2003 年 03 月 31 日 星期一 【晴】

中午笑著走了一趟。
到了晚上，卻想大哭一場……

>>2003年04月01日Tue 05:36:56 (GMT+8)

2003 年 03 月 29 日 星期六 【晴】

　　今日晏晝，同好耐無見既 LYDIA 去左食 LUNCH，傾左好多野。之後行左陣街，佢就返左屋企，我就響旺角行返屋企。我過去學校附近間夜冷鋪度買左幾枝筆，然後響屋企樓下個公園度坐在好耐。我諗左好多野，好多可能係杞人憂天，又可能係自己鑽左牛角尖既野。之後五點幾返到屋企，同媽咪食完飯我又落返旺角。我行左陣，響金輝度好八卦咁幫個員工攪陳列櫃個FIGURE，幫佢擺晒POST咁，仲等佢鎖埋個櫃我先走。呢個都叫做我既製成品掛∼？！等逆天黎到，我就同佢去仙蹤林度飲野傾計。都差唔多成年無見佢啦，一傾就傾到成兩點，由旺角傾到去九龍城。因為太夜，逆天驚我俾我媽咪話我，所以就叫我返屋企，我就一邊唱歌一邊返屋企。夜晚，點解諗起既都係傷心既情歌？

　　搵返一首歌，歌名叫做「緣份的天空」，係湯寶如當年一首好HIT 既歌。我記得小學既時候電台播呢首歌0個陣我用錄音帶錄低過，仲跟住黎唱。我諗成個四月我都會係咁聽呢首歌，因為首音樂個 FEEL 好似幾0岩呢輪既我……

>>2003年03月30日Sun 02:59:08 (GMT+8)

2003 年 03 月 28 日 星期五 【晴】

　　十日長假既第一日。一早訓又一早起身，沖個涼十一點左右就出左門口，因為今日係牛牛活動日。佢約左峰少、阿DICK、JIMMY仔、LION、關邦……好多好多人去食 lunch。我地響何文田廣場間Ｍ記度食野，食完野之後峰少佢地就繼續返學，我就同牛牛過去鑽石山度行街街。我地行到五點幾就返返去土瓜灣。送左牛牛返屋企，我就落左三一中心同我個義工小組既負責人CURIE 姐傾計。傾到差唔六點半我就返左屋企。食完飯，我落左樂民中心俾份報紙麗文之後，我就繼續寫自己既野，攪到十點就返屋企。

>>2003年03月29日Sat 17:19:41 (GMT+8)

2003 年 03 月 25 日 星期二 【晴】

　　統測既第一日，測到十二點幾。之後我地就一行七、八人一齊落旺角食飯，食完飯就回復我地既另一個身份－－戰士！我地成班人過左去打1942，而我就由高級民兵成功升級，因為我立左一級戰功∼！三點幾，我就搭van 仔上總部。一上到去就見到牛牛、阿蕉、JIMMY 仔同關邦。我同佢地一齊攪文書Ｄ野，之後崔峰、肥曦同媽媽都上左黎。我地玩左一陣，六點左右就設屋企LU∼

>>2003年03月26日Wed 18:04:59 (GMT+8)

2003 年 03 月 24 日 星期一 【晴】

　　呢個星期一，我地成班都變晒做醫生。由於非典型肺炎太盛行，所以好多學校都要用消毒藥水去做全校清潔，結果成間學校都充斥住醫院味。我就因為咁而變左做骨科既蔡醫生，我地班仲有唔少醫務人員添∼！中史堂因為要做中文作文寫建議書，Ｄ資料就變晒做醫學報告，班主任同其他阿SIR都做晒院長，最攪笑都係我地響圖書館傾計既時候，守圖書館個MISS 「殊」我地，阿弘醫生就加左句：「都話茶水間咁大聲講野架啦，而家俾護士長殊啦！」
　　LUNCH 既時候我同世傑過左去阿里山同好耐無見既芝士食飯，佢Ｄ頭髮又長左、對眼又矇左，不過都仲係咁好玩∼！我地吹左陣水之後就要返學校，有Ｄ無癮添……放左學，我去左五記搵椰子拎返本MILK 之後就返左屋企。一入到屋媽咪就俾左個好消息我，就係我老豆終於幫我搵到「東方三俠」隻VCD！完全地咁掂！因為呢隻VCD 我搵左好多間碟鋪都搵唔到。老豆今次叻到震呀∼！！

>>2003年03月24日Mon 23:49:54 (GMT+8)

2003 年 03 月 23 日 星期日 【晴】

　　今朝去左剪頭髮，本來都唔係咁想剪，不過我媽咪又想我去剪頭髮，咁唯有順下佢老人家既意思啦。之後兩點幾我就過去尖沙咀，因為今日椰子個妹響文化中心度表演，佢又有飛多所以就叫埋阿LING同我去啦∼！睇完妹妹既表演，我地就去左海港城度行街街。我地同妹妹去DISNEY STORE、美國冒險樂園、玩具反斗城……之後又上左去睇海境。呢個小朋友真係好得意，又精靈又醒，同佢玩真係好開心！九點左右我地就去美心食飯。阿LING 話妹妹Ｄ動靜好似我，因為其實我同佢都好爛玩……食完飯，我同阿LING 送椰子同佢個妹去搭地鐵，仲同佢地搭到去旺角先轉車返屋企。真係好唔捨得呢個小朋友呀！唔知幾時會再見到佢呢∼？！

>>2003年03月23日Sun 23:31:56 (GMT+8)

2003 年 03 月 22 日 星期六 【晴】

　　一大朝早又要七點幾起身去聽個咩野國民講座，我聽到十點半就已經走左，一來係悶到我唔想聽，二來Ｄ資料係中五中史黎，我聽黎作用唔大，三來係尋晚峰少叫我去唱Ｋ（睇黎呢個係重點），所以我就同峰少、肥曦、聰聰、濠鬼、LION、豬媽（:P）、傻鴨去唱Ｋ。我同肥曦由十一點嗌到差唔多一點，然後就過左去五記，因為我要借本畫簿俾我既好徒兒睇。之後就同87 班 MEMBERS 一齊去家維村間Ｍ記為佢地步操考試合格攪慶功宴∼！我同佢地一齊影相、食蛋糕、玩……真係好開心！估唔到既係佢地竟然真係會同我預祝生日之餘仲買埋生日禮物俾我……真係好感動……之後我同阿ling、椰子、聰聰同阿叡去行紅磡廣場。我地去買糖食、睇poster、睇玩具、被人跟蹤……然後阿叡有事走先，我地就過左去黃埔度行街街同食飯。返到屋企，因為太倦無咩笑容，老豆以為我因為尋日件事嬲左佢，結果我就聽媽咪說教到十一點幾（差唔多成個鐘）……聽完我已經倦到即席訓低左……

>>2003年03月23日Sun 12:54:45 (GMT+8)

