星期三同５０開ＦＳ，星期四同５０開ＳＰ、同培道ＪＰＣ開ＢＢＱ，星期五同１１２、２２５開ＦＳ，星期六就義工組月會，星期日就又同８７開ＦＳ，星期一又再同１１２、２２５開ＦＳ……

　　今日好忙呀∼放左學之後，首先要去音樂室開傾歌唱比賽既野，跟住就飛奔上紅會總部，然後開會開到一半又仆倒落ＪＰＣ會所，最後開會開到八點幾先返屋企……雖然今日真係好倦，個人又頭暈暈咁，但係都好開心∼！

>>2002年11月07日Thu 23:49:11 (GMT+8)

2002 年 11 月 03 日 星期日 【晴】

　　ＹＬＴ∼！正∼！呢兩日可以話係成個星期裡面最開心既日子！呢兩日可以放但晒所有野唔理，一心一意咁去同一班好朋友一齊去學習點樣做事、去合作、去觀察、去反思……雖然返學校讀書都係同一班好朋友學習，但係今次一來係活動教學、二來係學到既野好實用、三來係呢樣絕對住我既興趣∼！家旺好好人，仲好俾心機去令我地學到好多睇黎好普通，但係好實用，而我地又成日忽略左無去諗既野！另外，我地一班ＨＳＬ又玩得熟（雖然原本都熟），其他團委員學到野之餘，又識到其他團既人，我覺得真係好值得高興∼！仲有睇小丙同卿卿響城北既雄姿（哈哈哈哈∼正爆！），紅十字之夜既大紅十字……真係好正！

　　完左ＹＬＴ之後，一行九人去左食ＴＥＡ，食完ＴＥＡ之後就去探小婷∼好開心，因為小婷睇起黎都好似開心左好多，起碼無我預期中咁悶悶不樂先∼不過都好開心，因為小婷２３／１１就可以拆石膏啦！響度祝小婷早日康復！

>>2002年11月03日Sun 21:57:49 (GMT+8)

2002 年 11 月 01 日 星期五 【晴】

　　唔經唔覺，咁又過左一個星期啦。呢個星期真係過得好快，但係都係有Ｄ忙∼之前幾日忙過Ｄ咩我都已經唔多記得，淨係記得做左好多好多野……

　　測完驗就開學生會，開完學生會就同８７開會，同８７開完會就做ＪＰＣ既野，做完ＪＰＣ既野就去ＪＰＣ會所開會，未開完ＪＰＣ個會就走上紅記總部同濠鬼慶祝生日！我買左個音符既公仔俾佢，媽媽又送左個蜜柑盒，峰少又買左個蛋糕……好熱鬧呀∼！仲有傻鴨、關邦、阿叡、牛牛、PATSY……好多好多人呀∼∼之後濠哥同媽媽啦、關邦啦、濠妹啦、我啦五個人去左愛民村打邊爐∼我地９：３０左右先走，玩得好開心呀∼

　　聽日就係期待已久既ＹＬＴ啦∼！但係我又仲未準備喎……呵呵呵呵呵呵∼∼

>>2002年11月01日Fri 22:56:02 (GMT+8)

2002 年 10 月 27 日 星期日 【晴】

　　今日我好乖仔呀∼我由一點鐘去圖書館溫書溫到五點鐘呀∼！不過溫左都係唔識……^^ " 返到屋企，做埋份功課，然後一邊食飯一邊同老豆、媽咪睇一套勁舊既西片＜六壯士＞！（老豆話佢睇呢套戲既時候仲細過我，可想而知套戲耐得幾緊要）雖然舊係舊左Ｄ，不過又真係好好睇。但係點樣好睇都好，我最愛既舊西片始終都係＜時光倒流七十年＞∼！
　　聽日係ｃｙｃｌｅ６既最後一日，星期二就要測驗啦，跟住星期三陸運會，星期四又放假，星期五又再返學校測驗……如果再遲Ｄ先測驗你話幾好呢！
　　星期六就係ＹＬＴ啦，好想快Ｄ到星期六呀！（又唔想咁快測驗，但係又想星期六快Ｄ到，心情真係好矛盾……）

>>2002年10月27日Sun 23:33:02 (GMT+8)

2002 年 10 月 26 日 星期六 【晴】

　　嘩∼！傻左呀∼！今日同家霖、家曦做ＢＯＡＲＤ做到５：００左右，跟住就同埋周仔、阿雞去左Ｍ記食左少少野。然後６：１５就去左ＪＰＣ會所，參加萬聖節ＰＡＲＴＹ∼我地成班友仔玩到傻晒，因為上到去班人都好玩得，仲好好玩∼！ＳＡＬＬＹ件斗蓬真係好閃，家曦個樣真係好似猩猩（講笑咋，唔好打我呀！）∼個個都玩得好開心，不過我９：００左右就要走，因為要去同我婆婆食飯∼∼
　　返到婆婆屋企，大部分親戚都出晒黎同婆婆慶祝生日！見到咁多人咁熱鬧，雖然ＰＡＲＴＹ度早走有Ｄ依依不捨，但係都好開心，因為見到班表哥、表姐同表妹！食完蛋糕，我同家姐一齊走。我同家姐大約傾左十五分鐘，之後佢就上左車返屋企。呢十五分鐘，我覺得個心真係好舒服，個人都好似細個左咁。仲記得以前成日咩都同家姐爭，又成日同家姐嘈交，直到佢搬走左之後，起初我覺得咩都係我一倨人用，無人同我爭所以好開心！但係時間一耐左，我就開始掛住我家姐……無佢同我爭電腦，我就用到好夜，唔知節制。無佢同我傾計，成日響屋企真係好悶。或者呢個係我而家唔多記得點同人溝通既原因……我終於明白到點解Ｄ獨生既朋友會話我聽佢地幾咁悶，因為我都體會到啦……各位有兄弟姊妹而又覺得佢地煩，唔想要兄弟姊妹既朋友，你地其實係身在福中不知福！因為當你一個人既時候，果種寂寞既感覺真係會令人變得沉默，難聽Ｄ講句真係會變做自閉仔架……

ＰＳ：ＰＡＬＬＹ話我既髮型唔好睇，係時候轉髮型，所以我又走左去剷青ＬＵ∼

>>2002年10月27日Sun 00:23:50 (GMT+8)

2002 年 10 月 25 日 星期五 【晴】

　　尋晚真係完全進入休克狀態，由８：００左右訓到今朝９：４５先起身，由此可知我係幾咁倦（又或者係幾咁懶）……尋日係我地學校既陸運會第一日，由於今年係第一次身兼紅十字會總隊長同社長既關係，所以就第一年試到忙到痺既滋味！作為一個社長，我要幫手叫班啦啦隊大叫口號，用強自己社既士氣；但係作為一個急救員，我應該守住急救站同急救室！結果，我就要花費比一個運動員更加大既運動量，兩邊走。相信所跑既路程都差唔多有八千米架啦！雖然係好倦，但係見到兩邊都做得唔錯，個心都舒服左Ｄ，所以訓都訓得耐Ｄ……（好開心，有小朋友響我去左急救站幫手既時候，同阿湧講話社長，即係我，好靚仔∼！呵呵呵呵呵呵∼∼∼∼∼）
　　休息左十幾個鐘之後既今日，１２：００，我去左同「余記歌神」鮑魚唱Ｋ，事關我真係好耐好耐無見過佢啦！我真係好掛住好可愛既鮑鮑呀！之後就返左學校同家霖、家曦、阿湧一齊攪ＪＰＣ個ＢＯＡＲＤ既初稿，聽日就返學校做埋佢∼！攪完個ＢＯＡＲＤ稿，然後就落左旺角買Ｄ萬聖節用既野。買完野就各自返歸。我返到屋企休息左陣，跟住就落左中心做功課，但係都係做唔晒……好彩離星期一仲有兩日！

>>2002年10月26日Sat 00:15:00 (GMT+8)