2003 年 03 月 21 日 星期五 【晴】

　　其實今日同平日都無咩分別，又是者返學、放學，不過呢兩日放左學都同班同學去左打仗。夜晚，我就過左港島總部開捐血大使既會議，一攪就攪到十點幾先有得走。之後我就同峰少返土瓜灣打冷食霄夜。
　　呢一晚，感受好深。最近我又再次渾噩過日，日日都知道自己生存緊，但係日日都唔知道自己做緊乜。嘻嘻哈哈、食飯訓覺，一日就咁過左去，追都追唔返。好多時一個人呆下呆下，唔知道自己既崗位響邊度，唔知道自己既定位響邊度。就好似一個浮標，飄下飄下，隨住海水既潮汐搖擺不定。但係直到頭先，我又突如其來咁暫時性開一開竅。我諗下我身邊，其實有好多朋友都對我好好，好支持我。如果我再係咁樣樣過我既日子，唔單止我一個人會損失左生命中珍貴既時間，仲會令支持我既朋友失望。所以，希望我可以重新企返起身，面對呢個世界好囂咁講句：「無我既朋友就唔會有今日既我，有今日既我就無野做唔到！」

>>2003年03月22日Sat 03:24:08 (GMT+8)

2003 年 03 月 19 日 星期三 【晴】

　　終於可以on 返 line 啦……頭先真係嚇死我，無啦啦登入唔到，仲以為我個acc 已經俾人dele 左添∼！無得上網呢幾段時間有好多野發生左，包括YU87 班小朋友已經考完步操試啦、同兩個囡囡星期日去左睇＜下一站天后＞啦、用上ＧＰＡ堂既時間寫左個故事同畫左好多幅相連故事既角色設定啦、死肥仔上堂成日自己玩又聊Ｄ中一玩攪到我要係咁叫停佢啦……太多太多啦！！不過我而家有Ｄ眼訓，之前又唔記得左寫低，所以好多要講既都唔記得左 lu……
　　不過，最近最多人講既都係外星人傳播黎香港既「飛碟型肺炎」！如果懷疑自己真係咁唔好彩患左非典型肺炎既話，可以打電話去２１９９９１４９。呢個唔記得係醫務署定邊個醫療機構九龍區辦事處既電話，不過只係查詢既話就千其唔好打去啦∼！講落我都好似有Ｄ鼻塞添……

>>2003年03月20日Thu 00:04:09 (GMT+8)

2003 年 03 月 02 日 星期日 【晴】

　　朝頭早同媽咪、家姐食完早餐之後我就返左屋企，一直到三點幾我先同家姐一齊出去深水（土步），因為我地要去睇玩具同買野俾媽咪∼！家姐教左我點去之後，我諗我遲下可能都會成日去……（玩具狂徒 >.< " ）買完野之後我地就去左食 tea。食完 tea，家姐就同佢男朋友返屋企，我就過去黃大仙同 LYDIA 一齊去騰龍墟。話晒都係最後一日，之前又無去睇過，所以印象都幾好。不過最正都係Ｄ野食好平，我地食左都唔少野∼　勁開心∼　^^　之後 LYDIA 買左盒炒雞翼尖俾我拎返屋企俾媽咪食。七點幾，我地就搭車返馬頭圍。送左佢返屋企之後我就自己行返去。返到屋企第一時間拎我同家姐買既大MONCHHICHI 公仔俾媽咪，又俾盒雞翼尖佢食。媽咪笑得好開心，好似個小朋友咁∼　如果媽咪成日都咁開心就好啦∼！

>>2003年03月02日Sun 22:56:27 (GMT+8)

2003 年 02 月 27 日 星期四 【晴】

　　好開心既一日！今日 lunch 同尋日一樣開班教授畫公仔。而我又收到一個新消息，就係家霖竟然響前幾日亂咁彈個琴既時候作左首曲，由余彥宗試左好多次之下終於都搵得返Ｄ音黎彈。佢地為呢首歌改左個好靚既名，叫做「扎普里斯的戀愛」。雖然淨係得一句歌詞，但係都覺得好正！放學前兩堂世史，由於博士無返，所以我地就大玩特玩！家霖帶頭響黑板度寫我地班Ｄ同學既名既同音字，之後黑板上就出現左「伍浩昌」、「鐘樂凱」等既名，不過最正既都係「王秀琴」（呢個要倒轉黎讀）！阿湧本來響學生會室度拎左塊吹氣板板上課室，諗住上堂既時候用黎挨既。結果由我幫手將呢塊好似滑浪板既吹氣板板拎返落學生會室，加上大半班同學一齊唱既「SUGER IN THE MAMALAY」作為背景音樂，仲有外面充沛既陽光，忽然間覺得自己好似真係去滑浪咁，好有渡假 FEEL∼！落左去學生會室，連嬴左阿榮兩場康樂棋之後，又走左去玩電腦。一夠鐘放學，我就即刻行返屋企。五點幾，約左皇上打算去圖書館睇姜白石同艾青既詩，點知原來圖書館星期四係休息架……我地改變左行程，改為去行街，之後我邀請左皇上去食雞翼。我地一邊聽歌一邊食野一邊傾計一邊玩，好快就到九點幾。雖然唔捨得，但係都送左皇上返屋企。

>>2003年02月28日Fri 01:53:38 (GMT+8)

2003 年 02 月 26 日 星期三 【晴】

　　本來朝頭早俾個死賤人過左一棟，嬲既程度都有四粒半星（最多係十粒）。不過我為左我可以響一堂多少少既時間做晒兩篇英文剪報而極度開心！過左兩堂英文之後，少有咁好快就買左碗米粉食，然後去急救站當值。今日當值好鬼開心，因為今日急救站變左做「１１７兒童畫班」！我開班教班小朋友畫公仔，佢地仲提議不如一人畫一幅然後拎學校Ｄ流動壁報板黎貼。我都希望可以咁樣玩呀，不過都唔知佢地係唔係真係會玩∼算啦，難得有一日可以過一個咁開心既 LUNCH TIME，之後既野唔去諗 LU∼

>>2003年02月26日Wed 23:30:04 (GMT+8)

2003 年 02 月 23 日 星期日 【晴】

　　大好既星期日，我又係要一早起身，因為今日要上ＭＲ既課程。上到HEAD，我地團加埋我竟然得六個人……原來朱添佢無通知過Ｄ會員去上堂。我一直都無留意到呢一點，真係失策……落左堂，同阿峰、黎子浩一齊去食粥，之後響愛民村行左陣，然後我就返左屋企熨Ｕ，因為三點到六點要去捐血站當值。今次早過峰少到，所以就做晒兩PART 先∼　無幾耐，峰少就黎到。我地如常做下野又傾下計，唔經唔覺就做到五點幾。響呢個時候，皇上竟然上左黎捐血站！太感動啦！不過由於人多左Ｄ，所以要佢等左好耐，真係唔好意思呀……皇上捐完血之後因為趕時間所以就急急腳咁走左，而我就去左買筆同塗改帶，然後行返屋企食飯∼！

>>2003年02月26日Wed 23:29:15 (GMT+8)