2002 年 10 月 22 日 星期二 【晴】

　　呢幾日要係忙得好緊要，未攪完紅十字會既野，又有社既野要做。後日就陸運會啦，今日雖然將Ｄ野入晒箱，但係仲有 BANNER 同大聲公要聽日先送到，睇黎聽日又拿手唔成勢啦。好彩班中一學生係都幾俾心機去練啦啦隊，唔係既話我都真係會嘔血至死。尋日地理小測，我因為無時間所以無溫到書。諗住Ｄ題目都唔會太深啦，點知完全唔識……好彩全班都唔識，哈哈哈哈哈哈∼∼∼∼
　　星期日上ＣＭＴ，我唔見左個金章，好唔開心。原本 LION 同 PATSY 話去睇戲架，但係因為佢地又話有野做所以無去到……不過見到媽媽咁鍾意阿峰、之姐同我埋份送俾佢扎花，即刻成個人都開心返晒！
　　上星期五有兩件事真係令我覺得好「嘩」一聲！第一件事係，我估唔到全校班暴民小息既時候，一聽到紅色暴雨警告訊號，竟然全部企晒響走廊同操場度大叫！加埋學校邊既鐵絲網，個景象真係好似監獄風雲！第二件事，係我咁大個仔終於第一次近距離見到閃電啦∼！雖然唔係劈落我度，但係我睇得好清楚，特別光既一道有少少藍色既白光，再加上側邊不規則突出黎既刺，真係諗起都覺得正到暈呀∼！（已經暈左 LU ∼）

>>2002年10月22日Tue 23:30:38 (GMT+8)

2002 年 10 月 17 日 星期四 【晴】

　　食完 lunch 之後，我同家霖、子豪、嘉偉一齊買左好多寶礦力返學校準備陸運會俾班運動員飲。當我入到教員休息室放低左箱野之後，周 SIR 同 MISS TANG 讚我話我做事有交帶，又快手。當我好開心咁走出教員室之後，我見到我ＵＯ同麥瑛杰傾緊野。我諗住同佢匯報埋ＪＵＴ既野既時候，佢就皺埋眉頭好嬲咁鬧我唔幫手操班儀仗，又鬧我做整到唔拖唔水，急救站又未出到張當值表俾佢，Ｕ７又俾人彈返轉頭，仲要鬧我咩都唔做。我解釋返我有做過Ｄ野，最後佢就話我無跟進……
　　我起初覺得好嬲！明明麥瑛杰月頭已經話俾我聽開始操儀仗，我信佢可以攪得掂啦，我甚至響放學都好唔好意思咁要班社幹事等我一陣，然後專登去睇下佢地中二要去考操既操成點。（因為幾次星期四我放左學都有野做，所以睇唔到儀仗）點知麥生前幾日先同我講話唔夠人。ＯＫ，唔夠咪去搵囉，大果班唔肯操，中二未考試既我都唔介意丫！點知我次次問返佢佢都話搵唔到，叫佢約班人星期六返學校操，佢又會幫班人諗埋會有咩藉口……急救站當值表，我叫張瑞幫我手攪，佢就因為唔知咩人有ＹＦＡ，咩人肯做野等等既問題而停滯左好耐，我同ＵＯ都話可以俾Ｄ無ＹＦＡ既會員去學下，結果我催左幾次都無回音……個 CLUB BOARD，我由一開學已經叫班ＣＯＭ攪，當時有三個人舉晒手話攪。結果呢？我要響唯一一次無野做既空堂度抽時間自己落去做，雖然做唔晒，但係起碼都叫做將個變晒色既 BOARD 翻新過丫！但係結果又點呀？咪又俾人鬧，話我拖泥帶水囉！仲有張 COMMITTEE LIST，幾個人話整但係到而家都未有影，連份稿都未見過！最後我搵張瑞幫手，佢即晚幫我打起，我第二日拎返學校俾ＵＯ睇，ＵＯ又話文法錯左，要整過張，結果而家整左，只要印埋就可以派。仲有好多好多野，明明我係講左，我又跟進過，但係Ｄ人唔做野，最後就鬧我唔做野。而家除左張瑞同莊峰兩個ＰＯＳＴ既野之外，根本無一個 POST 既野係唔駛我操心既……
　　我覺得好心淡。我明明為自己團做左咁多野，明明已經擺晒成副精神落去攪好自己個團，為既到底係咩呀？我只不過係想盡我能力攪返好１１７個名，希望下一屆既新會員可以有多Ｄ野玩，舊會員唔會好似以前咁咩課程都好似無得上咁。我而家做晒社既野，都只係想陸運會當日可以俾班幹事易Ｄ跟進，我可以專心處理急救站既野。但係而家，我無啦啦俾ＵＯ鬧，仲要係用六年黎都未試過咁重既語氣鬧……我覺得呢個ＨＳＬ再做落去都無咩意思。我花左咁多心思去攪好自己團對外既形象，到頭黎又俾Ｄ遊手好閒既 COMMITTEE 窒，又要俾ＵＯ鬧，仲要幫佢地食一堆死貓，揹一抽黑鑊，佢地仲要覺得自己無錯，我係羅苦黎辛！既然係咁既話，我做咩仲要幫佢地手丫？！與其放咁多時間落去幫佢地，等佢地學野，倒不如我用Ｄ時間黎溫書好過啦！就算我用晒Ｄ時間黎訓，起碼我都叫做每晚夠訓先！我個心已經好倦啦，我唔想再因為一班恩將仇報既人而浪費我既心血！既然佢地唔想攪好自己團個名既話，ＯＫ！要本 PAIR 既話，我可以 PAIR 過任何人！但係我唔想佢地傻更更咁過左一年就算，始終有得一個機會，我就希望佢地可以有所得著，甚至係成長……