2003 年 02 月 22 日 星期六 【晴】

　　一朝早就俾人陰左一野！本來今日朝早要同班 MEMBER 練操既，但係一返到去，淨係見到四個小朋友響度玩緊足球機，佢地話我知無人打過電話通知佢地，肥仔尋日又話略略帶過叫佢地返黎。由於死無對證，所以我都唔去理追究問題，同佢地玩左陣就返返屋企訓返陣覺。之後我就換返套校服落街搭車過德雅中學。過到去，見到好多一段時間無見既朋友仔，忽然間真係覺得好開心！到左遊戲時間，我俾佢地指左同５２既一個新會員出去玩。結果我地嬴左，但係好難想像到５２竟然會有一個連提水俾佢都令我覺得辛苦既人……之後我又同峰少見佢地兩個ＭＣ叫人去玩但係無人上去，於是就上去玩多次，當然我地兩個梗係上台發揮我地攪事既本色啦！好彩呢段小插曲都幫到下 CATFIN 攪下氣氣∼　完左之後我就四圍搵人影相，因為我突然間好想影相。影左都幾耐之後，我就同峰少、崔峰、傻鴨、璟璟、濠鬼、叡叡、JIMMY 仔過去又一城食野。食完野，我就同JIMMY 仔搭地鐵落旺角。我去左旺中，同皇上去買糖食同行左陣街，之後就搭巴士返三一中心。全場同麗文姐仲有坐我隔離既小朋友傾計同玩，到表演既時候，我真係跟唔到，所以跳得唔係幾好，好彩我企響個放映機後面∼　^^ 等個活動完左，我就送跌左一隻CON 既麗文姐返屋企，然後我就一個人傻左咁邊唱歌邊行返屋企。其實一邊行一邊唱歌，個人既身心都幾舒服架∼！

>>2003年02月23日Sun 00:39:42 (GMT+8)

2003 年 02 月 21 日 星期五 【晴】

　　今日放學本來要幫手教班 MEMBER 步操，不過突然間話要同112 開SP，所以就上左去開會。我地傾左第七日嘉年華會攤位Ｄ野，到五點幾我就返屋企，因為我同班義工組既組員約好左七點鐘響中心為聽日既活動排舞。響排舞老師巧婷姐既教導下，我地學呢隻舞學到十點，但係我都係唔多熟，睇黎聽晚都係要去獻醜架啦……

>>2003年02月23日Sun 00:38:35 (GMT+8)

2003 年 02 月 20 日 星期四 【晴】

　　lunch 前兩堂中史堂又係如常既吉堂。由於有Ｄ眼訓，所以我就訓左響學生會室裡面張吹氣彈床度，一訓就差唔多訓左堂半。到我醒返既時候，身邊已經充滿左靚靚既彩紙，心中仲有張寫住「浩氣長存」既大卡紙。我為大家對我所做既一切實在太感激！因為奇奇用佢部電話幫我影左張角度拎得好靚既相，可惜佢無條駁電腦既線，所以最多都只可以將我張相用黎做佢部電話既 WALLPAPER。咁已經係好好架啦∼！
　　放學之後，過左去五記探我既囡囡、阿妹，仲有一班好得意既 MEMBER。一入到去就見到阿豆腐，佢真係好鬼可愛。我買左盒朱古力諗住請佢地班 MEMBER 食，佢就幫我拎去派俾人，叻女！之後我幫手教左上半場，五點左右就返屋企沖涼換衫落旺角，因為今晚我同LYDIA、佢細佬阿梁、仲有佢個朋友一齊去睇陳奕迅演唱會。我地響新世紀度食野同傾計，仲撞到YU3 既H 巧帆（都係相類似發音啦）添。之後我地就搭火車過紅磡體育館，入到場又見到肥曦，呢個世界真係細。今次既陳奕迅演唱會真係好正！一來個場境整得好特別，二來佢請返黎既新加坡音樂人嘉賓真係掂到無辦法形容，第三係陳奕迅扮聲，無論係樂器定扮其他人都真係好正，尤其係佢扮譚詠麟真係九成八相似！真係勁掂。仲有佢一連串既快歌，真係正到不得了。我響自己個位度跟住佢係咁唱，真係好鬼HIGH！最後仲有苦榮同小苦妹出場同佢合唱「孤兒仔」，苦榮拎唔切咪俾人見到咪咀即刻俾陳奕迅指住黎笑，之後估唔到原來小苦妹會爭咪唱左一句，不過就俾苦榮打左個頭一下，都幾得意。整體黎講今次演唱會真係幾成功，幾好！唯一唔好既係我睇就之後覺得好眼訓，所以就返左屋企訓個大覺∼！

>>2003年02月23日Sun 00:36:03 (GMT+8)

2003 年 02 月 17 日 星期一 【陰】

　　由於太過大頭蝦，唔記得左整隻飛機參加學校比賽既關係，我響 lunch 既時候衝左返屋企整左架飛機，仲要飛的返學校，結果我地個社竟然得第三……（不停噴血中）放左學，教左我班小朋友上半場步操之後，我就過左五記度探下佢地班小朋友，因為我都成個幾月無見過佢地啦！佢地真係好得意架，尤其係阿豆腐，成日笑到停唔到∼　響第二節我落左場幫手嗌操，佢地真係好可愛，因為我慣左大聲嗌，佢地又同我大聲數 timing，不過唔似人地好悔氣咁數，而係成班都好開心咁嗌出黎，真係連我都覺得好鬼開心！同佢地邊教邊玩邊笑到五點零鐘，我就交返佢地俾我囡囡。佢地操到六點幾就完，我就同囡囡、天霖、Wendy 一齊搭的士返土瓜灣。返到屋企，我已經變左做一個活死人。我訓左陣覺之後就起身食晚餐，食飽之後就訓到成十二點幾。跟住先起身做功課做到而家……

>>2003年02月18日Tue 02:46:50 (GMT+8)

2003 年 02 月 16 日 星期日 【晴】

　　又係去捐血站攪茶水既日子！今日我早左一個鐘頭過去，預先沖好左壺凍檸茶，仲試埋一個人睇晒填表同茶水兩個 part，體驗一下捐血站既工作人員忙碌既程度。原來一個人管兩 part 都已經有Ｄ難度，更何況佢地仲要理埋捐血既人，真係好犀利！三點鐘，峰少上到黎幫手。三點幾，傻鴨竟然上左黎捐血，仲同埋鈿姐、璟璟一齊上黎添，之後小婷都上埋黎，好熱鬧。原本我做到五點就收工，但係為左親手沖杯野俾傻鴨，所以我就遲左少少先走。之後我同璟璟、小婷一齊去行潮流特區同信和，行完信和小婷就返屋企，我就同豬媽（嘻嘻）過去旺中度買糖食，跟住送佢去搭車。我就返屋企睇左半套「冷靜與熱情之間」，然後就過左去婆婆屋企食飯。食飽，就返屋企畫野畫到差唔多五點，好彩都仲有傻姑姑陪我∼！^^

>>2003年02月18日Tue 02:32:12 (GMT+8)