　　ＰＳ：多謝峰少同芝士仔，你地既開解，令我舒服左好多……

>>2002年10月18日Fri 00:21:02 (GMT+8)

2002 年 10 月 15 日 星期二 【晴】

　　哈哈∼家霖今日見到套阿森一族公仔之後雖然無咩點講自己既感覺，但係我感覺到佢好開心，因為佢係咁望住套公仔響度笑。見到佢咁開心，我都好開心，因為佢係我響學校最最最好既朋友！今日我地上世史堂既時候仲笑到肚痛，但係笑既原因真係可以話唔知點解∼∼只不過係家霖指住王晶個中間分界頭講左聲「杜拉格斯」，然後又話外星人係「布歐」，跟住我地就笑足半堂∼∼放左學，我見返好耐無見，非常之掛住既崔峰！雖然我地淨係傾１１７既野，但係都好開心，因為我好耐無試過同佢傾計傾到咁喋喋不休啦，可能係崔峰俾我果種親切到好似親生阿哥一樣既感覺，令到我可以將好多積左響腦裡面唔想講既野都講埋出黎！過左今日，成日人都舒服左唔少∼！
　　崔峰，小心身體呀，你仲要靠對腳搵食架∼！

>>2002年10月15日Tue 23:53:05 (GMT+8)

2002 年 10 月 14 日 星期一 【晴】

　　雖然今日無乜點做過Ｄ咩，但係都好開心∼！事源我今日落左旺角去買禮物俾家霖，跟住就行返屋企。行緊返去既時候，我見到一個細路女拖住隻狗仔過馬路，個細路女個樣好得意，不過都唔夠隻狗仔得意∼！隻狗仔應該係北京狗黎架，個身大約得兩隻手板咁上下長，Ｄ腳仔都係得我隻手指咁上下長，行路果陣擺下擺下咁，真係好好好得意∼！！
　　呢幾日買左唔少 BATMAN 電影版既套裝 POSTCARD 返屋企，因為一來我鍾意蝙蝠俠既野，二來係夜冷鋪真係賣得好平，所以而家多左好多重複既卡。雖然有卡多，但係我絕對唔會掉左佢架！如果有邊位朋友仔都鍾意蝙蝠俠既話，不妨問我拎丫∼∼

>>2002年10月14日Mon 21:43:19 (GMT+8)

2002 年 10 月 12 日 星期六 【晴】

　　勁開心既一日呀！一朝早我就起左身，同峰少、之之、紙巾去睇媽媽既宣誓典禮∼去到培正，見到雞仔、阿GIL、阿鹿……好多好多好掛住既培正朋友仔！我仲見到幾團既新 COMMITTEE ，忽然覺得自己好似有Ｄ脫左節咁……:P
　　同媽媽、濠哥、峰少、之之、阿峰、阿睿一齊去食完飯之後，我地就上左峰少屋企玩∼無幾耐傻鴨同 RACHEL 都上埋黎。我地打麻雀打足一日，不知幾咁開心，夜晚仲同一齊封食飯，食完飯又再返上去打麻雀，仲睇埋好耐無睇過既＜黃飛鴻笑傳＞同續集＜黃飛鴻對黃飛鴻＞！玩足一晚真係好好好開心！