2003 年 02 月 15 日 星期六 【晴】

　　放左自己一日假，俾自己唔理團務去做自己既事，享受自己既時間。今日朝早，我好榮幸約左百忙之中抽空蒞臨既 LYDIA 去睇「老鼠愛上貓」∼　黃秋生真係好有型呀！套戲都幾好睇，拍得唔錯。睇完戲，介紹左間書店俾我去睇書。裡面Ｄ書真係好正，我未諗過原來香港仲會有書店俾人去睇書，個格局幾好，不過過去就有Ｄ麻煩。之後我地過左去尖沙咀睇９０３既３６小時和平示愛音樂會，當然唔會睇足３６個鐘啦，呢場既時間淨係由兩點到五點鐘。都幾多人去唱歌架，最正既有張學友、KELLY、黃貫中、黃耀明……佢地唱既唔係首本名曲，亦唔係佢地既新作，而係一Ｄ反戰既歌。我覺得呢份心意真係好好，尤其是個節目係統籌得咁倉卒，可見Ｄ人真係有心去為世界和平而出一分力！直到五點鐘夠鐘散場，我地就去海運行左陣，之後就去左柏麗大道，但係就搵唔到賣公仔間鋪頭…由於時間唔早，所以我地就搭巴士返去土瓜灣。送左仍返屋企之後，我又響街度見到我既乖囡囡阿 LING同佢媽咪（真係十月懷胎生佢果個呀）。我同阿LING 傾左陣計，然後就返屋企食飯。同87 兩個小妹妹傾左陣電話，玩玩下電腦，忽然間睡魔急CALL，我竟然響電腦檯度訓左成個幾鐘……原本要做既事，就係因為呢個半鐘而無做到。陣間，唯有再去訓過。
　　頭先訓醒，見到一個 ICQ 度有一個留言，令我忽然間覺得好驚。我望住呢個OFFLINE MESSAGE，估計呢個朋友已經訓左，結果佢真係訓左。我呢一刻忽然驚左一下，我個大腦不其然閃出一個問題，「假如有一日呢個朋友響我既生命裡面消失左既話，我既人生將會變成點？」我諗我既大腦並唔會要我俾佢一個完滿既答案，但係我都響度諗。結果，我諗唔到我會變成點。前一輪無左佢，我可能到而家仲係帶住幾分頹廢去繼續過我既日子；以後既日子無左佢，我可能將要面對更多將抑鬱鬱響心裡面既未來，而且仲可能會好難習慣無左呢個朋友響身邊一齊傻、一齊笑……所以，當大家識到一個可以同你傾心事既朋友既話，請你地好好珍惜呢一位朋友。因為，將好多事屈響心裡面既日子真係好難過，無左一個可以俾你放心將心事講俾佢知既朋友就更加難過……

>>2003年02月16日Sun 02:54:40 (GMT+8)

2003 年 02 月 14 日 星期五 【晴】

　　情人節喎，祝大家情人節快樂先∼！今日都幾正。今日 lunch 既時候，我地班既同學響學校既慈善拍賣度買左盒彈彈波同一張 Thomas 吹氣彈床。之後我地上GPA 堂又玩到癲晒，連 MISS 都奈我地唔何。我地上堂係咁掟野，阿學生會主席仲響掟野既時候俾 MISS 睇到正，笑到我地死咁濟∼　之後西史堂何博士仲請埋假，我地仲唔作反咩？！上半堂我地響課室玩彈彈波，嘈到 MISS MOH 上唔到堂，過黎啤左我地幾眼、話左幾句。下半堂我地就落左去同班最後一日返學既中七同學玩彈彈床同開 CON，完全失晒控！放左學，開完會就上左HEAD。我上到去食左幾粒人地送既朱古力就過去聖三一度幫手教操。教完操，返HEAD 搵、崔峰、璟璟同牛牛。我地玩到六點幾就一齊去搭巴士走。送左牛牛返屋企，就過左去九場度行左陣，仲收到唯一一份唔食得既情人節禮物。多謝你呀 LYDIA∼！（我聽晚會睇隻VCD 架啦）八點幾我過旺角JOIN 返崔峰同媽媽。我地一齊去廟街度食野，之後又去許留山食甜品，好味∼！我地玩到傻晒，媽媽果然真係傻得好可愛！十一點幾返到屋企，同阿妹傾左陣ICQ，忽然發現原來自己都算好命，可以同一班朋友開心左一日！
無情人既情人節唔一定會悶，一個人過既情人節就真係好悶∼
聽日就係中國既情人節啦，希望大家會有一個開開心心既元霄節啦∼！

>>2003年02月15日Sat 02:21:36 (GMT+8)

2003 年 02 月 11 日 星期二 【晴】

　　成晚無訓過，不過就做晒Ｄ功課，出門口既時間仲好FIT 添∼！我可以落VAN 仔站同哎呀妹妹傾計，然後同獅子仔一齊行返學∼！返到學校，搖身一變成為特訓生－－大訓特訓既學生！由頭兩堂吉堂開始，我已經開始訓。之後訓左半堂中文、一個小息同兩堂ＧＰＡ……放左學之後，我同家曦、阿湧一齊做埋樂社個 BOARD。攪掂晒，差唔多成六點先返到屋企。玩左一陣 ICQ，因為有Ｄ倦，所以就打算去訓一陣覺。點知呢一陣竟然係四個幾鐘！老豆既朋友打電話黎，我一見到十一點幾仲以為自己已經訓到第二朝，嚇死……老豆同媽咪尋日上左大陸玩，今日返落黎。一睇就睇得出媽咪食飯既時候飲左酒，因為佢由返到屋企到而家係咁講野都仲未停過……難得可以休息咁多，都係再訓個覺先啦∼！　^^

>>2003年02月12日Wed 00:06:41 (GMT+8)

2003 年 02 月 10 日 星期一 【晴】

　　終於都要返學啦！今日無咩重要野做，淨係做左音樂學會同樂社既半塊BOARD。放學教左一陣操，跟住就返屋企。返到屋企，訓左一陣然後起身做功課。成個新年假既功課就一次過響一日之內做晒，係唔係好犀利呢∼！由於屋企既大人上左樟木頭，留返低一個唔想煮野食既小朋友（我）響屋企，於是我同好好人既LYDIA 去食飯。響食飯果度睇埋九五至尊之後我就送左佢返屋企，而我就返屋企繼續做我既功課，做到朝早六點都仲未做完……都係繼續做功課啦……

>>2003年02月11日Tue 06:09:17 (GMT+8)

2003 年 02 月 09 日 星期日 【晴】

　　又係去捐血站當值既好日子！我十二點左右上到去旺角銀城既捐血站，一入門口就見到峰少。我當然又係做油水…茶水位啦！呢日人唔算好多，少過一月初當值果次。不過今次就難攪Ｄ，因為橙汁粉用晒，三合一既美祿又分左體，仲有兩個好鍾意大嗌既小朋友上左黎…好彩，無驚無險又到三點，收工。我地一落到去兆萬，就見到HEIDI 同笑笑，於是我地四個就一齊過去蔡功譜度玩。一入到去，好多相熟既其他團幹事都響度。我地一去到就開始玩水，由三點幾玩到接近六點，攪到成個操場都濕晒…之後我地就清理現場同玩左個揮春設計比賽。寫完就開始打邊爐，正到痺！打完邊爐，我就同兩個囡囡、牛牛、關邦、阿DICK、阿峰、阿豐……好多好多人一齊搭巴士過去啟德嘉年華度玩。過到去，我去接埋LYDIA 就返去啟德嘉年華度玩。關邦運氣勁好，嬴左唔少公仔返黎。我玩拉繩本來拉到一隻傻豹架，不過佢最後一隻傻豹濕左水，所以我地就要左第二隻公仔。LYDIA 玩左兩次電擊捧都輸左，換唔到隻大熊仔（其實我都係…）。結果，我都係出左好多糧俾啟德嘉年華既員工……送左LYDIA 同牛牛返屋企之後，我就返屋企食糖水啦∼！

>>2003年02月11日Tue 06:08:41 (GMT+8)

2003 年 02 月 08 日 星期六 【晴】

　　本來今日約左一大班人去唱Ｋ架，不過因為去到K LUNCH 已經FULL 左，所以我就同獅子仔去左行旺角中心。行到一點幾，HEIDI、阿DICK 同阿叡上完DI 出到黎旺角，於是我地就一齊去吉野家食飯同吹水。差唔多三點，我去買左兩個STAR WAR 既FIGURE 之後，就上左愛民家霖屋企度，同家曦、阿湧、豬豬拍我地既英文PROJECT！家曦整既魚真係好好食，個個都做得好好∼！我地邊玩邊食邊做野，結果用左個幾鐘拍左段接近廿五分鐘既短片。拍好片，啦啦臨搭地鐵去寶琳過關邦屋企。過到去已經七點幾，最終都係無睇到魔戒，但係就同崔峰、牛牛、媽媽、關邦同佢女朋友一齊響KFC 食野，仲過左去美國冒險樂園度玩添∼！玩到十一點左右，我地買左兩杯粒粒雪糕食，又撩個小朋友玩左陣之後，就搭巴士返土瓜灣∼！返到屋企，第一時間剃晒Ｄ鬚，因為聽日要著Ｕ，到時先整就整唔切架啦∼！

>>2003年02月11日Tue 06:07:33 (GMT+8)

2003 年 02 月 06 日 星期四 【晴】

早跟自己說過深夜不要聽歌，結果還是忘記了……
夜半的歌聲總是幽怨的，尤其是電台播放的……
從今天睡醒開始，我除了吃晚餐外，全部時間都在上網……
開學時，曾告訴過自己要努力讀書、要重興自己的團隊、要學會跟朋友溝通……
直到我有時間靜下來回想自己所做過的，才發現自己多麼的不濟
完全沒有心機讀書，成績一塌糊塗……
團務在我手上亂七八糟的，只能夠維持比去年好一點的成績……
不開心的時候，始終不大懂得找人傾訴……
跟別人作下的承諾總能兌現，但是對自己作出的承諾呢？
夜半就記起，早上給忘記……
吊兒郎當，任何事都依當時好惡去做，不理結果，但一做便要在過程中做到最好
只想少量參與籌劃，但是會全力去參與行動，解決突發問題
要讓身邊的所有人都開心，卻讓自己獨個兒躺在床上哭
這就是真正的我
可是現在所做的大多都不是真我所想做的，要裝出來的……
中六，這麼多年來最多懊惱事的一年，內心經常感到疲累的一年……
哭，真的沒有用
但是不哭，又能怎樣宣洩這些反覆的思緒？
代表我的塔羅牌是隱士，意思是孤獨
也就是藏在我內心深處的孤獨……
揮之不去、驅之不散……

>>2003年02月07日Fri 03:53:31 (GMT+8)

2003 年 02 月 05 日 星期三 【晴】

　　今日一朝早就起身，因為今日係我既班會攪既足球新秀訓練班活動日，即係我地班既人踢波既日子。雖然我唔多識踢波，但係都有落場踢埋一份，做下後衛，無緣射門。我地由九點開始踢到十一點幾，完場之後就係訓練班，由家曦同世傑教我地定點射球同射十二碼，仲有排人牆，真係好好玩。學到咁上下，我地就各自各散水，我就返左學校拎返本 GPA 書同Ｄ人體奧妙展既現金代用卷。返到屋企沖個涼換件衫，然後就同小窗一齊搭車過黃埔。過到去黃埔，牛牛、峰少、關邦、占士、阿招、阿叡都已經到左。我地過左大家樂食左個 TEA，等埋 RACHEL 黎到之後就搭船過灣仔。同阿才會合埋我地就一齊去睇人體奧妙展。個展覽幾好睇，Ｄ標本都幾得意，差唔多個個全身模型都有蛋蛋，不過好多個都係黑雲石肺（生前一定食過好多煙）。我買左幾張 POST CARD 同一個蛋形人骨公仔，本來我想買三張 POSTER 架，不過屋企無位放，所以無買到。睇完之後我地就搭船過尖沙咀，小窗、阿才同阿叡都有事走先，我地就去左行玩具反斗城，不過今次都算係行得最唔知點既一次。行完我地就過左去哈迪斯食野，食完野本來打算去新港打機，但係最後都係無打到機。我地過去文化中心想睇燈光表演，不過遲左去，加埋搵唔到好位，個位俾Ｄ樹遮左半邊牆，又有個燈籠擋住視線，所以都睇唔到Ｄ咩……睇完，我地就陪峰少等車，RACHEL 同占士又一齊去搭地鐵，最後淨返關邦、牛牛同我三個人。我地過左去海運度食雪糕同傾計，傾到人地要閂鋪，我地就一齊搭巴士返土瓜灣送牛牛返屋企，仲上左佢屋企睇新筋肉人卡通添∼！睇左陣，我就同關邦一齊走。我地落返去巴士站一邊等小巴一邊傾計，到關邦有車到，我就自己行返屋企。

>>2003年02月06日Thu 01:09:27 (GMT+8)

2003 年 02 月 02 日 星期日 【晴】

　　今日係年初二，宜整手足甲、沐浴，所以我今日如常出門口前沖涼。都係由朝早講起先啦∼　初二，我呢個男丁一起身又要拜神。拜完神，我地一家四口同埋家姐個男朋友一齊食飯，之後就開始聚賭∼！我地玩鋤DEE、SHOW HAND、射龍門……結果我輸左唔少錢，不過呢Ｄ野絕對唔重要，因為我地全家人都玩得好開心∼！四點幾，我就去沖涼換衫，跟住就全家一齊過去我婆婆屋企。過到去，同我表妹打左個幾鐘頭機，跟住又睇左陣電視，等到Ｄ人差唔多黎齊晒就開飯啦∼！今年雖然都係好多人出黎食飯，不過就無往年做節咁有氣氛。差唔多個個表哥都帶埋女朋友上去食飯，所以要照顧佢地，咁同我地傾下計既時間當然少左啦。食完飯，無所事事左一陣，然後就開檔玩魚蝦蟹∼！今年可能因為夜得濟開檔，所以少左人玩。玩到十二點左右，個個都差唔多乾塘，班大人又要去搭車，所以個PARTY 就咁完左LU∼

ＰＳ：蔡係一個先天樂觀既姓氏黎，所以我係絕對唔會改姓李架∼！傻姑姑∼！

>>2003年02月03日Mon 01:37:13 (GMT+8)