>>2002年10月14日Mon 00:14:42 (GMT+8)

2002 年 10 月 11 日 星期五 【晴】

　　聽日就係媽媽既人生大事……宣誓成為紅十字會正式會員呀∼！響度預祝左聽日既宣誓典禮順順利利先∼！
　　好多謝阿哥峰少∼有兩首我搵左好耐都耐既到既舒情舊歌，佢竟然可以響兩日內就幫我搵到，真係非常犀利！辛苦晒你啦，阿哥∼！
　　估都估唔到，今日竟然會有咁多人上 HEAD。媽媽、峰少同我三母子一齊上左去買風褸，因為下星期日ＣＭＴ可能要著∼今日又同傻鴨、濠哥、關邦、JIMMY仔、Ada 同之之玩喎！仲俾我撞到 Lily 添呀∼呢個女仔，真係愈大愈靚（唔好話我咩呀，我老婆都係咁講架）！
　　本來以為隻牙今日就可以攪掂埋佢，點知原來今日只係要去做牙模，下個再下個星期一又要再去複診，今日仲要因為打左麻醉針，攪到半邊面痺痺地，連索鼻都唔得……印鼻水既日子一Ｄ都唔好受……
　　而家每晚都開Ｄ舒情既歌聽下，當係舒緩一下精神啦∼平日朝早既工作壓力同要處理既人事關係實在太多啦，連愛好和平既我（唔打交既時候我都算係架）都逼住要鬧Ｄ中一、二，唔識趣既學生。如果再係咁落去，我驚我既心情會係咁暴躁落去……


>>2002年10月12日Sat 00:21:23 (GMT+8)

2002 年 10 月 10 日 星期四 【晴】

　　樂社既野好似做極都做唔完咁，今日Ｄ野都未傾好，聽日又話要交……十月廿四日就係陸運會，又要整 BANNER 又要整佈置，仲要諗埋口號，另外仲要計埋釘鞋、水之類雜項既錢，真係頭都大埋。
　　今日見返成年無見過既 CWYNETH ，真係開心到不得了！佢個樣同心境都好似無變過，都仲係咁細路女，仲係咁鍾意笑∼計計下，原來我識左佢都已經好耐。諗返起佢，好似真係咁多年都無變，都係咁似小朋友，又咁玩得，而我就好似變得老餅左咁……唔得∼！我都要放開自己，做返個爛玩既小黑∼∼∼

>>2002年10月10日Thu 23:38:46 (GMT+8)

2002 年 10 月 09 日 星期三 【晴】

　媽媽今日好叻女呀，唔單止將個會帶得好好，仲識得帶起話題。只要再加少少經驗，我相信媽媽一定可以做得更加好！應該係勁好呀！我相信只要俾心機做好自己既本份，就一定會學到好多書本度學唔到，但係非常寶貴既知識！所以媽媽要努力呀，仔仔會支持你架！
　好忙呀好忙呀……日日返到學校唔係攪紅十字會，就係ＪＰＣ同樂社Ｄ野，真係得閒死唔得閒病（不過都病病地，傷風呀∼）！我好想快Ｄ過埋個陸運會，咁我就可以做少好多野，唔駛咁煩啦！仲可以開始溫書……我而家先知道，原來無時間睇書真係學得比人慢好多架……
　今日返到屋企，呆左咁坐響張凳度諗左一陣，發現自己真係好有問題。我最大既問題係：點解我唔可以好似以前咁，同Ｄ朋友玩得咁開心？直到同阿湧響ＩＣＱ傾左陣，先至發現一個好大既原因：原來我好耐無試過打電腦同人傾計啦……其實每一日我都好想將心裡面一Ｄ開心同唔開心既野同人分享，但係我好似俾左個規限自己－－要令身邊每個人都開心。開始幾年都無咩問題，發展得都好好，但係到左最近一年間，我發現自己真係好唔掂。以前同我交情比較深既朋友，不知不覺間陸陸續續咁離開左我既生活圈子。佢地唔係去左外國讀書，就係要返工，唔得閒。而家身邊交情最深而仲保持到緊密聯絡既，好似淨係得返峰少同家霖……我愈來愈覺得自己一日比一日退步，一日比一日頹廢。我根本連自己想點都未知！我想同朋友既關係好Ｄ，但係又要淨係表現出自己開心既一面，收埋晒Ｄ唔開心既野。忽然間我好想過返以前既生活，成日開開心心咁同朋友傾計、玩，將自己開心同唔開心既事都同人講，無論識既又講、唔識既都照講，得閒又搵下Ｄ得意野送俾人……講講下，我好似又發現到另一樣野，我好似無以前咁放開自己去俾人認識。而家好多人知道有一個叫小黑既人，學校又有人話知道我做野掂先過黎我個社度幫我手，但係我唔想人地覺得我做到野呀！大家叫我幫手做野，無問題，就算我唔識我都會問人，總之就幫你做到好好睇睇，但係唔好再俾我既外表呃到啦！其實我係有好多野都唔識，好多野都要靠問人先攪得掂。功勞，唔應該係我一個人獨佔……我好想大家當返我係以前果個咩都唔多識，咩都唔多曉，但係一有野玩就會諗起既小黑……起碼響大家開心既時候，腦裡面都會浮現出一個爛玩既小黑既樣……

>>2002年10月09日Wed 23:46:33 (GMT+8)

2002 年 10 月 08 日 星期二 【晴】

　好開心，今日上總部見到媽媽同哥哥（峰少），仲有好耐無見既提子糖∼！濠鬼、傻鴨、阿睿、 jimmy 仔……個個都響度，真係好開心∼！
　響總部趕返學校之後，上左去搵阿峰，同 50 開會。開會既時候，雖然我係同 50 討論緊到時個活動點攪，但係個心就愈來愈唔舒服。我唔明點解佢會響度（知道我地內部問題既人，應該知道我指既係邊個），仲要帶埋兩個今年先入會既同學去開會。ＯＫ，帶去開會我都無咩問題啦，當係提供下意見我都無所謂，不過佢兩條友真係令我好反感。你話帶兩個同學入會，出去活動一齊去既話，我絕對唔會反對，但係要佢兩個做籌劃活動既委員，我真係覺得好有問題！一來，兩個人咩關於紅十字會既野都唔識；第二，佢兩個擺出黎個款完全自以為有型一類，即係喱啡！第三，講埋Ｄ同活動無關既白痴野。第四，俾佢地籌劃，等於俾少左機會Ｄ有心做野既會員……
　總之，我淨係覺得今日得兩個字：失禮！
　聽日去培正開會，我一定唔會再俾佢地兩個去！作為一個ＨＳＬ，我雖然係比較寬鬆，但係絕對唔會再俾一Ｄ咁既人影響我地紅十字會１１７團既形象！！如果某人做事再係咁唔理後果，係都要逼我埋牆既話，我就算俾人話我殘忍我都一樣會當眾鬧佢一鑊勁既！面，係人地俾既；假，就絕對係自己丟！
　>.<"

>>2002年10月08日Tue 23:55:06 (GMT+8)

2002 年 10 月 07 日 星期一 【晴】

　今日放左學，同家霖去左佐敦「鴻興玩具」度買平野，因為我上次響本玩具誌度見到佢地做緊特價周。Ｄ野無想像中咁平，特價貸亦無想像中咁多（雖然佢本身Ｄ貸已經又平又多），但係我都買左Ｄ幾得意既野走。最過癮既，係我同家霖一人買左個可以按制既懞面超人變身腰帶電話繩，仲要兩隻款都唔同，不過你有興趣買都唔好意思啦，因為最後兩個都俾我地買埋。雖然家霖想買既阿森一族公仔連場景俾人買左，但係都有兩隻阿森一族既其他公仔補返數。而我呢，就買左架可以打開既迷你蝙蝠車、１２吋公仔就唔少得架啦，仲有一隻高達、一套ＢＢ戰士扭蛋、同埋一隻禁止吸煙公仔！收穫都算好豐富囉∼！
　開心完之後，又要去覆診。本來隻牙好地地無咩痛既，點知俾牙醫整完之後竟然痛到震！個牙關都因為要 MAK 大個口太耐所以勁痛……由佐敦行返去診所，然後等左成個鐘先可以入去睇症，再加埋最近攪黎攪去都攪唔好既頭痛，個人實在太倦啦，所以一返到屋企就大昏迷到不省人事，到頭先先至起身做埋篇英文作文。陣間，再訓 LU ∼∼