2003 年 02 月 01 日 星期六 【晴】

　　年初一，我訓醒就梗係要拜神啦，因為我係男丁嘛∼！我代全家品完神之後，就一家人一齊食開年飯。屋村地方，有人黎舞獅就自然少不免架啦。我家姐話今年有好多「條」獅（屍），即時俾我拍左佢個咀一下，仲要俾我地糾正係好多「隊」獅，真係傻下傻下咁。食完飯，睇左好耐電視，玩左陣ICQ 之後，我就換衫上阿爺屋企。上到去，同姑姐仲有兩個表姐傾下計，玩下啤牌同魚蝦蟹，唔經唔覺就玩到六點幾。我同靚女姐姐傾左陣電話，跟住同家姐去士多買左Ｄ野飲，原來順利村間士多賣Ｄ野飲幾平架。返到阿爺度就開餐啦。食完飯，大人派晒利事之後，又係小朋友既無聊時間，當然都係我既無聊時間。電視又無野好睇，想訓又無地方可以訓，唯有聽班大人吹水。直到差唔多十一點，我終於加入左大人吹水既戰團。因為佢地講到小朋友個心諗咩呢個最中我既題目。於是唔知算係傾定係拗到十一點九，為左趕尾班巴士，所以話題結束，我地就搭車返屋企。返到屋企，老豆如常問有無人要去洗手間。我家姐話佢「去先」，結果又俾我拍左佢個咀一下∼！原來新年捉人講Ｄ唔吉利既野黎掌咀都係一個幾好玩既遊戲黎架∼

ＰＳ：我地掌咀只係輕輕力拍一拍，唔會打痛人架∼

>>2003年02月02日Sun 18:28:41 (GMT+8)

2003 年 01 月 31 日 星期五 【晴】

　　今日一朝早，我就同老豆＆媽咪落旺角花墟度食早餐同買花，仲買左件軍綠色既外套添∼之後就搭車返屋企。我響屋企執下野、聽下歌，五點零鐘就成家一齊上阿爺屋企。上到去，老豆依舊都係坐響度睇電影咩都唔理，我就落街行左陣，然後就上返去讀細姑姐寫俾阿嬤既信佢聽。八點幾，人差唔多到齊，於是就開飯。本來我同璟璟約左十點正響天后地鐵站恆生等架，不過因為二姑姐年初一要去旅行，所以要等佢派埋利事先行得。過到去天后站，已經十點三左右。我同烈風、濠哥、崔峰、璟璟、關邦、占士、RACHEL 一齊去維園行花市。我地由十點幾行到一點幾，不過都應該算係行，因為都無咩點買過野。我仲響去洗手間呢個空檔見到我班主任雞蛋，仲見到佢個仔添！我請左佢個仔食朱古力，等我走既時候仲聽到佢個仔讚我好有型添！（小朋友唔識講大話，大家唔好怪佢）之後我就同烈風、崔峰一齊送璟璟媽媽返屋企，搭左個幾鐘巴士，行左一段路，送左璟璟媽媽返屋企，然後我地三個就一路行一路飲啤傾計。我地傾左好多關於ＧＣ既問題，仲講左Ｄ心事。好多野都係要飲返咁上下先可以同人講，又要講左出黎先可以舒服Ｄ。返到屋企，就快四點。媽咪竟然仲響度睇緊電視。我上網寫埋個日記之後，一陣就去訓LU∼可能眼訓得濟，飲左少少都有Ｄ暈，睇黎聽朝可能會變熊貓啦∼！

>>2003年02月01日Sat 04:50:13 (GMT+8)

2003 年 01 月 30 日 星期四 【晴】

　　今日勁開心呀∼！一朝早，我就同獅子仔、阿LING 同佢個朋友仔一齊去睇九點三早場既＜行運超人＞。蘇民峰真係好正！套戲都好好笑，好有計，最好都係幽默得黎唔會玩埋Ｄ核凸野。之後我地去左旺中唱Ｋ，仲俾我搵到首黑山老妖添！我好耐無試過嗌歌啦，真係爽∼！唱完Ｋ之後，獅子仔要返屋企先，我就同囡囡＆佢個朋友仔去左行街，行到差唔多三點，我就搭地鐵過左尖沙咀，因為我約左靚女姐姐 LYDIA 去太空館睇＜親親海豚＞。我過到尖沙咀，見仲早就去左零食物語買野食。等到 LYDIA 黎到，我地就即刻去買飛入場。自暑假之後，我都無去過太空館睇野LU∼今次去睇海豚真係好開心，睇到Ｄ人同海豚可以一齊玩得好開心，又知道Ｄ海豚係靠叫聲、身體接觸同舞蹈黎溝通，而且Ｄ智商仲幾高添∼最得意都係Ｄ海豚跳出水面再落返水既時候，Ｄ水花淺出黎好似真係會整濕個身咁！睇完海豚，我地就過左去新港中心度打戲。我地玩拍拍機、PHOTO HUNT 同上海麻雀，點知一玩就玩到五點九，攪到佢遲左到，有Ｄ唔好意思添…同 LYDIA 過到去又一城之後，佢就去搵返佢既朋友，我就去左玩具反斗城度睇下有咩得意野，點知道俾我見到有套女裝 FIGURE 用既武器套裝，不過差唔多成 $120，我又無錢響身，所以就無買到。然後又去左香港唱片度搵套舊片＜東方三俠＞，我響VCD 部搵左好耐都搵唔到，但係響我覺得都係無咩機會會見到呢套片既時候，竟然俾我無意間響DVD 部度見到。但係最後都係無買到，因為我知道買左返去實俾老豆嘈一輪。行到七點幾，我就返左屋企食飯。食完飯，我就過左九龍城同 LYDIA 食糖水。好耐無試過同佢玩啦（應該都有半年），同佢傾計真係好舒服，永遠都唔駛就住就住，想講咩就講咩。唔知道做家姐既係唔係真係好人Ｄ架呢∼（我家姐都係一時時啦…）

>>2003年01月31日Fri 15:37:50 (GMT+8)

2003 年 01 月 29 日 星期三 【晴】

　　新年假既第一日，梗係幾歹都訓晏Ｄ啦∼！響屋企執左陣野，三點半左右就換衫落左五記，因為今日係五記既 MUSIC DAY。我等埋獅子仔同兩個囡囡之後，就同佢地落左去旺角度行街街∼　我地去左公和度食野，又買左Ｄ大樹菠蘿食，我買左Ｄ揮春，而我既好阿妹就買左條裙。六點幾，囡囡佢地要搭車返屋企，我就落左地鐵站，因為今晚係我地偉大既「栗子派」一年一度既春茗既大日子！我同師父、大師姐、峰少、傻鴨、阿叡一齊上左去幸福樓食自助火鍋。我食左陣就已經好飽，不過最開心都係可以見到好耐無見既師父同大師姐∼　我地傾下玩下，唔經唔覺已經差唔多十點鐘。於是我地就埋單，送師父同大師姐去搭車，然後我就同阿叡一齊搭 27M。返到土瓜灣，買左碗喳咋返屋企俾老豆同媽咪。當然，返到屋企梗係要 ONLINE 啦∼！

>>2003年01月31日Fri 15:37:07 (GMT+8)

2003 年 01 月 16 日 星期四 【晴】

　　今日靜係派左中文卷，四份卷裡面有兩份都考得唔錯，仲有兩份就未派。地理淨係派左標準答案，不過都知道自己可能唔合格。ＧＰＡ都唔知佢教過Ｄ咩，所以合格都可以算係奇蹟。西史就無可能會唔合格，只係未知高分定低分。至於英文，係比較飄忽既一科，因為連我自己都唔知道自己響份卷度做過Ｄ咩……放左學，同家霖佢地落左去夜冷鋪買左幾本細畫簿，之後就過左五記幫我既囡囡手教操。囡囡佢實在太仁慈啦，唔係咁識得點樣對班MEMBER 嚴Ｄ等佢地靜靜地聽教，所以我同天天就做左次丑人，同佢地訓話一番。我都好耐無試過響第二團度黑起塊面黎教操。一直同佢地練到六點多Ｄ，我就同兩個囡囡、獅子仔、小窗、天天同…（死啦，我又唔記得左人地個名……）一齊行返去。返到屋企，又要繼續做埋學校新政策下一Ｄ繁複而不切實際既文件……

>>2003年01月17日Fri 00:32:25 (GMT+8)

2003 年 01 月 15 日 星期三 【晴】

　　終於考完試，一放學就落左驊記同阿妹、HEIDI 囡囡、COVER 食LUNCH。我地一邊食一邊傾計，一直傾到大家返到五記。同囡囡約好左之後，我就行返屋企。行到過開平時時候，忽然有人叫我個名，原來係小農。我好耐無見過佢啦！諗返起以前自己既過失令到佢咁嬲，仲俾佢誤會左我……今日見返佢，佢似乎已經原諒左我，我個心即刻舒服左好多，但係我地之間已經無咩話題……係我地講左句BYE BYE 之後，我個心又開始有Ｄ唔舒服。明明係一段好好既友誼，如果當年無同佢開始過既話，而家我地應該仲可以一齊玩得好開心，唔會見到面咁尷尬，而我亦都唔會差Ｄ白白無左個以前咁玩得埋既朋友……返到屋企，睇左陣電視。屋企部電視最近同我一樣心情唔係咁好，佢講野一時大聲一時細聲，有時仲索性唔出聲。媽咪好隨意咁問我「屋企部電視想點？」，我就慣常性咁答佢「我都唔知佢想點！」，但係，原來我同部電視真係一樣，因為我都唔知道我自己想點。三點幾，換左件衫，過去五記同囡囡一齊上HEAD。上到去，見到226 既朋友仔又響度做文書，又見到POLLY、LILY 同埋其他55 既人上HEAD 練FIRST- AID COM。POLLY 請左我食珍寶珠，226 既朋友仔又請我食黑加倫子糖，我笑住咁多謝佢地，笑住咁同好多人講野，但係我覺得好倦，因為我既自然反應就係對住大家笑，但係個腦係同我講：「你真係開心咩？」我答唔出。之後送左囡囡上車，我就去左搭７Ｂ過樂富。上到車，見到之前響HEAD 果個226 既MEMBER，雖然我唔識佢，但係都走左過去同佢傾計。傾傾下，佢話佢認得我，原來我舊年幫手做ＭＣ既活動佢都有去到。我地一直傾到我到站落草，之後我就搵我媽咪一齊去佛教醫院探我阿嬤。大約七點，我地就落左九龍城廣場。峰少上次同我講佢見到有間鋪賣既FIGURE 有半價，於是我同我媽咪一齊去搵，但係最終結果係我同媽咪去左睇傢私同層架睇到八點幾。我覺得好悶、好唔開心，一來可能係同我既原意唔同左，二來係我覺得我同我媽咪既距離都好遠。以前我同媽咪都會知道對方想點，但係而家已經無呢回事……無再去睇有無FIGURE，我同媽咪講返屋企附近食飯。返到去，食左好少野，飲左好多啤酒。食完飯行返屋企，腳步有Ｄ浮，頭有Ｄ暈。睇左陣同我一樣唔知想點既電視，老豆返到，我又同佢再飲過，愈黎愈頭暈眼訓，過多陣，我就會去訓覺……

ＰＳ：呢篇日記因為尋日打既時候好倦又好暈，所以攪到Ｄ野錯左，好彩峰少提返，所以而家改返…

>>2003年01月16日Thu 23:34:14 (GMT+8)

2003 年 01 月 15 日 星期三 【晴】

　　終於考完試，一放學就落左驊記同阿妹、HEIDI 囡囡、COVER 食LUNCH。我地一邊食一邊傾計，一直傾到大家返到五記。同囡囡約好左之後，我就行返屋企。行到過開平時時候，忽然有人叫我個名，原來係小農。我好耐無見過佢啦！諗返起以前自己既過失令到佢咁嬲，仲俾佢誤會左我……今日見返佢，佢似乎已經原諒左我，我個心即刻舒服左好多，但係我地之間已經無咩話題……係我地講左句BYE BYE 之後，我個心又開始有Ｄ唔舒服。明明係一段好好既友誼，如果當年無同佢開始過既話，而家我地應該仲可以一齊玩得好開心，唔會見到面咁尷尬，而我亦都唔會差Ｄ白白無左個以前咁玩得埋既朋友……返到屋企，睇左陣電視。屋企部電視最近同我一樣心情唔係咁好，佢講野一時大聲一時細聲，有時仲索性唔出聲。媽咪好隨意咁問我「屋企部電視想點？」，我就慣常性咁答佢「我都唔知佢想點！」，但係，原來我同部電視真係一樣，因為我都唔知道我自己想點。三點幾，換左件衫，過去五記同囡囡一齊上HEAD。上到去，見到216 既朋友仔又響度做文書，又見到POLLY、LILY 同埋其他55 既人上HEAD 練FIRST- AID COM。POLLY 請左我食珍寶珠，216 既朋友仔又請我食黑加倫子糖，我笑住咁多謝佢地，笑住咁同好多人講野，但係我覺得好倦，因為我既自然反應就係對住大家笑，但係個腦係同我講：「你真係開心咩？」我答唔出。之後送左囡囡上車，我就去左搭７Ｂ過樂富。上到車，見到之前響HEAD 果個216 既MEMBER，雖然我唔識佢，但係都走左過去同佢傾計。傾傾下，佢話佢認得我，原來我舊年幫手做ＭＣ既活動佢都有去到。我地一直傾到我到站落草，之後我就搵我媽咪一齊去佛教醫院探我阿嬤。大約七點，我地就落左九龍城廣場。峰少上次同我講佢見到有間鋪賣既FIGURE 有半價，於是我同我媽咪一齊去搵，但係最終結果係我同媽咪去左睇傢私同層架睇到八點幾。我覺得好悶、好唔開心，一來可能係同我既原意唔同左，二來係我覺得我同我媽咪既距離都好遠。以前我同媽咪都會知道對方想點，但係而家已經無呢回事……無再去睇有無FIGURE，我同媽咪講返屋企附近食飯。返到去，食左好少野，飲左好多啤酒。食完飯行返屋企，腳步有Ｄ浮，頭有Ｄ暈。睇左陣同我一樣唔知想點既電視，老豆返到，我又同佢再飲過，愈黎愈頭暈眼訓，過多陣，我就會去訓覺……

>>2003年01月15日Wed 23:48:39 (GMT+8)