>>2002年10月08日Tue 01:56:39 (GMT+8)

2002 年 10 月 05 日 星期六 【晴】

　今日開完 HSL MEETING，然後就返左屋企食晏，睇ＤＶＤ，訓覺，得到好充分既休息，然後同媽咪、舅父、舅母出街食飯。食完飯，我就去左中心既自修室度做英文剪報既功課。用左差唔多三個鐘，終於完成左兩篇關於道德問題既ＮＣ（英文唔好，係做得慢Ｄ架啦，體諒下我既苦況啦……）。
　當我執好晒野，離開中心既時候，我見到中心門口借俾小朋友玩既電腦度浮現左一隻 GAME 既畫面，呢隻 GAME 個名叫做「小朋友齊打交」。我都有玩過呢隻 GAME，仲覺得幾得意。但係當我今日再睇到呢個名既時候，我終於覺得有問題，問題在於點解要改個鼓勵小朋友打交既名？！而家既小朋友點解愈來愈暴戾，我相信係太多暴力思想傳入左佢地個腦。佢地唔知道自己同八神呢類格鬥 GAME 既人物有咩唔同，只係知道佢地打得勁，就有樣學樣同Ｄ同學打交。美國、日本既暴力漫畫外銷向全個世界……再係咁落去，個世界會變成點，無人會知道。低係有一樣可以好肯定既野，就係再唔作出監管同正確既教育既話，情況將會愈來愈差……日記寫到好似論文咁，唔怪之得俾人話我長氣LU……

>>2002年10月05日Sat 22:56:02 (GMT+8)

2002 年 10 月 03 日 星期四 【晴】

　今日 lunch time 去幫 Miss 簡手做公民教育周既活動－－落中一中二睇閒帶∼一盒由樂施會提供，講貧窮問題既閒帶∼由於班中一既野獸實在太過凶猛，攪到我打後三堂都倦到無辦法唔訓……
　自從食 lunch 咬甩左個牙套之後，我忍痛到放學開完ＪＰＣ會員大會同練習聽日公民教育周問答比賽既ＭＣ之後，又再去見牙醫……好驚見到佢呀……
　到左夜晚，食左餐好開心既飯，見到我最掛住既人，你都咪話唔開心∼！不過聽日又要做ＭＣ啦，睇黎又要帶定司儀出貓卡 lu ∼！^^

>>2002年10月03日Thu 23:40:41 (GMT+8)

2002 年 10 月 02 日 星期三 【晴】

　今日係我第一日響呢處寫日記
　亦係勁正既一日∼！
　今日我只係上左三堂！除左頭三堂之外，其他堂都只不過係活動堂∼第四、五堂係學生會答問大會，我就跟細佬落左去禮堂俾人問，不過最開心都係睇到隔離候選內閣班高分低能既低能仔做埋Ｄ低能野，俾人噓，同埋俾我地串。真係諗返起都覺得勁好笑！最好笑都仲係個白痴主席同細佬講：「我讓你地咋！」嘩∼！咁我地咪要好多謝你地？！家霖話齋：「痴線！」
　之後第六堂中史，係吉堂，第七、八堂就落禮堂聽宣明會既講座。最忙既時候，反而係放左學之後∼紅記開會啦，公民教育周問答比賽司儀啦……一個頭兩邊走∼
　一放左學，拿拿臨去牙醫度覆診。經過一輪痛楚之後，我終於整左個暫時牙套，非常之唔想見到隻鋼牙……好彩醫生話下星期五會同我整隻瓷面既牙，唔會俾人見到係鋼牙∼∼

>>2002年10月02日Wed 23:19:34 (GMT+8)