2003 年 01 月 14 日 星期二 【晴】

　　今日囡囡佢地考完試，我就同佢地去左慶祝，因為我都好耐無見過我既阿LING 囡囡啦。我一考完試就落左旺角搵我既囡囡同阿妹，然後我地就過左去NEWAY 唱Ｋ！由於獅子係同HEIDI 要返學校考ORAL，所以唱完Ｋ，佢地就返左去考試，我同阿LING、阿峰、阿麟同米雪一齊去左行街同食糖水。食完糖水，獅子仔同HEIDI 就返左黎JOIN 我地既返歸團∼　我返到屋企，換左件衫之後就落左去同阿LING 打左陣波，然後就去左自修室溫書LU∼

>>2003年01月15日Wed 15:45:28 (GMT+8)

2003 年 01 月 12 日 星期日 【晴】

　　今日本來叫返以前西九龍皇朝既朋友仔出黎食飯，因為我地既皇上阿成返左黎。點知最後得返PINKY、四仔、阿田同我出黎，因為個個今日唔係有野做就係唔舒服，皇上仲甩埋底…所以加埋獅子仔同囡囡都係得六個人∼　我地六個落左去PIZZA HUT 食野，之後又行左陣玩具反斗城，又去左行無印，仲過埋新港度打機。5:30 左右，PINKY、四仔同阿田都要走，咁我就同阿妹＆囡囡去左佐敦買禮物，我就買左隻馬騮公仔，因為今年犯太歲所以要帶Ｄ有馬騮既野響身邊擋煞，囡囡就買左盒高達俾佢細佬做生日禮物。我地仲過左義順度一人買左一碗燉奶，不過都係拎返去俾媽咪食既。之後我地就一齊搭車返土瓜灣。我送埋囡囡搭車，然後我就自己返屋企∼

>>2003年01月15日Wed 15:43:00 (GMT+8)

2003 年 01 月 11 日 星期六 【晴】

　　又係一個要著Ｕ既日子∼！今日要同66 落去旺角幫手教JU，之前一晚我已經買定一大樽棉花糖帶埋去。好好彩，落到去小學度，邪惡叮噹因為有野做所以要走先，我都樂得唔駛見到佢∼！上到班房，好意外咁要教班小朋友戴帽，點知我同開姐一教就教左差唔多成個鐘…之後同佢地練返上次Ｄ步操動作，不過就教唔到就動作。臨走既時候，我本來拎左樽棉花糖想請佢地食架，不過佢地個老師鬧佢地唔俾心機，又話佢地表現差。於是到我訓話既時候我就問佢地今次值唔值得請佢地食糖，佢地竟然好老實咁搖頭，佢地個MISS 都覺得佢地突然間變得好乖咁，所以我就話如果佢地下次表現好先請佢地食，仲成樽放左響MISS 度添∼　之後我地就落左Ｍ記開Ｅ，開完Ｅ就各散啦∼！我落左旺角行左陣，之後就搭巴士去機場，因為阿KEN 今日走啦…過到去，峰少已經到左，57 既朋友仔隨後都黎到。我地響機場度傾下計、玩下，唔經唔覺就玩到六點九。阿KEN 夠鐘入閘，我地就唯有目送佢離開我地，師公仲喊左出黎。我同大家一樣都好唔捨得阿KEN 走，不過我會更加期待佢兩年後放假返黎再同我地一齊去玩∼！

>>2003年01月15日Wed 15:41:51 (GMT+8)

2003 年 01 月 09 日 星期四 【晴】

　　今日考完試，返左去陳瑞祺小學睇下，點知竟然咁橋俾我見返黃老師！黃老師響開學既時候，由於長時間企得耐腳掙有事，所以辭左職。今日佢只係返黎代課，就偏偏俾我撞正呢日！我同黃老師傾左十五分鐘左右，算係多架啦∼！之後我仲俾左我既電話佢，希望佢遲下有時間可以同我地Ｄ舊同學食餐飯啦∼！之後返到屋企，突然興致大發畫左兩幅畫。因為聽日1:40 先要返學校考英文ORAL 既關係，所以可以ONLINE 夜Ｄ，但係都應該係時候去訓架啦∼！

>>2003年01月10日Fri 02:08:42 (GMT+8)

2003 年 01 月 02 日 星期四 【晴】

　　今日九點幾全家人一齊去食早餐，十點鐘就過左聖三一中學幫手教操。教到十二點幾，我就同苦榮一齊去搭車。返到屋企換件衫，然後就同媽咪、家姐一齊去尖沙咀行街。我地行完迪士尼之後就過左去美國冒險樂園玩，媽咪玩得好開心，我地仲影左張卡添∼之後老豆放休息，我地一家人就去左食飯，然後又返左去美國冒險樂園度玩同影卡，都好耐無試過一家人去行街，原來真係開心好多架！之後老豆要放公司繼續開工，媽咪、家姐同我就去行玩具反斗城。好懷念我同家姐細個既時候向媽咪扭計買玩具既情景，仲記得媽咪唔肯買玩具俾我既話，我會一路行一路扁咀，然後就會俾媽咪鬧……行完玩具反斗城之後，我地去左食雪糕，然後家姐就去左搭地鐵返佢屋企，我就同媽咪搭巴士返屋企。自從家姐搬左出去之後，我就覺得我既生活好悶，又好無規律，甚至係好不知所謂！以前家姐響屋企，我唔可以成日係咁用電腦。平日有咩開心同唔開心既野又可以同家姐講，雖然佢有時候唔會聽，但係佢都會照俾我講，講左之後個心會舒服好多，因為有人可以同我分享。有時無野好做又可以同佢互串下、鬧下交，起碼間屋有返Ｄ生氣先。而家成日得返我一個響屋企，無所事事，又無人成日話我懶唔溫書，無人同我鬧交，無人同我傾每日發生過既開心同唔開心既野，真係覺得自己既生活愈來愈唔知似乜，個人又唔知想點，成日都心情低落，Ｄ唔開心野成日收埋響個心度，又唔知可以同邊個講……我真係好掛住我家姐呀！

>>2003年01月02日Thu 23:11:48 (GMT+8)

2003 年 01 月 01 日 星期三 【晴】

　　五點半，我訓左個幾鐘之後就起左身梳洗、換Ｕ，因為今日係一個大日子！我同牛牛一齊搭巴士過尖沙咀，事關今日係十一個制服團體一齊去清理文化中心既大日子！我地響文化中心度傾左陣，聽左阿何生同董太既致詞之後，我地就開始去做野。其實都唔係好多野執，不過就要執Ｄ比較細型既垃圾。一開始既時候都見到Ｄ仲未返屋企既所謂時下青少年，真係好唔掂囉，睇到我地執既時候指指點點，都唔知佢地知唔知道自己做緊乜！我地執到差唔多九點就上返文化中心，聽完事後致詞同等埋四哥做埋訪問之後就全體收工啦∼之後我同RACHEL、叡叡、牛牛、阿蕉一齊返左去土瓜灣食早餐，然後就上左我屋企打麻雀。打完麻雀，我地又玩襟棉胎，玩到阿蕉差唔多拎晒成副牌咁濟∼玩下走下，最後淨返RACHEL、牛牛同我三個。我地三個玩左陣飛行棋，睇左陣電視，之後就送牛牛返屋企同送RACHEL 去搭車，我就返左屋企睇左陣書，然後唔覺唔覺就訓左啦……

ＰＳ：新一年，有一個有意義既新開始，真係覺得好開心呀∼！！

>>2003年01月02日Thu 22:40:57 (GMT+8)